Notísia foun

Dili, EAST TIMOR: East Timorese Presidential candidate Avelino Coelho of Timor Socialist Party listens during a joint press conference in Dili, 11 April 2007.Five candidates contesting East Timor’s presidential election filed a formal protest 11 April saying the poll was not fairly conducted, and that counting should be stopped immediately. AFP PHOTO/ADEK BERRY (Photo credit should read ADEK BERRY/AFP via Getty Images)

DILI—Jurista senior timor-oan Avelino Coelho afirma, iha posibilidade barak no opsaun sira ne’ebé bele hakotu situasaun polítika atuál nune’e, ba eleisaun antesipada seidauk iha dalan tanba lei la dehan labele lori fali proposta Orsamentu Jeral Estadu (OJE) foun ba PArlamentu Nasionál.

Posibilidade no opsaun sira ne’ebé bele akontese hafoin governu daualu nia proposta OJE ba tinan 2020 nian sumba iha parlamentu nasional, maka bele iha entendimentu polítiku entre partidu sira iha parlamentu nasional hodi reajusta estrutura governu no bele iha kriasaun governu foun (governu dasia) ida hodi aprejenta hikas proposta OJE foun ba tinan fiskal 2021 nian.

“Lei la dehan labele lori fali orsamentu jeral estadu ba parlamentu nasional, maibé governu bele funsiona nafatin ho orsamentu duodésimu, governu prepara fali orsamentu jeral estadu ba tinan 2021 nian iha fulan outubru 2020,” subliña Avelino Coelho ba Timor Post via telefone, Domingu (19/01/2020).

Kazu atuál, Avelino hatete, prezidente repúblika bele ko’alia ho partidu sira iha parlamentu nasional, tanba tuir nia eleisaun antesipada sei la akontese tanba eleisaun ba parlamentu, iha governu partidu sira bainhira túr hamutuk hodi bele hanoin fali estrutura governu ida ne’ebé maka di’ak liu.

Avelino dehan, problema agora ne’e maka laiha entendimentu entre partidu sira koligasaun ho partidu sira la iha koligasaun, ne’e maka hamosu situasaun ida dada malu ne’e.

“Ha’u dehan eleisaun antesipada sei la rejolve problema. Entendimentu entre partidu sira sei di’ak liu para ultrapasa tiha situasaun ne’e atu Timór labele paralizadu iha prosesu dezenvolvimentu nasionál,” Avelino hatutan.

Kona-ba intrepretasaun sira iha públiku inklui husi jurista seluk ba Konstituisaun RDTL artigu 86 alinea F, Avelino hatete, ne’e aplika ba kuandu formasaun governu. Katak, artigu ne’e ho nia forma kontiudu dehan karik iha krize institusional ke labele permite formasaun governu ka aprovasaun orsamentu jeral estadu, prezidente konsulta partidu sira asentu iha parlamentu bele dissolve parlamentu nasional.

Iha kazu atuál, jurista ne’e salienta, governu forma ona ho nia programa no lori orsamentu 2020 nian ba parlamentu mak la liu, ne’e governu bele funsiona ho orsamentu duodésimu, esperiensia iha 2017 prezidente aplika artigu 86, maibé ne’e tanba iha formasaun governu nia laran.

Katak, governu daualu durante periodu ida ne’e bele ba fali parlamentu nasional hodi husu nafatin orsamentu duodétimu to’o 2021.

Maske nune’e, Avelino dehan, nia respeita opiniaun jurista sira seluk nian, maibé iha kuadru legal ne’e ladun iha esplikasaun klean.

“Ita nia konstituisaun ne’e liberal i nakloke ba ema halo intrepretasaun,” Avelino hatete.

Entretantu, Parlamentu Nasionál halo ona votasaun ba proposta lei OJE ba tinan fiskal 2020 ne’ebé aprejenta husi Primeiru Ministru Taur Matan Ruak ho nia membru governu sira, ho votus a favor 13, kontra 15 no abstensaun 25.

Tuir observasaun jornalista, deputadu maioria husi bankada CNRT maka vota abstensaun, FRETILIN kontra hotu, PD balu vota abstensaun no a favor.

Iha intervensaun ikus husi Primeiru Ministru Taur Matan Ruak afirma, nia simu desizaun parlamentu nasional nian no nia governu kontinua prontu atu la’o nafatin ho duodésimu, maske nia triste ho desizaun ne’e tanba iha implikasaun ba situasaun ekonomia no sosial iha Timor Leste.

“Situasaun iha parlamentu nasional hatudu dala ida tan katak, jestaun ita nia nasaun nian iha difikuldade atu lori hodi tuir dalan ne’ebé loos. Siuasaun ida ne’e loke dala ida tan ba ita nia pais atu tuir dalan orsamentu duodésimu,” Taur subliña.

Deputada husi bankada KHUNTO Olinda Guterres iha nia intervensaun afirma, nia arepende ho desizaun CNRT nian hodi la halo liu proposta OJE ne’e. Nia dehan, ba oin nia partidu dúvida boot atu hamutuk iha koligasaun ne’ebé hanesan.

Iha deklarsaun votu, Prezidente PD, Mariano Assanami Sabino hatete, nia rasik vota a favor ba OJE 2020 ho nia konsiénsia rasik hanesan deputadu no la reprejenta partidu.

Deputadu sira husi FRETILIN afirma, husi rejultadu desizaun ne’e mak hatudu desizaun polítika ne’ebé obriga jerasaun tuan sira atu tur hamutuk hodi hakotu inserteja polítika iha rai laran.

Deputadu husi PLP sente triste tanba proposta OJE ne’e la pasa, maibé sira fi’ar ba oin sei iha solusaun di’ak liu. (cao)

Please follow and like us:

NOTÍSIA FOUN

Site Statistics

  • Users online: 4 
  • Visitors today : 1,080
  • Page views today : 1,389
  • Total visitors : 84,927
  • Total page view: 119,196

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur