Notísia foun


DILI—Partidu CNRT nu’udar partidu hetan kadeira barak liu iha koligasaun AMP rejeita halo senáriu kona-ba proporsionalidade estrutura governu ne’ebé hahoris hamutuk ho partidu rua seluk PLP ho KHUNTO.

Iha koligasaun Aliansa Mudansa ba Progresu (AMP), CNRT iha kadeira 21, PLP 7 no KHUNTO iha kadeira 5. Partidu tolu ne’e forma governu daualu lideradu Primeiru Ministru Taur Matan Ruak husi PLP. Iha estrutura governu, membru governu indizitadu husi CNRT na’in 7 maka seidauk simu posse husi prezidente repúblika.

Relasiona ho CNRT nia pozisaun iha parlamentu nasionál ba orsamentu jerál estadu tinan fiskal 2020, ne’ebé primeiru ministru tenke retira proposta tanba la hetan apoiu husi CNRT rasik  ba montante orsamentu billaun $1.95, mosu pergunta ba partidu lideradu Xanana Gusmão ne’e halo senáriu kona-ba proporsionalidade estrutura governu.

Nune’e, deputadu CNRT nu’udar Prezidente Komisaun C iha Parlamentu Nasional, Adérito Hugo da Costa  iha entrevista 7 Minutos iha rttl.ep, iha loron 5/12/2019, afirma, CNRT atu kontribui la’ós kontráriu.

“Sé haree ba papel bankada CNRT nian, ho memoria institusional ne’ebé partidu CNRT iha, ita hotu akompaña katak, CNRT halo jestaun ba estadu ninia, lidera governu iha 2007 to’o governu atual, ami hakarak kontribui ba gia prosesu governasaun ne’e iha kanal ne’ebé mais responsavel, mais apropriadu,” Hugo hatan ba pergunta aprejentadora kona-ba karik CNRT halo senáriu kona-ba proporsionalidade estrutura governu.

“Puramente ami hakarak kontribui para dezeña orsamentu ida bazeia ba nesesidade povu nian, ita hakarak i espetativa povu nian aas tebes ba governu no estadu atu fó resposta kongkreta, maibé ita nia resposta ne’e tenke fazeada. Haree ba kapasidade ita nian rasik, i haree ba normas ne’ebé estabelese,” eis Prezidente Parlamentu Nasionál ne’e hatete.

“Ita hakarak tebes osan tenke ba povu, maibé oinsá kapasidade mákina estadu até baze, para depois ita haree osan ne’e sirkula duni,” Hugo subliña.

Entretantu iha fatin no oras la hanesan, Primeiru Ministru Taur Matan Ruak hafoin ba informa servisu governu nian ba Prezidente Repúblika, Francisco Guterres Lú Olo, hatete, saida mak akontese iha parlamentu nasional (iha loron 3/12/2019) hanesan oportunidade di’ak ida tanba responsabilidade hotu-hotu nian.

Taur dehan, governu iha senáriu rua de’it, ida foti fali orsamentu, ida obriga parlamentu vota kontra. Sekarik obriga parlamentu vota kontra, nia tetu, signifika tinan oin funsiona de’it duodésimu. La’ós ida ne’e mós se parlamentu vota maka iha momentu ne’eba mós governu bele monu. Nune’e mós se parlamentu vota loke re-aranju ambiente polítiku iha parlamentu.

“Entau entre obriga parlamentu vota kontra ou foti, entaun governu hili foti (retira),” Taur subliña ba Jornalista sira iha palásiu prezidensial, Bairro-Pité, Dili, Kinta (05/12/2019).

Tanba ne’e, Taur fó ona orientasaun ba membru governu sira atu koa orsamentu sukat ho kapasidade ejekusaun, katak, nia fó ejemplu se parlamentu nia kapasidade oituan ne’e koa to’o ida ne’e de’it. Sé fundu infraestrutura nia kapasidade to’o de’it pursentu 40 tenke koa, nune’e mós iha primeiru ministru rasik.

Maske nune’e, Taur dehan, kapasidade ejekusaun nunka sai hanesan padraun ida para atu bele kontrola elaborasaun orsamentu, ne’e hanesan oportunidade ida para impoen. “I ha’u nia hanoin tempu oin mai uza ida ne’e sai padraun ida, katak sé mak la implementa nia orsamentu hotu, la fó osan,” Taur hatutan.

So ke ida ne’e iha implikasaun ba programa governu nian. Taur dehan iha programa governu nian kresimentu ekonomia tenke pursentu 7, kontribuisaun governu ida ne’e pursentu 10 ba redusaun ki’ak, kontribui ba kria impregu rihun 60 kada tina, agora ita lori saida maka halo ida ne’e. Maibé umavez ke parlamentu deside ida ne’e entaun parlamentu mos toma responsabilidade.

Nune’e mós Taur dehan implika ba espetativa povu nian, povu hakarak eletridade, bele lalais maibé se hatun osan governu susar tebes. (cao)

Please follow and like us:

NOTÍSIA FOUN

Site Statistics

  • Users online: 5 
  • Visitors today : 1,403
  • Page views today : 2,249
  • Total visitors : 71,409
  • Total page view: 98,743

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur