Notísia foun


DILI—Estudante timoroan na’in-20 kompostu husi feto na’in-7 mane-13, ne’ebé durante ne’e hala’o estudu iha Bogor Indonézia, hasoru ameasa hamlaha tanba estadu rai ne’eba aplika lockdown ka la sai husi uma no laiha osan ba sira hodi asesu ba nesesidade báziku no partisipa iha aula online.

Liuhusi konferénsia espesiál ho Timor Post via vídeo WhatsApp, Porta-voz,  Feliciano Soares haktuir, asaun real ne’ebé Estadu Repúblika Indonézia halo atu labele halo atividade hirak ne’ebé involve ema barak no liu husi uza mídia elektrónika sira hodi hala’o nafatin atendimentu públiku sira liu husi online.

Situasaun ne’e halo estudante timoroan ne’ebé daudauk ne’e hala’o estudu iha IPB Bogor izola an de’it iha uma no la halo movimentu ba mai.

“Realidade ne’e nu’udar dezafiu boot ida ba ami estudante sira tanba sei defikulta ami atu hetan nesesidade báziku ne’ebé pertenente no nesesariu tebes ba ami nia nesesidade lorloron nian, tanba ami labele halo movimentu hanesan baibain,” Feliciano hatete.

“Felizmente ami estudante timoroan iha Bogor Jakarta Indonézia seidauk hetan infeksaun ba virus COVID-19 maibé ne’e la signifika ami siguru no laiha posibilidade atu hetan virus COVID-19, tanba COVID-19 fasil tebes atu hadaet ba sé de’it no bainhra de’it,” Feliciano hato’o preokupasaun.

Estudante sira informa iha area Bogor estudante timoroan sira hahú menus tanba balun deside fila ona ba Timor inklui estudante Indonézia ne’ebé iha Bogor fila hotu ona ba sira nia suku bo Aldeia.

“Ami rekomenda ba Estadu Timor Leste atu kontribui no asegura ami estudante sira oras  dauduak iha hela Indonézia, ami mós husu ba Embaixadór Timor Leste iha Indonézia no Adidu Edukasaun iha Jakarta atu kontinua halo kontaktu efetivu ho universidade sira nune’e akompañia ami nia situasaun relasiona ho COVID-19,” Feliciano subliña.

Atualizasaun mundiál to’o loron Tersa (31/03/2020) rejista ema ne’ebé afetadu  hamutuk 785,534, mate hamutuk 37,811no rekopera hamutuk 165,585. Iha Indonézia afetadu hamutuk 1,414, mate hamutuk 122, no rekopera hamutuk 75. Inkuantu iha Timor Leste foin rejista kazu ida. (res)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 960
  • Page views today : 1,355
  • Total visitors : 80,212
  • Total page view: 112,436

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur