Notísia foun


DILI—Governu daualu lideradu Primeiru Ministru Taur Matan Ruak liuhusi reuniaun Konsellu Ministru halo ona aprovasaun ba regra sira ba aplikasaun estadu emerjénsia durante fulan ida nian, iha loron Sábadu (28/03/2020).

Aplikasaun estadu emerjénsia tenke iha regulamentu ida ne’ebé produz husi governu no sei halo sensebilizasaun atu iha implementasaun labele akontese violasaun sira ba direitu ema nian, no atuasaun husi pesoal sira ho baze professional, tanba estadu emerjénsia la signifika hapara atividade hotu-hotu.

Iha mensajen Prezidente Repúblika Francisco Guterres Lú Olo nian molok deklara estadu emerjénsia subliña, medida ida ne’e sei laiha efeitu ba moris, integridade fízika, kapasidade sivíl no sidadania, la retroativu ba lei penal, defeza ba prosesu kriminal, liberdade ba konsiénsia no relijiaun, la sai sujeitu ba torturasaun, eskravatura, tratamentu kruel, dezumanu no la diskriminativu.

Entretantu fonte ida nu’udar sidadaun estranjeiru ba Timor Post haktuir, sira hetan presaun direta no indireta husi ema deskoñesidu tanba ho kompriende sala katak, virus corona da’et husi “malae” sira. Tanba ne’e sira hetan tuda no ameasa oioin iha munisípiu Baucau.

Fonte ne’e konfesa, sira nia governu informadu ona no ho rajaun seluk kona-ba prevensaun ba moras daet COVID-19, autoridade sira buka hela dalan atu lori sai sidadaun sira ne’e husi Timor Leste.

“Ami sente hetan diskriminasaun husi maluk timoroan sira alu ne’ebé la kompriende di’ak kona-ba saida mak virus corona,” fonte ne’e dehan.

Relasiona ho situasaun ne’e, Timor Post seidauk hetan konfirmasaun husi autoridade seguransa munisípiu Baucau nian.

Entretantu, iha loron Sábadu (28/03/2020), Taur hala’o ona enkontru dahuluk ho Ekipa Jestaun Krize ne’ebé nia forma hodi hahú halo preparasaun ba estabelesimentu Jestaun Krize,  atu halo jestaun iha durante  implementasaun Estadu Emerjénsia.

Durante  Estadu  Emerjénsia,  kontrolu tomak sei mai hosi komandu ida de’it no informasaun hotu-hotu mós sei sentralizadu, no kontrolu  ba sirkulasaun atividade  hotu-hotu  sei hetan kontrolu  hosi  Ekipa Jestaun ba Krize.

Ekipa Jestaun ba Krize ne’e sei hahú serbisu efetivu wainhira Dekretu Governu kona ba regulasaun Estadu Emerjénsia Aprovadu.

Iha Durante  Estadu Emerjénsia  ne’e  mós, Xefe Governu sei asumi  responsabilidade ba Komisaun Interministerial  ne’ebé  durante  ne’e lidera hosi Ministra Saúde Interina, Elia Antonio de Araujo dos Reis  Amaral, kona-ba preparativu sira luta kontra COVID-19.

Hola parte iha enkontru Jestaun krize ne’e mak hanesan; Minsitru  Defeza no Ministru  Interior Interinu, Filomeno da Paixão de Jesus, Xefe  Estadu Maior F-FDTL, Koronel Calisto dos Santos “Koliate” no ofisiais F-FDTL sira seluk. (cao)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 506
  • Page views today : 693
  • Total visitors : 79,017
  • Total page view: 110,760

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur