Notísia foun


DILI—Primeiru-Ministru Taur Matan Ruak, iha loron Kuarta (25/03/2020), husu deskulpa ba Kordenadór Rezidente ONU iha Timor-Leste, Roy Trivedy no Reprezentante Organizasaun Mundial Saude (OMS), Rajesh Pandav, tanba deklarasaun falta kuidadu hosi Komandante Operasionál Nasionál PNTL, Superintendente Xefe Polísia, Pedro Belo ne’ebé deklara ba mídia iha loron Tersa (24/3) katak OMS nia prezensa iha Timor-Leste hanesan projetu ida.

Timor Post simu komunikadu ba imprensa husi gabinete PM haktuir, Xefe Governu aproveita hodi Governu Timor-Leste nia naran hato’o deskulpa ba OMS, hodi realsa katak deklarasaun refere la reprejenta Governu no Estadu Timor-Leste. Tanba ne’e Xefe Governu orienta ona Ministru Interior Interinu atu orienta Komandante Jeral PNTL atu toma atensaun ba komandante PNTL sira ko’alia de’it iha sira-nia knaar ka área serbisu.

Liután, Xefe Governu akresenta, Governu iha konfiansa nafatin ba OMS no apresia tebes ba serbisu OMS nian iha Timor-Leste ne’ebé daudaun ne’e ajuda tebes Governu liuliu iha luta kontra Pandemia COVID-19.

Entretantu Reprezentante Rezidente ONU agradese tebes ba asaun Xefe Governu nia hodi husu deskulpa atu labele interrompe serbisu hamutuk entre OMS no Timor-Leste ne’ebé durante ne’e iha ona. (cao)

Please follow and like us:

NOTÍSIA FOUN

Site Statistics

  • Users online: 5 
  • Visitors today : 265
  • Page views today : 377
  • Total visitors : 78,271
  • Total page view: 109,688

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur