Notísia foun


DILI—Timoroan hotu iha direitu atu kandidata-an no sai Prezidente Repúblika (PR) iha periodu tuir mai maibé, tenke tau-án nu’udar aman ba nasaun la’ós aman ba partidu polítiku ka grupu kiik ida.

Dosente Fakuldade Siénsia Sosiál   iha Universidade Nasionál Timor Lorosa’e (UNTL), Júlio Aparício afirma, ba Timor Leste, kandidatu mai bele husi jerasaun tuan ka foun.

“Lider rezisténsia ka jerasaun foun importante mak tenke iha kapasidade atu sai aman di’ak ba ema hotu, labele rai tiha prezidente repúblika hodi halo fali interese partidu,” Júlio sublina ba Timor Post iha nia servisu fatin, UNTL, Tersa  (14/01/2020).

Akadémiku ne’e hatutan, Lere Anan Timur ne’ebé naran hahú mosu iha públiku liga ho kandidatu ba prezidente repúblika periodu tuir mai, bele de’it, importante maka kestaun ne’ebé nia levanta ona no tenke iha kapasidade naton.

“Maski lider rezisténsia kuandu la iha kapasidade (hakuak ema hotu), hanesan de’it,” Júlio dehan.

Hanesan akadémiku, nia husu atu kandidatu ne’ebé mak hakarak sai prezidente repúblika tenke hado’ok an hosi influensia polítika, nune’e bele garante estabilidade nasionál.

“Prezidente repúblika tenke hala’o kna’ar tuir konstituisaun haruka, la’ós ba sai tiha prezidente repúblika la akumula ema hotu, di’ak liu lalika obriga-án ba tanba bele estraga estabilidade nasionál,” Júlio salienta.

Entretantu Observadór Polítika husi UNTL, Camilio Ximenes hatete, timoroan ne’ebé de’it maka hakarak kandidata-an ba prezidente repúblika periodu tuir mai tenke hatudu-an ona atu públiku bele hare’e nia kapasidade no maturidade nu’udar aman di’ak ba nasaun.

Camilio ba Jornalista sira iha loron hirak liu ba katak, Lere Anan Timur poténsia ba prezidente repúblika tuir mai depende ba nia rasik hakarak ka la’e.

Entretantu atual Xefe Estadu Maior Jeneral FALINTIL-Forsa Defeza Timor Leste (F-FDTL), Maijor Jeneral Lere Anan Timur, fó resposta ba kontaktu sira kona-ba nia kandidatu ba Prezidente Repúblika iha periodu tuir mai seidauk klaru.

Lere dehan, sei fila ba vida polítiku hafoin mandatu hotu iha instituisaun defeza nian, maibé nia seidauk serteja kona-ba kandidatu ba prezidente repúblika.

“Atu kandidatu ba prezidente, Timor ne’e matenek barak, sira barak mai ko’alia ho ha’u, ha’u dehan ha’u seidauk hatete sai prezidente ka la sai prezidente no kandidatu ka la kandidatu,” Lere subliña ba Jornalista sira hafoin selebrasaun loron Komponente Navál F-FDTL badala-18, iha Kuartel Komponente Naval Hera, Domingu (12/01/2020).

Rajaun ne’e Lere fó sai tanba nia sei ativu hela hanesan militar.

“Ha’u agora ha’u sei militár. Mas kuandu ha’u sai husi vida militár ha’u sai polítiku duni,” Lere afirma.

Lere dehan, nia mandatu extende ona ba dala rua hodi lidera instituisaun F-FDTL no fulan Outubru tinan ne’e termina ona.

“Ami nia estatutu ha’u extende ona ba dala rua, oito anos. Sem dúvida fulan Outubru ne’e mak últimu mandatu. Últimu mandatu dala ruma polítiku sira mós iha diverjénsia. Primeiru, ha’u husu ba polítiku sira, ha’u la’ós boneka ida ou hanesan labarik ida ema halimar ho ha’u! Kuandu deside ne’e tenke iha konsensu, sai mós ho konsensu no hela mós ho konsensu. Ida ne’e mak ha’u husu,”  Lere hatete.

Lere hatete, iha futuru ema ne’ebé mak troka ninia fatin, tenke hatudu sentidu nasionalizmu, patriotizmu no lealdade ba estadu hodi lidera instituisaun F-FDTL.

“Aban bainrua se mak troka ami katuas sira ne’e, ami prepara ona balu ba hasai kursu iha rai Portugal, Australia no China. Sira ne’e preparadu ona, maibé la’ós sira preparadu ba nasionalizmu.

Agora sira nia nasionalizmu no patriotizmu tenke makaas no sira nia lealdade ba estadu, governu no leál ba malu mak tenke prinsipál. Tanba ita nia jerasaun foun sira ne’e arrogánsia, egoízmu no espíritu individual mak sei makaas.” Lider F-FDTL ne’e subliña.

Atualmente Prezidente Repúblika ba periodu 2017-2022 maka Francisco Guterres  Lú Olo. Xefe Estadu ne’e nia mandatu sei termina iha loron 20 Maiu 2022. (ato)

Please follow and like us:

NOTÍSIA FOUN

Site Statistics

  • Users online: 7 
  • Visitors today : 1,722
  • Page views today : 2,511
  • Total visitors : 83,695
  • Total page view: 117,554

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur