Notísia foun


DILI—Prezidente Repúblika Francisco Guterres  Lú Olo, hatete Estadu Timor Leste tenke promove ekonomia tasi liuliu iha tasi mane. Nune’e, presiza iha dezenvolvimentu integradu.

“Importante tebes ba Timor Leste promove ekonomia tasi nian tanba husi tasi ita bele kria kampu servisu barak liután ba ita nia ema,” Xefe Estadu hatoo lia hirak ne’e liu husi diskursu iha serimónia aniversáriu Komponente Naval ba-dala 18 iha Naval Hera, Domingu (12/01/2020).

Xefe Estadu dehan, haree ba realidade iha Timor Leste, kada tinan númeru  dezempregu aumenta no ida ne’e preokupasaun boot ida.

Tanba nia dehan, haree ba dezafiu no ameasa hirak ne’ebé akontese iha tasi, Timor Leste presiza haree ba seguransa nuudar kestaun koletiva ida ba nasaun hotu- hotu  iha rejiaun.

“Husi abordájen ne’e mak ita hamosu mekanizmu kooperativu ida entre nasaun sira iha rejiaun ,hodi responsde hamutuk ba ameasa sira ne’ebé akontese iha tasi,” Xefe Estadu ko’alia.

Lú Olo hatutan, nasaun ida de’it sei labele hatán mesak ba problema sira ne’ebé mosu ho relasaun ho tasi.

TL presiza estratéjia defeza marítima ida ne’ebé la’o ho diplomasia no ko’alia ho ibun mamar no matenek, nu’udar dalan atu ema hotu hases an no konflitus no hetan parseria estratéjiku hodi haburas Nasaun nia kapasidade, iha ámbitu seguransa kooperativa  marítima nian , ne’ebé bele involve nasuan viziñu sira, Indonézia Austrália, hodi servisu hamutuk parseriu estratéjiku iha tasi nune’e bele responde ba dezafiu sira iha TL nia tasi no rejiaun ne’ené TL hola parte ba.

“Ho nune’e ha’u hakarak salienta dala ida tan importansia atu harii modleu ida ba sistema nasionál autóridade marítima tuir realidade no rekursu  ne’ebé uitoan de’it ne’ebé bele hetan bebeik kolaborasaun husi entidade hothotu no instituisaun sivíl sira, militar no polisia, públiku ka privadu ne’ebé bele kontribui hodi hametin ita nia seguransa marítima,” tenik nia.

Xefe Estadu haktuir, modelu ida ne’ebé foka ba esplorasaun husi konseitu “duplu-uzu” iha operasaun seguransa tasi nian, hodi obriga Mariña atu iha mós kapasidade resposta iha área polisiamentu hodi hatuur lei no partisipa iha konflitu ne’ebé ho intensidade ki’ik.

Timor-Leste mós hola parte ona iha Programa Seguransa Marítima Pasífiku nian ne’ebé promove hosi governu Austrália, ho doasaun ró patrulla rua (2) ho tipu Ró patrulla ho klase Guardian,  ne’ebé, tuir planu, sei to’o iha Dili iha tinan 2023.

Nune’e mós nia dehan Timor-Leste iha prosesu hela atu envolve-an mós iha kooperasaun Trilateral entre Japaun, Indonézia no Timor-Leste, ne’ebé hare’e ba esperiénsia mesak nasaun illa de’it, ho hanoin ida de’it oinsá atu aprende, aproveita no asegura tasi.

“Timor-Leste iha ona fronteira-tasi definida ho Austrália, no iha prosesu hela atu defini fronteira-tasi ho Indonésia. Timor-Leste ninia  liña kosteira liu kilómetru atus hitu no iha Zona Ekonómika Eskluziva Marítima  ho milla naútika atus rua. Faktus sira ne’e obriga implikasun hosi meius sira atu ezerse ita-nia juridiksaun iha tasi. Tanba ne’e, importante tebes Estadu investe iha rekursus umanus, infranstruturas no ekipamentu adekuadu hodi garante ita-nia soberania iha tasi,” Xefe Estadu afirma.

Nune’e hanezan Xefe Estadu fiar katak esforsu tomak ne’ebé halo ona, no sei kontinua halo, husi Estadu inklui apoiu husi nasaun belun sira.

“ita bele ona kumpri Planu Estrátejiku Dezenvolvimentu Nasional-PEDN 2011-2030, ne’ebé dehan katak to’o tinan 2030, Komponente Navál iha treinamentu ho infrastrutura di’ak hodi asegura no proteje soberania tasi no mós partisipa iha exersísiu marítimu internasional,” Nia hakotu. (res)

Please follow and like us:

NOTÍSIA FOUN

Site Statistics

  • Users online: 3 
  • Visitors today : 779
  • Page views today : 1,175
  • Total visitors : 73,711
  • Total page view: 102,433

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur