Notísia foun


DILI—Sekretáriu Jerál FRETILIN, Marí Bim Amude Alkatiri afirma, lakohi oho an iha formasaun governu dasia no prepara ba kaer ukun iha tinan 2023, tanba impase polítika atuál problema Prezidente CNRT Xanana Gusmão ho Prezidente Repúblika Francisco Guterres Lú Olo.

Situasaun polítika atuál nota pesimista sira FRETILIN nian ba hakotu bainhira involve iha governu foun, tanba Alkatiri dehan, sé FRETILIN mak ba hamutuk ho CNRT mós problema ho prezidente repúblika, FRETILIN lakohi oho an.

Tanba ne’e, Alkatiri hatete, Xanana ho Prezidente Repúblika maka tenke rejolve problema membru governu daualu na’in sia maioria husi CNRT ne’ebé la hetan pose.

Membru na’in sia ne’e kuaze tinan rua Prezidente Repúblika Francisco Guterres Lú Olo la fó pose tanba deskonfia pesoal sira ne’e iha problema ho justisa, maibé CNRT rasik lakohi troka membru hirak ne’e no defende nafatin tanba rajaun pejunsaun inosénsia. Ikus mai CNRT la fó votus a favor ba OJE 2020 hodi xumba no problema fila ba prezidente repúblika.

“Xanana mak rejolve problema ho prezidente Lú Olo, fasilita teb-tebes nasaun tomak, ne’e ita bele la’o lalais liu, se nia lakohi rejolve, problema ne’e iha sira na’in rua, la’ós iha ami,” Alkatiri subliña ba Jornalista sira hafoin hasoru malu ho delegasaun husi PD lideradu Sekretáriu Jerál António da Conceição, iha CCF, Komoro, Dili, Tersa (18/02/2020).

Maske nune’e, Alkatiri hatete, atu hetan solusaun imidiada ba situasaun polítika atuál maka tenke iha duni governu foun ida ne’ebé bele kontinua lori povu no nasaun ba oin.

“Solusaun imidiata, rejolve atu iha nono governu ida ke bele lori rai ne’e ba oin,” Alkatiri afirma.

Entretantu sorumutu FRETILIN ho PD hanesan komunikasaun ida ne’ebé hala’o hanesan movimentu polítiku ida ne’ebé tuir orientasaun prezidente repúblika atu hetan lalais solusaun ba situasaun polítika atuál.

Alkatiri hatete, FRETILIN nia odamatan nakloke ba forsa polítika hotu iha Timor Leste, maibé ko’alia kona-ba koligasaun foun ba forma governu dasia lidera husi FRETILIN, Alkatiri dehan, ba dadauk ne’e FRETILIN nia aliadu mak povu. Nune’e nia hatutan, agora namanas hela kuadru FRETILIN sira fahe malu  tún ba baze hodi aranja forsa ba kaer ukun hafoin eleisaun jerál iha 2023.

Alkatiri salienta, FRETILIN lakohi eleisaun antesipada daruak tanba lakohi iha Timor Leste mandatu Prezidente Repúblika Francisco Guterres Lú Olo nian marka eleisaun antesipada dala rua tutuir malu.

Entretantu Jurista senior timoroan Avelino Coelho afirma, Prezidente Repúblika Francisco Guterres Lú Olo tenke fó garantia ba CNRT antes no depois eleisaun antesipada relasiona ho membru husi partidu ne’e nian la hetan posse.

Avelino dehan, garantia ne’ebé nia hanoin maka prezidente repúblika tenke garante katak bainhira iha movimentasaun polítika iha parlamentu nasionál CNRT ho KHUNTO maka forma fali governu dasia, prezidente repúblika bele fó pose ba membru nain hirak ne’ebé durante ne’e  sai polémika ka lae.

Nune’e mós Avelino dehan, prezidente repúblika mós tenke fó garantia ba CNRT katak bianhira laiha konsertasaun polítika iha parlamentu nasionál hodi avansa ba eleisaun antesipada, prezidente repúblika sei fó posse ka lae bainhira CNRT maka forma governu foun no kontinua nafatin membru na’in hirak ne’e.

Iha sorin seluk, mediadór ba situasaun polítika atuál José Manuél Ramos Horta iha loron hirak liu ba haktuir, iha sinál pozetivu bainhira nia rasik hasoru malu ona ho Prezidente Partidu CNRT Kayrala Xanana Gusmão, no dehan líder karismátiku ne’e halo hela diálogu iha partidu laran no ho partidu sira seluk ne’ebé asentu parlamentar relasiona ho situasaun polítika atuál.

Tuir fonte kredivél Timor Post haktuir, Partidu CNRT sei halo konferénsia nasionál iha fulan Fevereiru ne’e nia rohan hodi halo desizaun ba sira nia pozisaun ba formasaun governu dasia. Maske nune’e, fonte ne’e dehan, komunikasaun ho partidu seluk asentu parlamentar lao dadauk liuliu ho PD, KHUNTO, UDT/FM no PUDD. (cao)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 140
  • Page views today : 187
  • Total visitors : 78,146
  • Total page view: 109,498

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur