Notísia foun


DILI—Kayrala Xanana Gusmão la partisipa iha diálogu ne’ebé hala’o entre líder istóriku no pesonalidade sira ne’ebé lidera husi Prezidente Repúblika Francisco Guterres Lú Olo, ne’ebé hala’o Segunda (10/02/2020), iha Palásiu Prezidensia Republika Nicolau Lobato, Dili.

Antes ne’e Lú Olo marka ona ajenda halo diálogu ho líder istóriku no personalidade sira hamutuk na’in neen, inklui Eis-Prezidente Ramos Horta, Eis-Prezidente no atuál Primeiru-Ministru, Taur Matan Ruak,   Eis- Primeiru Ministru Mari Alkatiri, Xefe Estadu-Maior-Jenerál F-FDTL, Majór-Jenerál Lere Anan Timur no veteranu Roque Rodrigues no Eis-Prezidente Repúblika no Eis-Primeiru-Ministru  Kayrala Xanana Gusmão rasik.

Timor Post halo konfirmasaun katak, Xanana Gusmão hafoin partisipa entrevista espesial iha televizaun, nia aranka kedas ba Lospalos ho objetivu ba kari aifunan ba nia inan hakiak durante tempu rejisténsia, ho naran Jacinta de Jesus, iha Bauro, Lospalos, Munisípiu Lautem.

Miquitho Falutxay nu’udar Saudoza Jacinta nia bei-oan ba Timor Post haktuir, iha dader loron Segunda (10/02/2020) maka Xanana hala’o nia vizita ba Saudoza Jacinta nia rate hodi kari aifunan.

Xanana marka ajenda ne’e tanba bainhira Xanana nia inan haki’ak Saudoza Jacinta hakotu iis iha loron 24/01/2020 to’o haloot, nia la partisipa.

Tuir ajenda, hafoin kari aifunan iha Saudoza Jacinta nia rate, Xanana sei halao vizita ba fatin istoriku sira iha Lautem no fila ba Dili iha loron Tersa (11/02/2020).

Entretantu Prezidente Repúblika Francisco Guterres Lú Olo konvida especial líder istóriku no personalidade na’in-neen atu halo reuniaun iha loron 10 Fevereiru 2020 hodi sira-nia hanoin kona-ba situasaun polítika-konstitusionál atuál.

“Hamutuk ho líder no personalidade hirak ne’e,Xefe Estadu sei“halo análize no identifika opsaun sira ne’ebé di’akliu hodi hadi’a  situasaun polítiku-konstitusional atual”. Subliña iha komunikadu imprensa.

Reuniaun espesial ne’e hala’o relasiona ho rejeisaun Proposta Lei Orsamentu Jerál Estadu 2020, iha 17 janeiru tinan ida ne’e iha Parlamentu Nasional. Nune’e, Prezidente Repúblika uza kbiit husi  artigu 74 Konstituisaun RDTL, atu garante unidade Estadu no funsionamentu regular instituisoins demokrátikas.

Ho kbiit ida ne’e mak  Prezidente Repúblika halo diálogu tiha ona ho líder polítiku no entidade relevante sira tuir mai: Forum Organizasaun Sosiedade Sivíl oioin (FONGTIL), juristas, Igreja Katólika no konfisaun relijioza sira seluk, Câmara do Comércio e Indústria de Timor-Leste (CCI-TL)Conselho Combatentes da Libertação Nacional,  organizasaun rezistensia hamahon-an iha Konsellu Nasional Juventude Timor-Leste,  Centro de Estudo para a Paz e Desenvolvimento (CEPAD), Movimentu Asukai Lorosa’e noFORSAREPETIL  husi 23 janeiru to’o 07 fevereiru 2020.

Ikus liu Xefe Estadu mós sei rona no tetu hanoin sira hosi ninia órgaun konsulta – Konsellu Estadu,  molok foti dezisaun relasiona ho situasaun polítiku-konstitusionál ne’ebé oras ne’e Nasaun hasoru.

Prezidente Repúblika kompromete atu nafatin hala’o diálogu hodi rona hanoin husi lider no sidadaun sira atu ita hotu hamutuk lori polítika dezenvolvimentu  ba  povu tomak nia bem-estar no justisa sosial. Ba Povu no Nasaun nia di’ak, Prezidente Repúblika sei halo esforsu hotu-hotu.  (cao)

Please follow and like us:

NOTÍSIA FOUN

Site Statistics

  • Users online: 0 
  • Visitors today : 171
  • Page views today : 194
  • Total visitors : 238,366
  • Total page view: 344,320