Notísia foun


DILI—Xefe Estadu Maior Jeneral FALINTIL Forsa Defeza Timor Leste (F-FDTL), Maijor Jenerál Lere Anan Timur prefere hakotu impase polítika dadauk ne’e liuhusi dalan diálogu entre líder katuas sira liuliu líder sira husi frente armada nian.

Lere dehan, diverjénsia polítika atuál mai husi líder sira frente armada nian. Tanba ne’e, sira mak tenke buka malu liuliu Francisco Guterres Lú Olo ho Taur Matan Ruak atu tau lai kargu nu’udar prezidente repúblika no primeiru ministru hodi buka tuir Kayrala Xanana Gusmão nu’udar maun boot no aman ba sira hotu.

“Ita nia maun Xanana, maun ne’e maun ona, aman ne’e aman ona, ita labele fila fali ba ita nia alin. Ida ne’e prinsípiu ida ne’ebé ita tenke ka’er metin. Sé nia (Xanana) maun, la’ós maun mak mai buka fali alin,” Lere afirma kestaun ne’e iha Salaun Don Bosco Lospalos, bainhira halo diálogu ho komunidade sira, iha loron hiak liu ba.

Lere haktuir, nia rasik ko’alia ona ho Prezidente Repúblika Francisco Guterres Lú Olo ho Primeiru Ministru Taur Matan Ruak atu labele konsidera Xanana hanesan inimigu polítiku ida.

“Ha’u hatete ba prezidente, ita boot prezidente, Taur primeiru ministru, mas Maun Xanana haree imi ne’e la’ós. Imi mai husi ailaran nian, entaun halo oinsá, imi mak ba buka. Imi nia pasta be prezidente ho primeiru ministru ne’e tau tia iha gaveta, tún ba buka imi nia aman, imi nia maun. Mas imi mós hakarak dehan ha’u mós ha’u, Xanana mós la’ós inimigu, nia mós polítiku ida hanesan mós imi,” Lere subliña.

Nia hatutan, uluk iha ailaran líder sira unidade tebes hodi luta kontra inimigu no konsege duni liberta patria. Tanba-sá ohin loron problema kiik ida hatudu líder sira la fó liman ba malu, ne’e la hatudu ejemplu ba jerasaun foun sira.

“Uluk ita hakuak malu, hadomi malu, ita rona malu, ohin loron buat ida ke fasil, osan iha, karreta no AC iha, ita haree malu la fó liman ba malu. Tanba ne’e, ita nu’udar sidadaun, timoroan, nu’udar líder, tenke leal. Lealdade ne’e prinsipal. Ita iha mundu ne’e sala na’in, maibé labele sai traidor. Sala na’in ne’e sala na’in, maibé traidor ne’e mak labele akontese hanesan Judas trai Jesus,” Lere hatutan tan.

Líder hirak ne’ebé nia temi no sira seluk tan iha situasaun polítika atuál tenke ko’alia nakloke ba malu ho fuan no laran moos.

“O tenke iha oin ko’alia momo’os, fuan moos, klamar moos ba o nia maluk, o nia líder sira. Ida ne’e mak dehan lealdade,” Lere hatete.

“Ita hamutuk iha forsa, tau forsa hamutuk,” Maijor Jenerál ne’e salienta. (cao)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 165
  • Page views today : 217
  • Total visitors : 78,171
  • Total page view: 109,528

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur