Notísia foun


DILI—Membru FALINTIL-Forsa Defeza Timor Leste (F-FDTL) ida ho inisiál DDS hatais farda kompletu ba diskuti malu no tolok diretór jerál no nasionál sira iha Ministéru Ensinu Superior, Siensia no Kultura (MESSK), tanba nia oan la asesu ba Universidade Nasionál Timor Lorosa’e (UNTL).

Tuir kronolojia ne’ebé haktuir husi fonte Timor Post katak, membru ne’e ba iha minisériu dala rua hodi hasoru malu ho diretór sira. Bainhira diretór sira simu membru ne’e no iha sorumutu iha loron Kinta (06/02/2020), membru ne’e fó opsaun tolu ba diretór sira.

Opsaun ne’ebé membru afirma maka; dahuluk, nia husu atu diretór sira lalika fó esplikasaun ba nia no nia hakarak rona de’it husi diretór sira katak nia oan liu ou la’e ba UNTL; daruak, nia husu atu diretór sira buka solusaun ba saida maka nia kestiona; no datoluk, nia afirma prontu ba komarka bainhira opsaun rua uluk la hetan resposta tuir nia hakarak, tanba nia ameasa lori ema ba sunu tiha edefísiu MESSK.

Rona tiha opsaun ne’ebé membru ne’e ko’alia ho lian kro’at ba diretór sira, diretora jerál MESSK maka halo resposta hodi tenta esplika kona-ba prosesu selesaun ba kandidatu estudante sira, maibé membru ne’e simu hasoru kedas hodi dehan, sistema ne’e ema maka halo, la’ós sistema maka….fali ita (membru ne’e hasai liafuan tolok).

Rona liafuan mal ne’e, diretora jerál mós simu hasoru kedas hodi husu ba membru ne’e atu ko’alia ho étika, se la’e maka nia parte la atende, maibé membru ne’e kontinua ko’alia hasoru no dehan nia veteranu terus iha ailaran iha direitu, la’ós ema ne’ebé la terus ba rai ne’e maka hanaran-an veteranu no iha fali direitu asesu ba UNTL. Nune’e, maka ikus mai diretora jerál hamriik kedas husi sala reuniaun hodi lakohi atende membru ne’e.

Fonte Timor Post haktuir, bainhira situasaun ne’e mosu iha sala reuniaun ne’e halo diretor sira halo servisu ho la hakmatek durante loron hirak ikus ne’e. Tanba fonte ne’e haktuir tan katak, ema ne’ebé levanta kestaun hanesan barak maka sempre ba husu klarifikasaun iha MESSK, maibé bainhira hetan esplikasaun, sira ida-idak fila no la halo problema.

Maibé fonte ne’e hatete, ba membru F-FDTL inisiál DDM nia atetude ne’e, dirizente sira hato’o ona relatóriu ba Ministru Ensinu Superior, Siensia no Kultura (MESSK) Longuinhos dos Santos. No tuir informasaun Ministru Defeza no Ministru Interior Interinu, Filomeno Paixão mós simu ona informasaun kona-ba akontesimentu ne’e.

Entretantu tuir regra ne’ebé iha, estudantes ho rejime espesial diferente ho sira rejime jerál, tanba especsal asesu ba UNTL la tuir teste.

Rejime espesial ne’e oferese ba martires, veteranus, estudantes ne’ebé ho valór a’as, membru F-FDTL, PNTL, funsiunáriu públiku , ema ho defisiénsia inklui sira ne’ebé iha talentu iha arte no kultura i mós iha desportiva hodi sira bele reprezenta UNTL partisipa iha eventu nasional no internasional.

Iha tinan 2020 ne’e, kandidatu estudante hamutuk na’in 4.211 maka hetan aprovasaun hodi asesu ba UNTL. Husi númiru ne’e, na’in 195 maka asesu ba Institutu Politékniku Betano ne’ebé pretense mós ba universidade públiku.

Entretantu totál kandidatu estudante ne’ebé la hetan aprovasaun asesu ba UNTL iha tinan 2020, hamutuk na’in-17.849.

Estudante ne’ebé asesu ba UNTL ho rejime jerál hamutuk 3.045, rejime espesiál kategoria ba oportunidade 584, inklui F-FDTL, PNTL, Defisiente, Veteranu, Desportista hamutuk na’in 387; husi total 4.016.

Sira ne’ebé asesu ba Institutu Politékniku Betano (IPB) husi rejime jéral 156, rejime espesiál kategoria oportunidade hamutuk 19 inklui F-FDTL, PNTL, Defisiente, Veteranu, Desportista hamutuk na’in 20.

Prosesu selesaun ne’e realiza liuhusi aprovasaun diploma ministérial númeru 20/2019 iha loron 7 Agostu. (cao)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 442
  • Page views today : 609
  • Total visitors : 78,953
  • Total page view: 110,676

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur