Notísia foun


DILI—Virus Corona ne’ebé mosu iha Sidade Wuhan-Xina iha fulan dezembru liuba ne’ebé hamate ona ema liu rihun rua, agora hahú ataka maka’as iha sidade Daegu Korea Súl no hamate ona ema na’in ualu.

Tuir informasaun ne’ebé fó sai husi mídia lokal sira iha sidade Daegu, virus ne’e hahú ataka Daegu iha janeiru 2020 to’o fevereiru nia klaran konsege daet ona ba koreanu sira kuaze atus no hamate ema na’in ualu.

Ho situasaun ne’e, Adido Sekretáriu Estadu Formasaun Profesionál no Empregu  (SEFOPE), Valencio Anes de Jesus ba Timor Post, Tersa (25/02/2020) rekoñese virus Corono ataka duni Korea Súl liuliu iha sidade Daegu, maibé to’o entrevista ne’e hala’o, nia informa, laiha timoroan ida mak kona virus ne’e.

“Traballadór timorense iha Korea laiha ida mak afetadu husi Virus Corona,” Adidu hatete.

Maibé Adidu dehan, nia rasik sempre alerta ba traballadór sira mantein kuidadu-an. Labele movimentu iha liur no uza maskra no fase liman bainhira hán hahan ruma.

“Sira nia patraun rasik bandu sira atu labele la’o sai husi kompañia, ba sira ne’ebé mak iha sidade afetadu maka’as uitoan hanesan sidade Daegu,” Adidu haktuir.

Tuir informasaun ne’ebé Timor Post asesu haktuir, traballadór timoroan iha sidade Daegu kuaze atus.

Traballadór timoroan ida ho naran Isadoro Alberto Carlos husi Suku Manelobas, Postu Administrativu Maubisse, Munisípiu Ainaro ne’ebé servisu iha sidade Daegu ba Timor Post hatete, sira preokupa tebes ho situasaun ida ne’e.

Nia rekoñese hetan ona kontaktu husi Adidu no iha ona koordenasaun kona-ba antisipasaun sira no prepara ba evakuasaun karik virus ne’e daet maka’as liu tan iha sidade Daegu.

“Ami agora di’ak hela no hala’o atividade hanesan baibain, maibé ami tenke uza maskra. Ami hetan atensaun boot husi patraun sira atu hán no hemu kuidadu, labele sai ba liur ka pasiar arbiru iha sidade. Adidu mós halo ona kontaktu atu ema ida-idak kuaidadu-an,” Isadoro haktuir.

Entretantu iha sidade Wuhan-Xina, bolseiru timoroan hamutuk na’in 17, iha koordenasaun autoridade Timor Leste ho Governu Nova Zelándia hodi halo evakuasaun husi Wuhan ba Nova Zelándia karantina durante loron 14,  no iha semana kotuk timoroan hirak ne’e to’o ona iha Dili. (cao)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 1,015
  • Page views today : 1,439
  • Total visitors : 80,267
  • Total page view: 112,520

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur