Notísia foun


DILI—Emprejáriu sira ne’ebé halibur an iha Kámara Komérsiu Indústria Timor Leste (CCI-TL sigla Portugués) la ko’alia kona-ba projeitu 143 ne’ebé maioria governu seidauk selu no sai nu’udar fukun ida iha diskusaun jeneralidade molok Orsamentu Jerál Estadu (OJE) 2020 nian sumba iha parlamentu nasionál iha loron 17/01/2020.

Timor Leste tama iha situasaun politika manas liu tan no hatur estatutu impase polítika hafoin deputadu sira husi bankada CNRT ne’ebé hamutuk ho PLP ho KHUNTO forma governu daulau la a favor ba proposta OJE 2020 nian ne’ebé aprejenta husi Primeiru MInistru Taur Matan Ruak hodi rejulta orsamentu tinan fiskal ne’e nian sumbadu.

Iha diskusaun deputadu CNRT lansa kritika maka’as hasoru governu inklui projeitu 143 ne’ebé to’o agora maioria governu seidauk selu hodi fó impaktu negativu tebes ba emprejáriu nasional sira.

“Ida ne’e (projeitu 143) la’ós assuntu para ita ko’alia. Ida ne’e ha’u hanoin laiha ligasaun,” Prezidente CCI-TL Oscar Lima hatete ba Jornalista sira, Segunda (03/02/2020), iha Palásiu Prezidensiál, Bairro-pité, Dili, hafoin reprejenta emprejáriu nasional sira ho nia estrutura, kumpri konvite Prezidente Repúblika Francisco Guterres Lú Olo nian hodi ba fó hanoin kona-ba solusaun sira hakotu impase polítika.

Hafoin sorumutu ba Jornalista sira, Oscar Lima subliña, iha sorumutu ho prezidente repúblika sira hato’o opiniaun lubuk ida no lakohi atu akontese tan eleisaun antesipada daruak iha Timor Leste tanba ekonomikamente povu moris terus hela tanba laiha dezenvolvimentu nasionál, no seitór privadu sira moris susar tebes.

Maske nune’e, Oscar Lima dehan, hanesan timoroan no emprejáriu nasional fó hanoin hirak ne’e, maibé prezidente repúblika mak iha kompeténsia foti desizaun ikus husi diálogu ne’ebé la’o hodi hakotu impase polítika ne’ebé la’o.

Entretantu molok OJE 2020 sumba iha parlamentu nasional tanba bankada CNRT la fó votus a favor, iha diskusaun jeneralidade, deputadu sira husi bankada CNRT lansa krítika maka’as hasoru governasaun Aliansa Mudansa ba Progresu (AMP) lideradu Primeiru Ministru Taur Matan Ruak, inklui to’o agora governu seidauk rejolve polémika projetu 143 ne’ebé fo impaktu maka’as tebes ba kompania sira balun taka no hamosu problema sosiál iha família husi kompania nain sira nia uma laran, tanba sira iha deve barak no ema tenke sita sira nia ekipamentu no patrimóniu sira.

“Kompañia mak bele deve governu la’ós goernu mak deve fali kompañia, sai to’o kompania moris ladi’ak, fa’an uma, karreta no seluk tan, balun divórsiu ho sira nia ferikoan,  tanba ita binga to’o agora seidauk halo pagamentu ba projeitu. Orsamentu iha tanba saida mak labele selu ona,” afirma depuadu CNRT, Domingos Carvalho de Araújo iha nia intervensaun iha debate OJE 2020 ba loron daruak iha Parlamentu Nasionál.

Hirak ne’e hotu tuir deputadu Domingos, tanba membru governu seidauk kompletu, obriga membru governu ida kaer pasta rua to’o haat, aumenta tan membru governu balun halimar ho sira nia kompeténsia, liuliu sita ministru balun la marka prezensa iha audénsia públika ba orsamentu jeral estadu 2020 nian iha komisaun C parlamentu nasionál.

Tanba ne’e, Deputadu CNRT ne’e husu ba Primeiru Ministru Taur Matan Ruak atu bainhira mak halo remodelasaun tanba nia parte sente kleur liu ona.

“Atu halo remodelasaun ne’e bainhira, señor primeiru ministru ami hakarak hatene, remodelasaun ida ne’e mós labele iha governu de’it maka halo, maibé ita AMP tenke tuur hamutuk par abele halo remodelasaun ida ne’e, tanba ita haree kleur demais ona, i ita la’o nafatin hela ho meza ain tolu,” Domingos subliña. (cao)

 

Please follow and like us:

NOTÍSIA FOUN

Site Statistics

  • Users online: 4 
  • Visitors today : 1,639
  • Page views today : 2,403
  • Total visitors : 83,612
  • Total page view: 117,446

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur