Notísia foun


DILI—Sekretáriu Jerál FRETILIN, Marí Bim Amude Alkatiri nia deklarasaun hafoin eleisaun antesipada liu ba iha CCF katak, FRETILIN sei la sai ai-tonka ka kabidi ba sé de’it, to’o agora sei prevalese. Tanba ne’e, liga ho situasaun atuál FRETILIN husu ba militante no simpatejante hotu atu labele monu ba rumoris ka buatus sira.

Ho permisaun Alkatiri nia, Adjuntu Sekretáriu Jerál FRETILIN José Reis fo sai mensajen ba militante no simpatejante hotu atu akompaña ho hakmatek prosesu ne’ebé prezidente repúblika hahú dadaun tuir dalan diálogu ho líder partidu polítiku ho entidade hotu hodi buka solusaun.

“Husu atu labele tolan rumoris ka buatus oioin ne’ebé ema seluk so’e ho intensionál atu sobu ita no dezagrega sosiedade tomak. Husu atu fi’ar ba lideransa FRETILIN hodi fó kontribuisaun ho ulun fatuk malirin ba situasaun ida ne’e,” José Rein subliña iha nia mensajen ne’ebé Timor Post asesu, Kinta (23/01/2020).

“Sekretáriu Jerál FRETILIN hatete tiha ona bainhira eleisaun antesipada 2018 katak, FRETILIN sei la sai ai-tonka ka kabidi, ne’e sei prevalese,” José Reis reafirma.

Nia mós informa ba militante no simpatejante hotu katak, to’o agora Sekretáriu Jerál FRETILIN seidauk hasoru malu ho líder partidu polítiku sira seluk inkuantu diálogu ho prezidente repúblika sei la’o hela.

“Karik solusaun ne’ebé sei mosu ba harii governu foun, só aliansa foun husi partidu mais votadu ne’ebé propoin maka bele determina xefe governu. Nune’e ita bele hahí no respeita votus povu nian ka respeita lejitimidade demokrátiku,” José Reis deklara.

Entretantu Prezidente Repúblika halo mapa diálogu ho partidu polítiku sira hodi buka solusaun no hakotu impase polítika naruk iha rai laran, iha ne’ebé sai manas liu tan bainhira proposta lei Orsamentu Jerál Estadu (OJE) 2020 ne’ebé Primeiru Ministru Taur Matan Ruak ho membru governu sira aprejenta, sumba iha parlamentu nasionál.

Prezidente Repúblika sei kontinua hala’o ronda diálogu ne’ebé hahú ona ho CNRT, KHUNTO, Koligasaun UDT/Frente Mudansa to’o 4 Fevereiru 2020.

Tuir ajenda, Prezidente Repúblika sei rona solusaun konkretu ba situasaun polítiku-konstitusionál husi dirijente partidu no lider bankada sira husi Partidu Libertasaun Popular (PLP) no Frente Revolucionária Timor-Leste Independente (FRETILIN), no tuir mai ho PD no PUDD.

Entretanu Primeiru Ministru Taur Matan Ruak afirma, koligasaun Aliansa Mudansa ba Progresu (AMP) ne’ebé forma husi CNRT, PLP ho KHUNTO hodi forma governu daualu laiha ona, tanba nia konsidera CNRT maka hamate ona iha loron Sesta (17/01/2020) bainhira rejeita Orsamentu Jerál Estadu (OJE) 2020 nian iha Parlamentu Nasionál.

“AMP laiha ona. Desizaun saida de’it (husi prezidente repúblika) ha’u prontu para kontinua apoiu,” afirma Taur Matan Ruak hafoin hasoru malu ho Prezidente Repúblika, Francisco Guterres Lú Olo, Segunda (20/01/2020), iha Palásiu Prezidensiál, Bairro-pité, Dili.

Ba Jornalista sira Taur hatete, lolo’os AMP iha komprimísu tolu ne’ebé importante maka, ida programa tenke pasa, orsamentu tenke pasa, lei sira estrurante tenke liu. Maibé saida mak akontese, CNRT la kumpri komprimísu ida ne’e.

“Orsamentu la liu tanba CNRT maka kontra, Deputadu CNRT sira mak baku mate tiha AMP iha Sesta feira ne’e,” Taur hatutan.

“Ha’u la hatete traisaun, tanba diskursu xefe bankada CNRT nian ne’ebé hatete, pimeiru tanba kandidatu CNRT nian na’in hitu ne’ebé prezidente repúblika la fó posse, segundu tanba primeiru ministru sobu sistema,” Taur hatete.

Entaun hanesan karreta ida karik prezidente hasai tiha roda ida, primeiru ministru sobu tiha kadeira iha karreta laran, deputadu CNRT sira mak dudu monu tiha karreta no sunu.

“Ha’u husu deskulpa ba lideransa CNRT nian, PLP nian no KHUNTO nian, ba militantes no simpatejante sira ne’ebé servisu mate-an para AMP ne’e akontese, mas infelizmente deputadu CNRT sira baku mate tiha AMP,” Taur lamenta.

“Ida sobu roda ne’e mak sala ka ida sobu de’it kadeira ne’e mak sala ka ida sunu karreta ne’e mak sala. Ne’ebé responsabilidade tomak ba deputadu CNRT nian ba iha parlamentu nasional, sira mak sobu AMP, i ha’u hanesan primeiru ministru ha’u ondradu ba konvites AMP liuliu CNRT para lidera governasaun ida ne’e, ha’u agradese ba apoiu hotu, so-ke ha’u hakarak hatete ba deputadu sira katak, ha’u la gosta presaun no sabutajen,” Taur afirma tan.

Maske nune’e, Taur dehan, hanesan veteranu ida kontinua optimista katak ba timor solusaun sempre hetan.

“Problema iha, solusaun tenke iha, kadiadu iha, xave iha. Agora ita tenke fera ulun.

Tanba ne’e, Taur kontinua apela ba populasaun tomak atu kontinua túr hakmatek.

Entretantu Parlamentu Nasionál halo ona votasaun ba proposta lei Orsamentu Jerál Estadu (OJE) ba tinan fiskal 2020 ne’ebé aprejenta husi Primeiru Ministru Taur Matan Ruak ho nia membru governu sira, ho votus a favor 13, kontra 15 no abstensaun 25.

Membru sira husi partidu CNRT ho KHUNTO afirma sira nia pozisaun hanesan ba destinu Aliansa Mudansa ba Progresu (AMP) ne’ebé tuir Primeiru Ministru Taur Matan Ruak, fahe malu ona tanba proposta Orsamentu Jerál Estadu (OJE) 2020 nian ne’ebé nia parte propoen sumba iha parlamentu nasional, iha loron Sesta (17/01/2020).

Prezidente Konsellu Diretiva Nasional (CDN sigla Portugués), Dionísio da Costa Babo Soares, hatete, AMP harii husi partidu tolu, CNRT, PLP ho KHUNTO. Nune’e, partidu tolu ne’e seidauk iha desizaun ida kona-ba divórsiu.

” AMP seidauk deside buat ida, tanba ne’e ita sei servisu hanesan baibain. Laiha isu dehan katak ida ne’e no ida ne’e ba atu sai,” Dionísio ba Jornalista sira iha Palásiu Governu, Dili, Tersa  (22/01/2020).

Ministru Negósiu Estranjeiru no Kooperasaun (MNEK) ne’e husu atu Jornalista sira halo konfirmasaun ne’e iha SekretáriuJerál AMP nian, tanba hanesan ministru nia la ko’alia barak kona-ba assuntu polítiku nian.

Entretantu Deputadu husi bankada KHUNTO atuál Vise Daruak Prezidente Parlamentu Nasionál, Luis Roberto la rekoñese deklarasaun Taur Matan Ruak ne’ebé hatete AMP laiha ona, tanba kestaun ne’e pretense ba koligasaun la’ós kompeténsia Primeiru Ministru nian.

Luis dehan, Taur nia deklarasaun ne’e fó sai bainhira ba hasoru prezidente repúblika nu’udar primeiru ministru la’ós hanesan Prezidente ba PLP.

“Ha’u nia konsiderasaun haree ba deklarasaun primeiru ministru nian nu’udar xefe governu la’ós hanesan presidente do partido,” Luis hatete ba Jornalista Timor Post iha Parlamentu Nasionál, Tersa (21/01/2020).

Nia dehan, situasaun polítika atuál, nia parte kontinua entrega ba primeiru ministru ho prezidente repúblika atu buka solusaun di’ak liu nune’e bele hakotu ona impase polítika iha rai laran no konsentra ba dezenvolvimentu nasionál.

“Bele interpretasaun públiku ninian relasiona ba iha ita nia primeiru ministru atual agora ko’alia, ema bele interpreta prezidente partidu mak ko’alia más ba ha’u nu’udar membru parlamentu konsidera ida ne’e nu’udar primeiru ministru mak ko’alia,” Luis hatutan.

Nia dehan, deklarasaun Taur nian kona-ba AMP bele mós tanba haree ba proposta orsamentu jeral estadu sumba iha parlamentu nasional hatudu ona AMP naksobu ona. Maibé nia reafirma, AMP to’o agora sei eziste hela.

To’o notísia ne’e públika, Jornalista Timor Post seidauk konsege halo konfirmasaun ho polítiku sira husi PLP nian.(cao)

Please follow and like us:

NOTÍSIA FOUN

Site Statistics

  • Users online: 2 
  • Visitors today : 1,342
  • Page views today : 2,270
  • Total visitors : 74,274
  • Total page view: 103,528

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur