Notísia foun


DILI—Deputadu husi bankada parlamentar Kmanek Haburas Unidade Nasionál Timor Oan (KHUNTO), atuál Vise Daruak Prezidente Parlamentu Nasionál (PN), Luis Roberto afirma, laiha rajaun hodi hatete katak laiha orsamentu maka dezenvolvimentu iha Timor Leste sei hakdasak  hela, tanba kada tinan parlamentu nasionál aprova Orsamentu Jerál Estadu.

Reprejentante povu ne’e hatete, sé orsamentu kada tinan iha hela maka justifika katak membru governu sira maka laiha kapasidade atu halo ejekusaun ho di’ak tuir planu no programa ne’ebé iha ona.

Tanba ne’e, Luis dehan, ba tinan 2020 parlamentu nasionál só halo de’it aprovasaun ba orsamentu jeral estadu tuir kapasidade ezekusaun membru governu sira nian.

“Orsamentu ne’ebé tinan-tinan ita preve iha OJE ne’e atu responde ba povu nia moris más oinsá atu bele responde duni ne’e fila fali ba kapasidade ezekusaun hosi membru governu sira ne’e rasik maibé, kuandu la iha kapasidade atu ezekuta entaun ida ne’e mak halo dezenvolvimentu iha baze kontinua la’o hakdasak,” Luis hatete ba Timor Post iha Parlamentu Nasionál, Segunda (13/01/2020).

Nune’e, deputadu ne’e husu ba membru governu sira bele halo ezekusaun ba orsamentu ho di’ak bainhira OJE 2020 pasa nune’e bele fó benefísiu ba povu rai doben ida ne’e.

“Ita kompara fali ho OJE 2019 ninian, montante ne’e tutuir malu de’it maibé povu kontinua halerik tanba ne’e husu para tinan ne’e governu bele hadi’a jestaun para bele ezekuta orsamentu ho di’ak,”Luis subliña.

Entretantu Governu liuhusi Konsellu Ministru aprova ona proposta Orsamentu Jeral Estadu (OJE) foun ba tinan 2020, iha loron Kinta (19/12/2019)  ho total billaun $1.6.

Total OJE ne’e, (despeza públika estimada tuir orden $1.668 millaun / millaun rihun ida atus-neen neen-nulu resin-ualu) inklui reseita ne’ebé mai husi RAEOA/ZEEMS, UE no Empréstimu, hodi kobre ba nesesidade tomak programa no prioridade nasional sira ne’ebé governu daualu define ona.

Husi valór ne’e, sei aloka ba saláriu no vensimentu $235,610, aloka ba bens no servisu $583,800, aloka ba transferénsia públika $328,206 no aloka ba capital dezenvolvimentu $31,488,837.

Proposta foun ne’e mosu tanba governu iha loron 6/12/2019 retira proposta inísiu ho total billaun $1.95 husi parlamentu nasional tanba haree ba nesesidade prinsipál husi orsamentu nian ba nasaun no preokupasaun husi deputadu sira Parlamentu Nasionál nian, hanesan hakerek iha relatóriu sira ne’ebé aprezenta ona.

Durante ne’e governu halo revizaun no halo versaun foun husi proposta ne’e no tuir ajenda haruka ba Parlamentu Nasionál iha loron 13/12/2019, maibe governu husu prolonga tempu maka sei haruka ba parlamentu nasional iha loron 19/12/2019. (ato/cao)

Please follow and like us:

NOTÍSIA FOUN

Site Statistics

  • Users online: 5 
  • Visitors today : 1,124
  • Page views today : 1,609
  • Total visitors : 80,376
  • Total page view: 112,690

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur