Notísia foun


DILI—Bankada opozisaun FRETILIN preokupa katak prosesu urjenti nu’udar tentativa atu la fo’o tempu ba haree Proposta Orsamentu Jerál Estadu (OJE) 2020 foun ho klean.

Tanba ne’e, iha sesaun plenária loron, 23 Dezembru 2019, Bankada FRETILIN desidi la vota ba pedidu atu debate proposta Lei Orsamentu Jeral Estadu 2020 (OJE 2020) ho kategoria urjénsia, tanba fundamentu sira ne’ebé aprezenta husi governu daualu la konvinsenti no la justifika pedidu ne’e rasik.

Liuhusi komunikadu imprensa ne’ebé Timor Post assesu, haktuir mós, haree mós ba informasaun katak Primeiru Ministru Taur Matan Ruak foti ferias to’o loron 6 Janeiru, Bankada FRETILIN haree katak PM rasik ladun haree nesesidadi urjénsia ida ne’e.

Husi parte seluk mós, Bankada FRETILIN la konkorda ho argumentu husi Prezidenti em Exercicio, Parlamentu Nasional no Ministro Fidelis Magalhães katak proposta OJE 2020 ne’ebé foin hatama iha semana kotuk hanesan kontinuasaun ba prosesu ne’ebé hahu iha fulan Outubru foin liu ba.

Haree ba Leis no Regimentu Parlamentu Nasional ne’ebé vigora, bainhira Governu retira proposta dahuluk OJE 2020, proposta lei ne’e rasik la valido ona. Nune’e, proposta lei ne’ebé foin submete ba Parlamentu Nasional iha loron 19 fulan Dezembru 2019, nu’udar proposta lei foun no tenki tuir prosedimentu regimento Parlamento Nacional no Leis em vigor, hodi garanti katak membru parlamentu sira analiza no debate ne’ebé klean, ho atensaun no kuidadu ne’ebé nesesariu, atu nune’e labele husik liu irregularidadi balun.

Bankada FRETILIN haree mós katak tentativa husi VIII Governu, Meza Parlamentu Nasional no deputadu sira husi bankada Governu, atu ansi debate ba Proposta Lei OJE 2020, la’ós ho intensaun tanba hanoin nesesidadi povu, maibé atu la fo’o tempu atu membru parlamentu sira haree didiak ba dokumentu foun sira ne’e no atu koko taka falta balun ne’ebé Proposta Lei OJE 2020 bele iha, hanesan proposta ne’ebé retira.

Nune’e, Bankada FRETILIN hakarak deklara katak sei la sai nu’udar kumplisi ba tentativa sira atu halimar ho osan estadu tuir ema ida ka grupu ida nia hakarak de’it, maibé sei defende nafatin interese Estadu no Povu, no sei halo esforsu tomak atu estuda nafatin proposta OJE 2020 atu labele husik liu iregularidadi ka ilegalidade ruma. (*/cao)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 160
  • Page views today : 225
  • Total visitors : 80,827
  • Total page view: 113,353

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur