Notísia foun


DILI— Vise-Xefe Estadu Maiór F-FDTL, Brigadeiru Jenerál Falur Rate Laek, rekoñese prosesu distribuisaun formuláriu rekrutamentu forsa foun nian ba iha munisípiu to’o suku faila.

Falur, hateten prosesu distribui formuláriu hotu ona iha segunda (25/11) semana kotuk, maibé agora problema komesa mosu.

“Ha’u hanoin ida ne’e faila ida, maibé ami rua Xefe Estadu Maiór Jenerál F-FDTL Major Jenerál Lere Anan Timur  haree ona no ami divulga bainhira problema mosu ami sei halo desizaun ruma,” Falur ba jornalista sira iha resintu Parlamentu Nasionál, kinta (28/11).

Falur informa katak foin lalais nia ba Baukau  haree problema komesa mosu. Ho problema hirak ne’e, komandu F-FDTL sei foti fali desizaun ruma nune’e kria fali kondisaun ba joven sira.

“Ami sei kria kondisaun nune’e joven sira labele desakredita fali ita nia xefe suku sira,” Falur ko’alia.

Tanba nia dehan, loloos prosesu rekrutamentu komisaun organizadora sira tenke orienta kedas halo teste husi suku nune’e minimiza problema.

“Maibé ho sala sira ne’e halo ita aprende nune’e mai fali labele akontese tan, tanba ema hotu hatene rekrutamentu ne’e limitadu ema atus neen (600) de’it agora sé fahe formuláriu ba kada suku ida 25 signifika ema 15 mill kompete.

Tuir nia, komandu F-FDTL sei tuur hamutuk ho ministru defeza hodi buka solusaun.

“Keixa barak mak ami simu ona mai husi foho liuliu iha husi Munisípiu Bobonaru, Baukau no seluk tan, maibé ami tenke aguenta   no ami sei fó solusaun,” hatete Brigadeiru Jeneral Falur Rate Laek.

Iha parte seluk, kona-ba formuláriu rekrutamentu ne’ebé distribui ba suku sira hotu iha territóriu tomak ne’e, xefe suku Liurai, postu administrativu Maubisi, munisípiu Ainaru, Antonio de Graça Araújo, informa suku ne’e to’o ohin loron seidauk simu informasaun ruma kona-ba distribuisaun formuláriu rekrutamentu F-FDTL kada suku 25 ne’e.

“Ha’u seidauk simu informasaun, tanba ema ruma seidauk lori formuláriu 25 mai ha’u nia suku,” katak xefe suku ne’e ba Timor Post iha nia servisu fatin Erbean, kuarta (27/11).

Lider komunitáriu suku ne’e hatete katak nia parte rona duni informasaun hosi ninia maluk sira katak tinan ne’e Ministériu Defeza liu hosi FALINTIL-Forsa Defeza Timor-Leste (F-FDTL), sei rekruta joven kada suku ida ema 25, maibé xefe suku ne’e rasik to’o ohin loron seidauk simu formuláriu rekrutamentu forsa foun ne’e.

“Ha’u nia suku ne’e izoladu liu, se informasaun ruma ami hetan ne’e, presiza ba Maubisi mak bele hatene, ami dook husi villa Maubisi,” dehan nia.

iha fatin hanesan, Serafín Pinheiro nu’udar joven ida iha suku ne’e dehan relasaun ho rekrutamentu fa forsa foun ne’e iha sira nia suku joven barak mak hein hela atu foti formuláriu F-FDTL, maibe realidade xefe suku rasik seidauk hatene no distribuisaun formuláriu seidauk to’o iha suku refere.

“Ha’u hein hela formuláriu ne’e dehan agora governu rekruta tan F-FDTL, maibé formuláriu seidauk to’o iha ami nia suku,” katak nia.

Tuir nia, juventude hosi suku ne’e ohin loron hein hela formuláriu rekrutamentu ho entuziazmu tebes ba rekrutamentu foun ne’e, tan ne’e husu governu liu-hosi parte kompeténsia atu distribui lalais formuláriu iha suku ne’e.

“Ha’u husu governu tenke haruka ona formuláriu ne’e rekrutamentu foun F-FDTL, tanba ami barak mak hein hela,” afirma nia. (res/yto)

Please follow and like us:

NOTÍSIA FOUN

Site Statistics

  • Users online: 0 
  • Visitors today : 978
  • Page views today : 1,380
  • Total visitors : 80,230
  • Total page view: 112,461

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur