Notísia foun


DILI—Sekretáriu Jerál Partidu FRETILIN, Marí Bim Amude Alkatiri, Segunda (20/01/2020) lidera reuniaun ho deputadu sira husi bankada FRETILIN iha Komité Sentral FRETILIN (CCF sigla Portugués), Komoro, Dili.

Ba Jornalista sira hafoin reuniaun ne’e, Alkatiri ba jornalista sira lakohi fó komentáriu kona-ba assunsu saida mak ko’alia iha reuniaun ne’e.

“Ha’u lakohi komentáriu tanba enkontru internal,” Alkatiri hatete ba Joralista sira.

Observasaun direita husi Jornalista Timor Post haktuir, partisipa iha enlontru ne’e kompostu husi

deputadu Aniceto Guterres, Francisco Miranda Branco, David Dias Ximenes ‘Mandate’, Fabião de Oliveira, Marito Mota, Maria Rangel dos Reis, Helena Martins Belo, Nélia Menezes, Noemia Sequeira no deputada sira seluk.

Partisipa iha reuniaun ne’e mós Prezidente Kámara Komérsiu no Industria Timor-Leste (CCI-TL), Oscar Liman, no militante FRETILIN balun.

Entretantu observasaun Jornalista Timor Post iha Parlamentu Nasionál hafoin Proposta lei Orsamentu Jerál Estadu (OJE) 2020 nia sumba ka la pasa iha loron Sesta (17/01/2020), deputadu sira la mosu iha uma fukun ida ne’e.

Observasaun to’o iha bankada ida-idak iha parlamentu nasional mós laiha deputadu no balun odamatan xave hela.

Entretantu Parlamentu Nasionál halo ona votasaun ba proposta lei Orsamentu Jerál Estadu (OJE) ba tinan fiskal 2020 ne’ebé aprejenta husi Primeiru Ministru Taur Matan Ruak ho nia membru governu sira, ho votus a favor 13, kontra 15 no abstensaun 25.

Ho nune’e, proposta ne’e la pasa, signifika proposta ne’e la hakat ona ba espesialidade. No tuir konstituisaun, governu sei iha oportunidade ba dala ida tan hodi aprejenta hikas proposta foun ba OJE 2020 nian. Maibé bainhira la aprova tan maka konstituisaun fó kompeténsia ba Prezidente Repúblika dissolve Parlamentu Nasional ho hakat ba eleisaun antesipada.

Tuir observasaun jornalista, deputadu maioria husi bankada CNRT maka vota abstensaun, FRETILIN kontra hotu, PD balu vota abstensaun no a favor.

Iha intervensaun ikus husi Primeiru Ministru Taur Matan Ruak afirma, nia simu desizaun parlamentu nasional nian no nia governu kontinua prontu atu la’o nafatin ho duodésimu, maske nia triste ho desizaun ne’e tanba iha implikasaun ba situasaun ekonomia no sosial iha Timor Leste.

“Situasaun iha parlamentu nasional hatudu dala ida tan katak, jestaun ita nia nasaun nian iha difikuldade atu lori hodi tuir dalan ne’ebé loos. Siuasaun ida ne’e loke dala ida tan ba ita nia pais atu tuir dalan orsamentu duodésimu,” Taur subliña.

Deputada husi bankada KHUNTO Olinda Guterres iha nia intervensaun afirma, nia arepende ho desizaun CNRT nian hodi la halo liu proposta OJE ne’e. Nia dehan, ba oin nia partidu dúvida boot atu hamutuk iha koligasaun ne’ebé hanesan.

Iha deklarsaun votu, Prezidente PD, Mariano Assanami Sabino hatete, nia rasik vota a favor ba OJE 2020 ho nia konsiénsia rasik hanesan deputadu no la reprejenta partidu.

Deputadu sira husi FRETILIN afirma, husi rejultadu desizaun ne’e mak hatudu desizaun polítika ne’ebé obriga jerasaun tuan sira atu tur hamutuk hodi hakotu inserteja polítika iha rai laran.

Deputadu husi PLP sente triste tanba proposta OJE ne’e la pasa, maibé sira fi’ar ba oin sei iha solusaun di’ak liu. (kyt/ato/cao)

Please follow and like us:

NOTÍSIA FOUN

Site Statistics

  • Users online: 5 
  • Visitors today : 945
  • Page views today : 1,184
  • Total visitors : 84,792
  • Total page view: 118,991

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur