Notísia foun

SONY DSC

DILI—Porta-Vóz Sentru Integradu Jestaun Krize (SIJK) Doutór Sérgio Lobo rekoñese, iha posibilidade transmisaun lokál husi pesti corona (COVID-19) mai husi grupu Likisá ne’ebé kazu pozitivu sidadaun Portugués na’in rua no pesoál saúde na’in-ida ne’ebé konfirmadu tiha ona.

Liuhusi konferénsia ba imprensa iha Sala de Situasaun iha Sentru Konvensaun Dili (CCD), Sexta (24/04/2020), Doutór Sérgio subliña, nia parte fó atensaun maka’as ba kazu husi Likisá, nune’e mós pesoál saúde maske atualmente sira iha hela sala izolamentu ho kondisaun normal hela.

Nia hatete, tanba iha posibilidade ba transmisaun lokal, liuliu ba kazu iha Likisá nian, maka ekipa epimodolojia halo tiha ona investigasaun ba ema sira ne’ebé besik ka halo kontaktu ho portuguesa na’in-rua no sei hein hela rejultadu teste husi laboratórium.  “Seidauk hetan evidénsia ba transmisaun lokál. I Laboratórium nasionál mós halo tiha ona teste ba ema na’in-17 ne’ebé iha sintomas mear no inus-ben. Maibé ministériu saúde diside tiha ona atu teste ba ema hotu ne’ebé iha sintomas respiratóriu,” Doutór Sérgio hatete.

Nune’e mós ba pesoal saúde mós parte laboratórium halo ona investigasaun ho nia família no halo hotu teste no sei hein hotu rejultadu konfirmasaun husi Dárwin.

Sidadaun portugués na’in rua ne’e foin hala’o viajen husi Portugál mai Timor Leste no ba hala’o atividade hanorin eskola iha eskola Kafé iha Likisá molok Timor Leste rejista kazu pozitivu ida iha loron 21/ Marsu 2020.

Inkuantu pesoál saúde ne’e hetan pozitivu hafoin laboratórium halo teste ba nia tanba durante ne’e nia fó asisténsia médiku ba pasiente sira pozitivu COVID-19 iha sala izolamentu iha Sentru Saúde Vera Kruz, Dili.

Entretantu Doutór Sérgio haktuir, total pasiente ne’ebé atualmente iha hela sala izolamentu hamutuk na’in-21.

Sira ne’ebé hetan pozitivu ne’e mai husi grupu neen inklui husi grupu kuarentena Hotel Katuas, Hotel Novo Horizonte, Hotel Fortuna, Hotel Lecidere no Hotel Timing.

“Ita nia maluk sira ne’ebé iha Sentru Saúde Vera Kruz iha hela situasaun ne’ebé estavel, hotu-hotu halo tiha ona teste ba dala rua, na’in rua sei pozitivu nafatin. Iha ida maka negativu dala rua tiha ona. Nia ita konsidera rekoperadu, na’in-19  hein hela rejultadu ba teste dahuluk,” Doutór Sérgio haktuir.

“Lolo’os sira bele fila ba uma ona, maibé sira sei hein nafatin iha fatin izolamentu tanba ita sei halo lai desinfesaun ba sira nia sasan sira ne’ebé sira lori,” nia informa.

Entretantu hahú husi fulan Marsu 2020 to’o notísia ne’e fó sai, ema na’in-1695 mak sai ona husi kuarentena, no atualmente sei iha kuarentena hamutuk na’in-409.

Durante ne’e laboratórium halo ona teste ba ema hamutuk na’in-392 konsidera hanesan suspeitu ba COVID-19, kazu konfirmadu 24, na’in rua rekopera, negativu negativu na’in-347, na’in- 21 mak hein rejultadu teste laboratórium.

No Kazu provavel na’in-4 rejultadu teste fó sai ona hatudu negativu, sira muda fali ba kuarentena. (cao)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 121
  • Page views today : 141
  • Total visitors : 73,053
  • Total page view: 101,399

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur