Notísia foun


DILI—Voluntáriu sira husi Korpu da Pás (Peace Corps Timor Leste)-Estadus Unidus Amérika (EUA) no Korea International Cooperation Agency (KOICA) deside retira husi Timor Leste tanba preokupa ho virus corona.

Evakuasaun temporariu ne’e Korpu da Pás hala’o tiha ona iha loron 15/03/2020. Desizaun ne’ebé hasai iha kurtel jeral Korpu da Pás iha Washington ne’e ba voluntáriu sira iha mundu tomak relasiona ho restrisaun viajen ne’ebé aumenta ba beibeik afeta ba abilidade muda voluntariu sira ba fatin evakuasaun médiku, iha Sudeste Aziátiku no iha Estadus Unidus.

“Ami nia voluntáriu sira nia saúde no seguransa mak buat importante liu hotu iha Korpu da Pás,” subliña iha komunikadu ne’ebé Timor Post asesu husi Embaixada Estadus Unidus Amérika (EUA) iha Dili.

Iha komunikadu ne’e, Korpu da Páz fó agradesimentu ba governu Timor Leste no família ospede, parseiru no komunidade timoroan sira nia apoiu ba voluntáriu sira no iha komitmentu atu fila fali servisu hamutuk iha Timor Leste.

Entretantu seidauk iha komunikadu ofisial husi Koica rasik, maibé fonte kredivél Timor Post iha Embaixada Korea Súl iha Dili haktuir, hahú loron 18/03/2020, estranjeiru sira durante ne’e servisu iha Koica hahú fila ba ida-idak nia nasaun.

Estranjeiru balun ne’ebé fila uluk on aba sira nia rai konfesa ba Timor Post sira halo desizaun ne’e tanba preokupa ho kapasidade governu nian kontra virus corona ne’ebé sai preokupasaun mundiál.

Estranjeiru ne’ebé lakohi temi nia naran ba Timor Post hatete, maske virus ne’e seidauk tama iha Timor Leste maibé sira sente seguru liu fila ba sira nia rai, tanba iha garantia husi sira nia governu inklui fasilidade sira adekuadu.

Relasiona ho informasaun ne’e, Timor Post halo ona konfirmasaun ba Ministru Negósiu Estranjeirus no Kooperasaun (MNEK), Dionísio Babo Soares.

Ministru Babo informadu kona-ba estranjeiru sira ne’ebé servisu iha ajénsia Peace Corps husi Amérika nian iha Dili, balun nia servisu hotu duni ona mak fila, maibé balun tauk ho virus corona.

“Sobre ida Peace Corps ne’e sira fo hatene. Ne’e balun remata ona, no seluk tanba tauk COVID-19,” Ministru Babo dehan.

Maske nune’e, nia salienta, Timor Leste laiha problema ho desizaun husi estranjeiru sira iha rai laran relasiona ho virus corona.

“Ita laiha problema. Maibé ita mós sei restring para kuandu hakarak mai fali tenki tuir medidas de kontrolu. Ne’e sei rígido liu tan,” Ministru Babo afirma ba Timor Post, Segunda (16/03/2020).

Kona-ba preparasaun sira husi governu Timor Leste hodi halo prevensaun no antisipasaun sira ba daet virus corona, interministerial kompostu husi MNEK rasik ho Ministériu Saúde, Ministériu Interior no parte relevante sira hetan apoiu maka’as husi parseiru sira liuliu Organizasaun Mundiál Saúde (OMS) kontinua halo servisu maka’as.

Iha parte seluk, governu liuhosi reuniaun Konsellu Ministru, aprova Projetu Rezolusaun Governu ne’ebé aprezenta husi Ministru Babo hodi estende aplikasaun no ezekusaun medida temporária, hodi halo interdisaun no restrisaun ba ema estranjeiru sira ne’ebé atu tama mai rai-laran.

Rezolusun governu ne’e vale liu ba sidadaun sira tama mai rai-laran iha semana haat (hahú iha 11 MArsu 2020) ka halo tránzitu ba nasaun hanesan Repúblika Populár Xina, Repúblika Koreia, Repúblika Italiana, no Repúblika Izlámika Iraun. (cao)

Please follow and like us:

NOTÍSIA FOUN

Site Statistics

  • Users online: 9 
  • Visitors today : 665
  • Page views today : 973
  • Total visitors : 73,597
  • Total page view: 102,231

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur