Notísia foun


DILI—Prezidente CNRT nu’udar mós Prezidente Koligasaun Foun, Kayrala Xanana Gusmão ho Primeiru Ministru Governu Daualu Taur Matan Ruak hato’o votus parabens ba organizasaun arte marsiál Kmanek Oan Rai Klaran (KORK) ne’ebé selebra loron espesial organizasaun nian iha loron 12 Abril.

Liuhusi karta ne’ebé Timor Post asesu iha loron Domingu (12/04/2020), Xanana dirizi espesial ba Mestre Boot KORK nu’udar mós Konsilleru Máximu Partidu KHUNTO nian, José dos Santos Naimori Bukar, hodi subliña, desezu atu organizasaun KORK bele nafatin buar nu’udar mós organizasaun arte marsiál ida hodi kontribui ba zenvolvimentu fíziku, formasaun karater no personalidade memru sira nian nu’udar element sosiedade Timor Leste nian.

“Organizasaun tenke dezenvolve a’an ho espíritu Timoroan, hametin identidade no mós haburas kultura povu Timor Leste nian. Hanesan Bou Nai sempre temi, Ha’u hatutan ba Imi, Imi hatutan ba, lori malu hatutan, tali sei la kotu,”  Xanana subliña.

Xanana hatete,  nia labele partisipa iha serimónia ne’ebé KORK hala’I iha Ainaro no iha fatin ne’ebé de’it tanba Nasaun iha hela Estadu Emerjénsia no mundu tomak hasoru hela ameasa hosi moras virus corona.

“Biar ha’u laiha imi nia let maibé ha’u hato’o ba imi hotu ne’ebé halibur-án hela iha rai Ainaro no mós sira ne’ebé iha Timor laran tomak ha’u nia votus de parabens no deseza katak imi nia selebrasaun la’o di’ak iha ambite organizasaun ida nian iha Timor oan sira mak hasoru malu hodi hanoin buat mesak di’ak ba ita nia Nasaun,” Xanana hatete.

Iha karta nia roha Xanana hakerek lia dadolin “Lai fitu tua tolu, fit utu tulo, lai mosu kedas, didudiur kedas, manu asubau, manu rai nian. La seluk la let mesak ita de’it, hussar talin la koa neras la fahe, Rai rua kuak ida”

Entretantu votus ho mensajen hanesan hato’o uluk husi Primeiru Ministru Taur Matan Ruak iha loron 8 Abril 2020.

“Durante Estadu Emerjênsia, ita labele halo movimentu ba mai no labele mós halibur malu barak iha fatin ida de’it. Maibé ita bele, ida-idak iha nia fatin, suku, postu no munisípiu, selebra loron murak ida ne’e, halo sakrifísiu no ritual tuir ukun fuan KORK nian,” Taur subliña iha nia votus parabens no mesajen ba família boot KORK.

“Mai ita hamutuk, ho neon ho laran ida de’it, hahi no hawelok loron boot ida ne’e, 12 de Abril, hodi fo mós ita nia contribuição atu luta contra moras COVID-19, hodi mantém nafatin distância social, evita halibur malu iha grupo boot, usa máscara wainhira sai no ba-mai, fase liman beibeik no evita kaer ibun, matan, oin no inus!,” Taur subliña.

Iha votus no mensajen ikus husi Taur subliña lia dadolin “Dook husi Matan, Maibé besik liu husi fuan!” no Taur fó viva ba família boot KORK no fó viva Timor Lorosa’e.

Entretantu 12 Abril loron boot, loron importante no loron família KORK nian. Tinan-tinan, iha loron ida ne’e, família boot KORK, halibur malu iha Rai Ainaro, foho Tatamailau nia hun, husi fatin hotu-hotu, Timor laran tomak, no mós husi rai li’ur, hodi hala’o sacrifício no ritual, tuir tradisaun KORK nian!.

Maibé tinan ida ne’e oin seluk. Família boot KORK labele halibur malu no labele hetan malu tanba de’it moras COVID-19 ne’ebé afeta rai hotu-hotu iha mundu, inklui Timor Leste. (cao)

Please follow and like us:

NOTÍSIA FOUN

Site Statistics

  • Users online: 3 
  • Visitors today : 808
  • Page views today : 982
  • Total visitors : 84,655
  • Total page view: 118,789

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur