Notísia foun


DILI—Primeiru Ministru Taur Matan Ruak aprejenta ona karta rejignasaun ba Prezidente Repúblika Francisco Guterres Lú Olo, iha loron Tersa (25/02/2020), iha Palásiu Prezidensiál Nicolau Lobato, Bairro-pité, Dili.

Taur hatete, nia foti desizaun ne’e tanba ejijensia politika iha rai laran inklui iha ona koligasaun foun ne’ebe atu forma governu dasia.

Ho pedidu ne’e, Prezidente Repúblika sei hola desizaun hodi halo demisaun ba governu daualu.

Hafoin aprejenta karta rejignasaun ba Lú Olo, ba Jornalista sira Taur hatete, nia kontinua hala’o kna’ar to’o prezidente repúblika dekreta nia pedidu rejignasaun.

“Ha’u servisu nafatin. Ha’u hatete ba ita-boot sira (jornalista) pedidu demisaun ne’e só validu kuandu Prezidente Repúblika dekreta. Inkuantu seidauk dekreta ha’u (Taur Matan Ruak) kontinua primeiru ministru to’o prezidente republika dekreta. siap komandan!,” Taur hatete ba Jornalista sira.

“Ita labele husik ita nia nasaun. Hanesan karreta ida karik kondutor laiha,” Taur hatete.

Tuir Konstituisaun RDTL artigu 112 haktuir kona-ba demisaun governu nian haktuir iha pontu ida, alinea (b) haktuir bainhira Prezidente-Repúblika simu pedidu demisaun hosi Primeiru-Ministru.

Tanba ne’e, liga ba situasaun polítika atuál, Primeiru Ministru Taur Matan Ruak kumpri ona regra ida ne’e hodi nune’e loke dalan ba governu dasia hala’o mandatu foun.

Jurista Senior Timoroan Avelino Coelho subliña ba Timor Post via telefone iha loron Segunda (24/02/2020), subliña, bazeia ba orientasaun prezidente repúblika nian hafoin meza redonda ho líder istóriku sira, iha ne’ebé iha pontu ida kona-ba movimentasaun polítika entre partidu asentu parlamentar sira, nune’e, iha tiha ona koligasaun foun atu forma governu dasia, maka Primeiru Ministru  Taur Matan Ruak bele toma inisiativa ba rejignasaun. (cao)

Please follow and like us:

NOTÍSIA FOUN

Site Statistics

  • Users online: 2 
  • Visitors today : 136
  • Page views today : 183
  • Total visitors : 78,142
  • Total page view: 109,494

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur