Notísia foun


DILI-Vise-Ministru Obras Públika, Nicolau Lino Freitas Belo, prontu simu desizaun Primeiru Ministru nian bainhira iha remodelasaun.

Nicolau hatete katak remodelasaun ne’e kompeténsia Primeiru Ministru nian, nune’e, nu’udar membru governu ida iha oitavu governu konstitusional, prontu hodi simu desizaun hosi xefe governu nian.

“Ami ne’e lidera hosi Primeiru Ministru, ne’ebe se ha’u nia naran mós tama ba lista remodelasaun entaun ha’u prontu simu,” hatete Nicolau ba Timor Post iha Parlamentu Nasionál, segunda (02/12).

Nia hatete Primeiru Ministru mak bele halo avaliasaun nia membru governu sira. Nu’udar membru governu, katak Nicolau, tenke fuan boot hodi simu desizaun saida deit hosi xefe governu bainhira mosu remodelasaun.

Nia hatete, ema sempre kestiona knaar ministru no vise-ministru Obra Públika. Governante hosi partidu Kmanek Haburas Unidade Nasionál Timor Oan (KHUNTO) esplika  vise-ministru ne’e ninia papel mak atu bele hala’o servisu ajuda ministru nian.

“Ha’u nia papel mak oinsá atu ajuda ministru, tanba lei organika defini tiha ona katak kompeténsia propriu ne’e mak ministru,” hatutan nia.

To’o ohin loron Ministru Obras Públika delega ninia vise hodi hala’o gabinete inspesaun iha auditoriu.

Husu kona-ba ahi mate lakan ne’e, Nicolau afirma katak ne’e kompeténsia ministru nian, maibe nu’udar vise-ministru obras públika mos iha kompetensia atu hare ba problema refere.

“Ha’u nu’udar vise mós presiza haree problema ne’e saida? Maibé ha’u haree partikularmente oras ne’e dadaun ita halo hela manutensaun iha Dili,” dehan nia.

Nia hatete, MOP sei halo avaliasaun ba iha kompañia sira ne’ebé mak kaer ba manutensaun nian. Hare kompañia ne’ebé laiha kapasidade bele hasai hodi envolve fali kompañia seluk ne’ebé bele halo manutensaun ho di’ak. (oro)

Please follow and like us:

NOTÍSIA FOUN

Site Statistics

  • Users online: 6 
  • Visitors today : 426
  • Page views today : 523
  • Total visitors : 79,678
  • Total page view: 111,604

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur