Notísia foun


DILI— Partidu Frente Mudansa (FM) liuhosi konferénsia estraordinária desidi integra iha koligasaun foun ne’ebé harii husi CNRT, PD, KHUNTO, UDT, PUDD  lideradu Kayrala Xanana Gusmão hodi forma governu dasia hodi salva nasaun husi krize polítika no fó moris di’ak ba povu.

Reprezentante Prezidente  Komisaun Juridisaun, Daniel Pereira, atúal membru Komisaun Polítika Nasionál no hanesan mós membru Komisaun Juridisaun, afirma, partidu halo ona konferénsia ne’e hodi responde ba preokupasaun Prezidente Repúblika Francisco Guterres Lú Olo nian ba legalidade koligasaun foun.

“Reafirmasaun pozisaun partidu FM, bazeia ba rezultadu hosi dialogu entre Lider nasional sira iha loron 10 fulan Fevereiru 2020, iha Palásiu Prezidensiál ne’ebé prezide hosi PR no deklara Ofisialmente, eleisaun antisipada Hanesan rekursu ikus, partidu politiku ne’ebé hetan asentu Parlamentar halo movimentu hodi hetan solusaun ba Impase no ikus kontinua mantein Taur Matan Ruak Nu’udar Primeiru Ministru to hetan solusaun ba krize politika ne’ebé la’o kuaze Tinan Tolu,” Daniel, informa liuhosi konferensia imprensa iha hotel arbiru Bebonuk, domingu (08/03).

Nune’e nia hatutan, fó importansia ba pontu 2 hosi rezultadu dialogu entre Lider nasional iha loron 10 fulan Fevereiru 2020 no konsodera mós ba akordu politiku ne’ebé partidu FM asina hodi forma Aliansa Maioria Parlamentar iha fulan Juñu 2018.

Haktuir tan nia, FM konsidera mós ba deklarasaun primeiru ministru VIII governu konstitusional Taur Matan Ruak, Nu’udar mós prezidente PLP iha loron 20 fulan Janeiru no loron 30 fulan Janeiru 2020, katak AMP la eziste ona no konsidera mós ba submisaun karta pedido demisaun hosi PM ba prezidente republika iha loron 24 fulan Fevereiru 2020.

“Bazeia ba KRDTL katak PM sei indijitadu hosi Aliansa Maioria Parlamentar  ne’ebé forma hosi Partidu Politiku sira, i konsidera ba Lei partidu politiku liuliu ba dispostu iha Nu. 1 no Nu. 3 Artigu 9, Lei Nu. 3/2004, 14 Abril ne’ebé alteradu ho Lei Nu. 2/2016, 3 Fevereiru,” Dehan nia.

Nune’e nia argumenta katak, bazeia ba Baze legal hirak ne’ebé temi ona iha leten liuhosi konferensia estraordinaria iha loron 8 fulan Marsu 2020 hamosu pontu importante tolu ne’ebé mak Reafirma Pozisaun hosi Partidu ne’e nia rasik.

“Solisita ba PR Nu’udar aman ba Nasaun atu ho konsistensia hakotu lalais impase ne’ebé la’o kuaze Tinan Tolu ona ho vizaun estadista hodi valoriza pontu 2 hosi rezultadu enkontru ho Lider Nasionál sira iha loron 10 fulan Fevereiru 2020 no mós FM ne’ebé hetan kadeira 1 iha Parlamentu nafatin kaer prinsipiu demokratiku katak Minoria Sub ordina an ba Maioria”, Katak nia.

Ikus nia afirma, FM la ezije kadeira iha governu Maibé afirma vontade politika ba maun Xanana Gusmão no partidu seluk ne’ebé hamutuk ona iha koligasaun atu kontinua nafatin AMP hodi responde ba rezultadu hosi enkontru Lider Nasionál iha 10 fulan Fevereiru 2020 no Reafirma apoiu total ho Unamidade ba deklarasaun konjunta ne’ebé asina hosi Prezidente Partidu Lima ho partidu CNRT  ne’ebé halo koligasaun halo koligasaun iha loron 22 fulan fevereiru 2020 iha Sedé CNRT. (ato)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 1,134
  • Page views today : 1,624
  • Total visitors : 80,386
  • Total page view: 112,705

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur