Notísia foun


DILI—Profesór Filozofia Étika no Polítika Institutu Superior Filozofia no Teolojia (ISFIT), Don Jaime Goulart Fatu-Meta, Amu Martino Gusmão husu ba Prezidente Repúblika Francisco Guterres Lu Olo ho fuan boot (daternura) rezigna-an, tanba opsaun tolu ne’ebé foti nein partidu polítika ne’ebé asenta iha parlamentu nasionál la halo tuir, maibé nia husik “dodok” tiha de’it.

“Ha’u hanoin see prezidente repúblika fuan boot bele rezigna-an (menundurkan diri), tanba prezidente repúblika fó nomor satu, nomor dua no nomor tiga, nein ida realiza. Devia-ser prezidente repúblika fó opsaun satu, dua, tiga, ne’e opsaun, más nu’udar lider nia tenke prepara mós alternativa no fó opsaun tolu, agora nia hela de’it  nomor satu ne’ebé eleisaun antesipada, más tanba sá ida ne’e nia halo tinan ida liubá, buat ne’e too buat ne’e “dodok” tiha ema la konsege ona haan mak nia foin atu dada fali mai estraga buat hotu-hotu, maibé laiha alternativa derrepente COVID mai uza hanesa alternativa, maibé alternativa la’ós ba solusaun,” Amu Martinho Gusmão ba Timor Post iha kna’ar fatin semináriu Fatu-Meta Dili, Segunda (4/5/2020).

Amu Martinho hatutan, solusaun laiha dalan seluk, prezidente repúblika tenke deklara katak opsaun númeru datolu Primeiru Ministru Taur Matan Ruak la funsiona, númeru daruak dehan AMP foun iha ona mós Prezidente la simu hotu, ikus ba eleisaun antesipada, más nia tempu liu tiha ona.

“Lori povu nia terus ne’e ita salva took prezidente, prezidente fuan boot Mengundurkan Diri, solusaun ne’ebé ha’u hanoin rezigna-an, tuir mai deklara eleisaun rua hotu, eleisaun parlamentár ho eleisaun prezidensiál, ita rezolve hosi abut, más fó ida-fó ida ita imposivel, tanba saida mak KHUNTO halo ba CNRT ne’e traisaun,” Amu Martinho salienta.

Nia dehan, see KHUNTO nia karta ne’e hatudu katak prezidente seidauk aseita sei inserteza, entaun tenke ba halo protesta hasoru prezidente repúblika la’ós ba sobu fali nia uma, see o nia uma nakadoko, koko hadi’a uma ne’e, see ema atu mai sobu uma ne’e, tenke dehan labele.

“Agora la’e, ema atu mai sobu o nia uma envés defende o nia uma la’e, o ba hela tiha ema nia uma, husik o nian namtate, polítika saida mak hanesan ne’e?,” Amu Martinho lamenta.

“KHUNTO estraga buat hotu-hotu, see ita permite nafatin KHUNTO eziste iha Timor, nasaun ida ne’e sei la ba oin, tanba nia estraga buat hotu, juramentu falsu, uza ran ne’e hanesan manipulasaun ida ba povu nia sentimentu relijiozu  la di’ak, ida ne’e ita jura ba ran falsu nian ran lanu ita, ne’e akontese agora ran lanu ita, já que atu harii governu da-sia mós labele ona, oitavo governu mós imposivel, ita tenke-ser ba eleisaun, ha’u  dehan eleisaun antesipada, ha’u dehan re-eleisaun, tanba konstituisaun laiha lia-fuan eleisaun antesipada, re-eleisaun ne’e ba prezidente repúblika dala ida,” Amu Martinho subliña.

Amu Martinho Gusmão afirma  liga ho partidu tolu Fretilín, PLP ho KHUNTO atu viabiliza governu konstitusionál daualuk, liga ho konstituisaun la hatene atu oinsá, tanba Prezidente Repúblika Francisco Guterres Lú Olo estadu ne’e iha emerjénsia nia laran no iha krize konstituisaun ne’e grave tebes.

“Nein tempu no fatin permite ita atu oitavu governu, primeiru see ita hakarak ko’alia ho fuan no domin tebes ba povu ida ne’e, ita tenke admite katak Covid ne’e fó tempu ba ita atu halo buat di’ak, más afinál COVID ne’e halo ita halo buat at ba povu,” Amu Martinho hatete.

Amu Martinho nia parte sente lamentavel FRETILIN,  PLP ho KHUNTO ne’ebé iha momentu povu hakat liu difikuldade nia moris no sente todan no terus ba moras, maibé mós tau ba hamlaha, partidu tolu envés atu ajuda hakat liu estadu emerjénsia lae, maibé aprova tiha estadu emerjénsia atu halo polítika fo’er, moralmente inaseitavel.

Kona-ba oitavu governu, jurista ne’e hateten see halo tuir ida-idak nia hakarak no gostu bele, más halo tuir konstituisaun no moral ho fiar nu’udar ema sarani labele, tanba signifika estraga ona, primeiru halo segundu konstituisaun ho moral la sustenta no halo polítika konforme ida-idak hakarak polítika.

“Terseiru, buat ne’ebé ha’u admira no sente estraiña katak Fretilín kontinua hatete dehan ami aprova oitavu governu, só ké Fretilín la define didi’ak, oitavu governu ne’e CNRT mak iha laran ka Fretilín mak hakarak iha laran, ida ne’e ita la hetan klaru, tan ne’e, ha’u haree hanesan Fretilin kedok bee merak, maibé bele mós FRETILIN atu hanorin PLP ho KHUNTO, see imi hakarak oitavu governu ne’e imi fila ba CNRT lalika mai book ami Fretilín, ne’e mensajen rua ne’ebé ha’u haree hosi Fretilín,” dehan Pe. Gusmão.

Primeiru Fretilín hakarak halo bee sai merak no segundu Fretilín hakarak fó mensajen ba Taur Matan Ruak ho Naimori atu fila ba AMP depois husik PD ho partidu ki’ik tolu ne’e husik ba Fretilín hela iha liur, see ida ne’e mak Fretilín halo signifika Fretilín salva situasaun, más see Fretilín halo ida ne’e, Fretilín husik, agora Xanana CNRT dehan ona selesai, tanba hakarak buat ne’e di’ak maibé see la lakohi husik ba rahun.

“Agora kona-ba karta petisaun ne’ebé Xanana lori ba Tribunal ne’e serangan dari sayang, Más dawan lo-loos ne’e Xanana iha ideia katak fó mensajen edukativu ba povu tomak liu-liu ba lider sira atu sai bibi atan di’ak, sai lider ne’e sai bibi atan alias kaer ukun ne’e ita-nia karakter lideransa tenke bibi atan, hamriik iha oin lori hatudu dalan loos ba povu, hamutuk ho povu ita hamutuk halibur unidade nasionál no hamriik iha kotuk atu ema labele namtate,” katak nia.

Tuir nia hanoin, FRETILIN ho CNRT imposivel atu hamutuk, ezemplu hanesan mina ho bee, maibé sira na’in rua mós bele sai hanesan estrada no estrada sempre karuk ho loos, hosi Lospalos halai too ba Oe-kusse mós nunka mais estrada nunka hasoru malu, más la’o ho di’ak maski zig-zag mas tenke la’o akompaña malu.

Tanba ne’e, Fretilín ho CNRT tenke sai responsabilidade ba estadu, see partidu boot rua ne’e hanoin katak estrada ne’e karuk de’it ka loos de’it, nasaun ida ne’e monu, maibé Fretilin ho CNRT hanoin katak estrada liman loos ho karuk roda mós loos ho karuk hakarak ka lakohi too iha objetivu.

“Ida ne’e ha’u dehan revolusaun fuan laran (daternura), hanesan amu Papa Francisco dehan, ba ha’u husu ho haraik an ba CNRT ho Fretilín halo revolusaun daternura atu haruka PLP ho KHUNTO parker tiha lai, FRETILIN haruka PLP ho KHUNTO fila ba oitavu governu signifika labele ona ka laiha ona dalan oitavu governu haluha tiha, nein konstitusionál no moral bele aseita, nein sosiál no polítika aseita oitavu governu, buat ne’ebé ha’u bele dehan ké agora hotu-hotu tenke fila ba saida mak prezidente fó ona,” dehan nia. (yto)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 1,381
  • Page views today : 2,326
  • Total visitors : 74,313
  • Total page view: 103,584

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur