Notísia foun


Hosi; António J. Castro da Cunha

Loron 22-02-2020, sai loron ida-ne’ebé importante tebes iha ezistensia nasaun RDTL. Hafoin moris iha situasaun polítika ne’ebé la-iha serteja, nakonu ho ímpase, “intrik politik” oioin, to’o trava proposta OJE 2020, ikus mai mosu fali koligasaun foun ho 34 kadeiras iha Parlamentu Nasionál. Koligasaun foun ne’e, nafatin lidera husi CNRT (21 kadeiras) ho apoiu husi Partidu Demokrátiku (5 kadeiras), Partidu KHUNTO (5 Kadeiras), PUDD (Kadeira 1), Frenti-Mudansa (Kadeira 1) no Partidu-UDT (Kadeira 1). Partidu neen (6) ne’ebé mensiona hamutuk asina akta koligasaun foun hodi prepara hakat ba formasaun governu konstitusionál Da-Sia.

Perguntas ne’ebé iha mak-ne’e, ho formasaun koligasaun foun ne’e bele ona hakotu ímpase ne’ebé durante ne’e iha? Ou ka sei kontinua nafatin hamosu ímpase seluk? Hanesan ita-hotu hatene ona, ímpase polítika ne’ebé mak durante ne’e mosu, kauza prinsipál tanba Prezidente Repúblika, Dr. Francisco Guterres Lu Olo la-fó pose ba membru governu na’in 9 (2 husi KHUNTO no 7 husi CNRT). Seráke problema ne’ebé hanesan sei mosu iha governasaun koligasaun foun ne’e?

Prezidente CNRT, Kay Rala Xanana Gusmão hafoin asinatura akta koligasaun foun hateten, katak kadeira 34 iha Parlamentu Nasionál ne’e sei garante estabilidade governativa ba governu foun. Maibé, se ita haree fali kompozisaun governasaun iha Governu Konstitusionál da-ualu nian, kadeira iha AMP nian mós iha 34 (CNRT 21, PLP 8 no KHUNTO 5), aumenta tan apoiu husi UDT/F-Mudansa hamutuk kadeira 36, maibé sei nafatin la-garante no governu da-ualu ikus mai monu duni.

Tanba-ne’e, tuir ha’u nia hanoin, problema prinsipál husi situasaun (Ímpase) polítika ohin-loron ne’e, la’os iha kuantidade kadeiras, maibé liu-liu iha vontade polítika husi lider nasionál hotu atu iha komunikasaun polítika ida-ne’ebé di’ak no nakloke ba-malu. Ímpase polítika ne’e mosu, tanba “ego polítika” ne’ebé domina liu iha líder polítiku sira-nia ulun, hodi defende idak-idak nia prinsipiu no dignidade partidaria.

Komprimisu Polítiku KMP

Koligasaun Mayoria Parlamentar (KMP) sei la’o ho komprimisu ualu (8) bainhira forma governu, mak hanesan;

  • Kontinua implementa programa ne’ebé uluk VIII Governu hala’o ne’ebé bazeia ba iha Planu Estratejiku Dezenvolvimentu 2030.
  • Tau matan ba povu sira iha área rural hodi hadi’a sira-nia moris.
  • Garante estabilidade nasionál ne’ebé hanesan fatór determinante ida ba dezenvolvimentu nasional
  • Kontinua hala’o negosiasaun fronteira terrestre no marítima ho Indonezia
  • Kontinua tau matan ba veteranu, idozu, defisiente no oan ki’ak sira
  • Kontinua hadi’a infrastrutura.
  • Kontiua hadia serbisu justisa.
  • Promove nafatin boa governasaun.

Komprimisu ualu ne’ebé mensiona, ne’e la’os ona buat foun ida. Maibé perguntas mai ha’u mak iha komprimisu númeru 1, katak kontinua implementa programa governu konstitusionál daualu nian. Hanesan ita hotu hatene ona, katak iha governu daualu eziste partidu tolu (3) ne’ebé forma AMP (Aliansa Mayoria Parlamentar), mak Partidu CNRT, KHUNTO no PLP. Enkuantu iha kompozisaun KMP agora, ne’ebé atu forma governu konstitusionál dasia, iha partidu neen (6), mak P. CNRT, P.KHUNTO, PD, PUDD, PUDT no PFM.

Partidu CNRT no KHUNTO kala bele kontinua nafatin sira-nia programa ne’ebé durante ne’e la’o ona. Maibé ba partidu haat seluk, atu hala’o loos programa ida-ne’ebé? CNRT ho KHUNTO nia programa? Ka PLP nia programa? Ka partidu haat ne’ebé iha (PD, PUDD, UDT no FM) sei impoen sira-nia programa rasik? ou partidu haat ne’e simu de’it ona programa polítiku ne’ebé P-CNRT no P-KHUNTO haraik ba sira? Se impoen mós porgrama rasik, entaun ne’e hatudu katak iha fali programa foun, no programa ne’ebé iha, la’os ona kontinuasaun 100% husi programa governu konstitusionál daualu nian. Mezmu nune’e, resposta ba perguntas sira-ne’e fila fali ba líderes no dirijentes partidu idak-idak nian, tanba asuntu sira hanesan ne’e sempre liga ba prinsipiu no komprimisiu eleitorál partidu idak-idak nian bainhira iha periodu kampañe.

Halakon “Ego Polítika”

Koligasaun foun lideradu husi Partidu CNRT forma ona. Partidu polítiku sira hala’o ona sira-nia knár hodi buka malu tuir desizaun líder nasionál sira. Ho formasaun koligasaun foun ne’e, espera katak opsaun eleisaun antesipada hanesan rekursu ikus la akontese. Iha kondisaun ne’e hanesan ne’e, pontu importante liu ba líder polítiku sira mak atu halakon tiha “ego polítika” entre sira.

Ha’u konkorda tebes ho Líder nasionál, sekretáriu jerál  Partidu FRETILIN, DR. Marii Alkatiri, ne’ebé hateten atu líder polítiku labele uja malu hanesan instrumentu. Ida-ne’e pertinente tebes, atu líder polítiku ida-ida bele iha konsiderasaun ba-malu, hodi lahatudu “arogánsia” iha ukun. Atu líder ida-ida bele iha konsiénsia katak, partidu boot ou partidu kiik, kadeira barak ou kadeira ida de’it, hotu-hotu iha papél ne’ebé importante i fundamentu tebes ba dezenvolvimentu moris di’ak povu rai ida-ne’e nian.

Ho hanoin sira-ne’e hotu, nune’e, atu bele garante estabalidade governativa, koligasaun foun ne’e, liu-liu CNRT nomós KHUNTO atu bele haree oituan ba kotuk, tanbasá mak problema ímpase ne’e bele mosu. Ha’u haree katak, lapresiza atu “obriga” nafatin membru governu sira-ne’ebé durante ne’e sai nu’udar “kauza” problema ímpase ne’e.

Ha’u fiar katak iha partidu CNRT nomós KHUNTO sei iha kuadrus polítiku sira-seluk, ne’ebé iha matenek, integridade no kualidade atu bele hola parte iha governasaun nia laran. Hanesan lemma PD nian, se ukun ne’e responsabilidade, nune’e dala ida tan, lapresija “obriga” kuadrus ne’ebé iha hela “problema” no la-iha kualidade atu sai membru governu.

Alende ne’e, ha’u mós hakarak fo hanoin, katak atu garante estabilidade no “salva” nasaun ida-ne’e, la-presija tan ona iha estrutura membru governu ne’ebé boot demais. Partidu polítiku sira (iha koligasaun) nia laran, tenki fuan boot atu la impoen sira-nia hakarak, hodi “husu” kadeira barbarak. Tanba, estrutura governasaun ne’ebé boot, iha tempu ukun tinan 2,5 ka tina 3 nia laran, so para atu gasta de’it osan povu nian, no sei la fo impaktu ne’ebé boot liu ba iha dezenvolvimentu ekonomia rai laran.

Presija iha Komunikasaun Nakloke

Komunikasaun ne’ebé nakloke entre Partidu Polítiku sira iha koligasaun no Prezidente Repúblika importante tebes. tanbasá? Tanba povu sei nafatin iha dúvidas, seráke koligasaun foun bele rezolve problema sira-ne’ebé durante ne’e mosu ka lae. Formasaun governu, no indikasaun kuadrus sira ne’ebé atu sai membru governu, presija komunika ho nakloke ba-malu, atu nune’e labele kontinua hamosu “’impase”.

Partidu koligasaun sira tenki tetu didiak antesedente no dezempeñu kandidatu membru governu sira, atu nune’e labele kontinua hamosu polímika. Komunikasaun entre líder nasionál presija hadi’a fali, atu bele tau konfiansa ba povu ida-ne’e, katak sei lamosu tan problema ne’ebé bele afeita ba sira-nia moris loroloron. Komunikasaun entre maun boot Kay Rala Xanana Gusmão ho Prezidente Repúblika, Dr. Francisco Guterres Lu Olo presija hadi’a fali, atu bele fo esperansa ba povu ida-ne’e, katak komprimisiu polítika ne’ebé iha bele duni responde ba moris di’ak povu tomak nian.

Hakotu opiniaun pesoal ida-ne’e, hakarak dezeiju parabéns ba líder polítiku sira-hotu, hahú husi Partidu FRETILIN, PLP, CNRT, PD, KHUNTO, PUDD, FM no UDT, ne’ebé mak hatudu ona imi hotu nia maturidade polítika hodi hakat liu situasaun ímpase polítika ida-ne’e. Parabéns mós ba povu Timor-Leste tomak ne’ebé nafatin iha hakmatek nia laran hodi hein bainhira loos mak ímpase polítiku ida-ne’e liu. Obrigadu barak ba F-FDTL no PNTL ne’ebé sempre firme hodi garante estabilidae no seguransa nasaun nian. Ita hotu hein hamutuk desizaun tuir mai husi Prezidente  Repúblika Dr. Francisco Guterres Lu Olo. Seráke formasaun governu dasia sei mosu iha tempu badak ne’e, ou tenki liu-husi Eleisaun Antesipada?

Notas: Hakerek ne’e nu’udar opiniaun pesoál no la reprezenta instituisaun ida. Hakerek Na’in nu’udar dosente Fakuldade Ekonomia i Negosiu Institute Of Business (IOB).

 

Please follow and like us:

NOTÍSIA FOUN

Site Statistics

  • Users online: 0 
  • Visitors today : 537
  • Page views today : 709
  • Total visitors : 77,913
  • Total page view: 109,174

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur