Notísia foun

P&R: Idozu no COVID-19

Saida maka COVID-19?

COVID-19 maka moras ida ne’ebé kauza hosi virus corona foun, ne’ebé maka seidauk identifika iha ema. Iha kazu barak, COVID-19 kauza sintomas moderadu inklui mear maran, sente kolen, no isin-manas, maske nunee dala balun isin-manas ne’e la’os sintomas ba ema idozu balun. Sintomas moderadu seluk inklui, sente isin moras, inus metin, inus been, kakorok moras ka kabun-moras. Ema balun infetadu ho virus ne’e maibé la dezenvolve kualkér sintoma ne’ebé asosiadu ho COVID-19 no sira la sente moras. Maioria ema hotu rekupera hosi moras ne’e sein hetan tratamentu espesiál ruma. Ema nain ida hosi nain neen ne’ebé hetan COVID-19 mak hetan moras grave no dada iis araska.

Oinsá mak COVID-19 ne’e hada’et?

Kualkér ema ida bele hetan COVID-19 hosi ema seluk ne’ebé maka iha virus ne’e ona. Moras ne’e bele hada’et hosi ema ida ba ema seluk liuhosi turuk-oan ne’ebé sai hosi inus ka ibun, no da’et ba ema seluk, bainhira ema infetadu ne’e me’ar ka dada iis sai. Turuk oan hira ne’e bele monu fali ba sasan ka fatin balun ne’ebé besik ita. Ema seluk bele mós hetan moras ne’e tanba kaer fali sasan ka ba iha fatin sira ema infetadu kaer ona, no depois sira kaer fali sira-nia matan, inus no ibun. Ema mós bele hetan moras COVID-19 bainhira sira dada iis turuk-oan hosi ema infetadu ho COVID-19 bainhira ema infetadu ne’e me’ar ka fani.

Se mak iha risku dezenvolve moras grave?

Idozu, no ema ho kualkér idade ne’ebé maka iha ona kondisaun médiku ne’ebé eziste ona (hanesan, diabetes, tensaun alta, moras fuan, moras pulmaun ka kankru) moras hirak ne’e bele dezenvolve moras grave bainhira da’et ona COVID-19 kompara ho ema sira ne’ebé la’os idozu.

Iha ka lae, vasina, ai-moruk ka tratamentu ruma ba COVID-19?

Enkuantu iha remédiu hosi osidentál, tradisionál no uma nian balun bele halo ema sente konfortavel no alevia sintomas moderadu COVID-19 nian, maibé seidauk iha ai-moruk ne’ebé maka hatudu katak bele prevene ka kura moras ne’e. OMS la rekomenda halo tratamentu rasik ho kualkér ai-moruk, inklui antibiótiku, hanesan maneira prevensaun ka kura ba COVID-19. Maibé, agora daudaun iha teste klíniku balun ne’ebé ba ai-moruk tradisionál no osidentál nian. OMS mós esforsu makaas ba servisu hamutuk hodi dezenvolve vasina no ai-moruk hodi prevene ka kura COVID-19 no sei kontinua hodi fornese informasaun atualizada bainhira rezultadu peskiza ne’e disponivel.

Saida mak hau bele halo hodi prevene infesaun?

Atu prevene hosi infesaun, iha maneira lima mak ita bele halo tuir.

  1. Fase liman beibeik no moos didi’ak ho sabaun no bee no hamaran halo maran didi’ak

Bainhira ita fase liman beibeik sei hamate hotu virus sira ne’ebé belit iha ita-nia liman. Bele mós uza dezinfetante (hand sanitizer) hodi fase liman (karik produtu ne’e disponivel besik ita).

  1. Bainhira me’ar ka fani tenke taka ibun no inus ho liman sikun ka uza tixu

No keta haluha soe kedas tixu ba lixu fatin ne’ebé mak iha matan no fase liman ho sabaun no bee kedas. Halo nunee ita la’os de’it proteje ita-nia an no ema seluk hosi kualkér virus ne’ebé maka da’et liuhosi me’ar ka fani.

  1. Labele kaer matan, inus no ibun

Ita-nia liman ne’e kaer sasan no objetu barak (ezemplu, telemove, komputadór, odataman, meza, kadeira, volante motor, karreta, kapasete, no sasan no objetu sira seluk tan) ne’ebé maka bele kontaminadu ho virus. Se bainhira ita kaer fali matan, inus no ibun ho liman ne’ebé fo’er, ita bele hada’et fali virus ne’ebé belit iha liman hosi sasan no objetu sira ba ita-nia an.

  1. Mantein distánsia fíziku hosi ema seluk maizumenus metru ida ka liu

Se ita-nia autoridade saúde nasionál ka lokál sira halo ona regulamentu konfinamentu, importante tebes atu kumpri regulamentu ne’ebé hatuur ona. Bainhira halo ezersisíu sai hosi uma ida ne’e ida di’ak ba ita-nia saúde fíziku no mentál, maibé so halo ezersisíu bainhira regulamentu ne’ebé hatuur ona permite ita atu halo ezersisíu sai hosi uma. Bainhira ita lao sai, evita fatin públiku ne’ebé iha ema halibur malun, no mantein distánsia pelumenus metru ida ka liu hosi ema seluk. Evita halo vizita ba maluk/família/parente sira bainhira laiha nesesidade ruma. Se bainhira presiza duni halo vizita (ezemplu, kuidadór atu ajuda ho atividade lor-loron nian), husu ba bainaka sira atu haree beibeik ba sintomas hodi asegura katak sira laiha sintomas ruma bainhira vizita ita. Husu mós ba bainaka sira atu halo tuir asaun lima ne’e, inklui fase liman ho sabaun no bee ka uza dezinfetante antes sira tama ba uma laran.

  1. Hamoos no dezinfeta beibeik sasan no fatin sira ne’ebé ita kaer lor-loron

Importante tebes atu hamoos no dezinfeta beibeik sasan no fatin sira ne’ebé ita kaer lor-loron, hirak ne’e inklui – meza, odamatan, butaun lampu, kadeira, armáriu livru, haris-fatin, sentina, keyboard, torneira, jeleira, no fatin sira seluk tan. Bainhira sasan no objetu hirak ne’e fo’er lós, tenke hamoos uza deterjente ka sabaun no bee antes halo dezinfeta.

Saida maka idozu sira tenke halo hodi prepara an ba COVID-19 iha sira-nia komunidade?

Iha buat barak mak tenke halo hodi prepara an ba COVID-19 iha ita-nia komunidade.

Buka hatene kona-ba regra espesiál ne’ebé hatuur ona iha komunidade nia leet nunee mós ho servisu no fonte kredivél ba informasaun ne’ebé maka disponivel durante emerjénsia saúde (ezemplu, hosi Ministériu Saúde nia pájina sosiál média, OMS pájina sosiál media, apoiu sosiál no seluk-seluk tan)

Halo lista ba suprimentu báziku ne’ebé maka ita presiza ba pelumenus semana rua nia laran no koko atu sosa sasan hirak ne’e antes (ezemplu, hahan lata, produtu uma laran nian, ai-moruk, fos, minarai, fugaun nia tali, mina, modo no hahan sira seluk tan). Karik ita labele sai ba sosa mesak, bele husu ajuda família, viziñu sira atu ajuda sosa fodik sasan sira ne’ebé ita presiza.

Ko’alia ho pesoál saúde sira oinsá mak ita-nia nesesidade ba saúde durante COVID-19 ne’e bele jere ho di’ak. Ida ne’e inklui kansela apontamentu la urjente, bainhira moras ka presiza atu ko’alia kona-ba asuntu saúde nian ruma, koko atu telefone uluk antes halo vizita ba fasilidade saúde.

Karik ita presiza hetan suporta hosi ema seluk, tenke identifika ema ne’ebé maka ita fiar hodi bele fó suporta ba ita iha moris lor-loron no ba nesesidade sira seluk ita presiza maibé labele atu halo mesak. Tenke fó hatene ba ema ne’ebé suporta ita, kona-ba ita-nia nesesidade hotu, no oinsá mak sira bele ajuda bainhira ita presiza duni.

Se ita mak kuidadór primáriu ba ema seluk ne’ebé maka dependente (ezemplu, hein bei-oan, kaben moras, ka ho oan defisiénte), identifika ema ida ne’ebé maka ita fiar atu responsabiliza ka haree fali karik ita moras. Bele mós husu ba família/parente/viziñu sira ne’ebé haree malu diak ne’ebé maka bele ajuda durante situasaun hanesan ne’e.

Se iha ema barak mak hela iha uma, entaun karik posivel bele prepara kuartu ketak ida iha ita-nia uma atu nunee karik iha família ruma mak hatudu sintomas hanesan ho COVID-19 nian bele izola an hosi família sira seluk ne’ebé hela iha uma ida. Karik laiha espasu ka kuartu ba izola an, tenke kontaktu lider komunidade ka autoridade saúde lokál sira hodi buka fatin ka espasu ruma hodi bele izola an

Oinsá mak hau mantein saudavel iha moris lor-loron durante pandemia COVID-19?

Halo tuir pasu 10 tuirmai ne’e hodi mantein saudavel durante pandemia COVID-19.

Mantein atividade regulár no iha oráriu rutina ba lor-loron nian ba ita-nia an rasik, inklui deskansa ho oras adekuadu, han ai-han saudavel no halo ezersísiu ka atividade fíziku balun

Mantein kontaktu malu nafatin. Ko’alia ho família/kolega/parente sira lor-loron, liuhosi telemovel, telefone vídeo ka manda mensajen, liuhosi média sosiál, Whatsapp, Line, Viber no seluk-seluk tan. Utiliza tempu ida ne’e hodi halo atividade ne’ebé ita gosta.

Tenke ativu fizikamente lor-loron. Hamenus tuur kleur liu no halo oráriu lor-loron nian ne’ebé inklui ezersísiu pelumenus minutu 30. Tenke garante katak atividade ne’ebé halo ne’e seguru no apropriadu tuir ita-nia nivel fitness tuir indikasaun hosi pesoál saúde sira. Halo servisu uma-laran nian mós nu’udar maneira ida atu mantein ativu fizikamente, tuir klase ezersísiu online (ezemplu, Zumba, Yoga, Tai Chi, no seluk tan).

Hemu bee barak no konsumu ai-han saudavel. Hemu bee hodi mantein ita-nia la lakon líkidu, no ida ne’e ajuda haforsa ita-nia sistema imunidade no hamenus risku ba moras króniku no infesiozu sira.

Labele fuma no hemu tua/alkol. Fumadór sira iha tendénsia makaas liu atu sai vulneravel ba COVID-19 tanba fuma ne’e afeta kapasidade pulmaun nian no bainhira fuma ida ne’e aumenta posibilidade virus hada’et hosi liman ba ibun. Bainhira hemu tua/alkol ne’e la’os de’it estraga ita-nia toba maibe aumenta risku ba monu, halo fraku sistema imunidade, no iha efeitu adverse ho ai-moruk ruma ne’ebé ita hemu daudaun hodi trata moras ruma. Di’ak liu, labele hemu ka limite kuantidade bainhira hemu tua/alkol.

Lalika haree beibeik notísia kona-ba COVID-19 tanba ida ne’e bele halo ita tauk liután, estresse no bele dezenvolve ansiedade. Buka atualizasaun iha oras espesífiku ruma hosi fonte kredivel hanesan Ministériu Saúde, Sentru Integradu Jestaun Krize no Organizasaun Mundiál Saúde atu ita bele hetan informasaun no faktu ne’ebé loloos.

Halo atividade ne’ebé ita gosta ka aprende halo buat foun ruma. Ezersísiu kognitiva hanesan lee livru, ka halo palavra cruzada/sudoku ka atividade hanesan kuda ai-oan, ai-funan, no halo kantadeiru iha uma sorin sei halo ita-nia hanoin ne’e ativu nafatin no bele alevia ita-nia tauk no ansiedade.

Karik ita iha kondisaun saúde ne’ebé eziste ona, keta haluha kontinua hemu nafatin ai-moruk tuir reseita doutór nian no kumpri regra hotu ne’ebé doutór sira akonsella ona ba ita.

Karik iha kondisaun saúde emerjénsia ne’ebé la relasiona ho COVID-19, kontaktu ba saúde emerjénsia lalais no husu ajuda atu halo saida. Halo tuir instrusaun hotu hosi pesoál saúde sira to’o ambulánsia ba to’o iha uma hodi lori ita ba ospitál.

Bainhira estresse, tauk, ka triste hapara ita hosi atividade lor-loron nian durante loron hirak nia laran, tenke buka apoiu psikososiál hosi servisu sira ne’ebé disponivel iha fasilidade saúde ka fatin seluk. Karik ita sofre hosi violénsia doméstiku, konta sai ba ema ruma ne’ebé ita fiar no relata violénsia ne’e ba autoridade relevante. Ita mós bele hetan suporta hosi hotline ka servisu ne’ebé dedikada ba violénsia doméstiku disponivel iha rai-laran.

Saida mak ha’u tenke halo karik ha’u hatudu sintomas COVID-19?

Karik ita iha sintomas relasiona ho COVID-19, buka atendimentu saúde. Di’ak liu telefone uluk se posivel no hatoo informasaun balun kona-ba kondisaun saúde ne’ebé eziste no ai-moruk ruma ne’ebé karik ita hemu hela. Halo tuir instrusaun hosi pesoál saúde sira no monitoriza ita-nia sintomas beibeik.

Se dada iis araska, kontaktu kedas ba emerjénsia saúde tanba ida ne’e karik bele kauza hosi infesaun respiratóriu. Telefone uluk hodi hatene saida mak atu halo tuirmai.

Se ita hela ho ema seluk, tenke asegura katak ita izola an bainhira ita hatene ita sai suspeitu ba infesaun. Ita no família seluk iha uma tenke uza máskara karik disponivel iha uma.

Se ita hela ho ema seluk no bainhira pesoál saúde sira akonsella atu halo tratamentu COVID-19 hosi uma, entaun membru família sira hotu tenke halo tuir guia ne’ebé disponivel hodi halo tratamentu ba pasiente ho COVID-19 hosi uma, ida ne’e ba sira ne’ebé iha sintomas moderadu de’it.

=========================================================================

Pergunta & Resposta (P&R): Similaridade no diferensa sira – COVID-19 no gripe

Hanesan surtu COVID-19 kontinua evolui, komparasaun sira foka liu ba gripe. Rua ne’e kauza moras respiratóriu, maske nune’e iha diferensa importante sira entre virus rua ne’e no oinsá nia hada’et. Ida ne’e iha implikasaun importante ba sasukat saúde públika sira ne’ebé mak bele implementa atu responde ba kada virus.

Oinsa mak COVID-19 no gripe ne’e hanesan?

Dahuluk, virus COVID-19 no gripe iha aprezentasaun moras ne’ebé hanesan. Ne’e mak, sira rua kauza moras respiratóriu, ne’ebé mak aprezenta variasaun kona-ba moras oi-oin hosi sintoma laiha ka naton to’o moras grave no mate.

Daruak, virus rua ne’e transmite hosi kontaktu, kabeen no sasan ne’ebé ita uza. Ho nune’e, sasukat saúde públiku hanesan, liuhosi mantein ijiene liman no etikete di’ak ba respitóriu (me’ar iha liman sikun ka iha tixu laran no soe kedas tixu ne’e iha lixu), mak nuudar asaun importante sira ema hotu bele foti atu prevene infesaun.

Oinsa mak COVID-19 no gripe diferente?

Velosidade transmisaun mak pontu importante kona-ba diferensa entre virus rua ne’e. Gripe ninia periodu inkubasaun ne’e badak (tempu hosi infesaun to’o sintomas mosu) no intervalu seriál ne’ebé badak (tempu entre kazu susesivu/tutuir malun sira) kompara ho virus COVID-19. Intervalu seriál ba virus COVID-19 ne’e estimadu entre loron 5-6, no ba gripe, intervalu seriál mak loron 3. Ida-ne’e signifika katak gripe hada’et lalais liu COVID-19.

Tuir tan, transmisaun iha loron 3-5 dahuluk hosi moras, ka iha potensiál transmisaun antes-sintomatiku – transmisaun virus ne’e antes hatudu sintoma – mak sai hanesan kontrolador boot ba transmisaun gripe. Iha kontráriu, mezmu ita aprende hela katak iha ema ne’ebé mak hada’et virus COVID-19 iha oras 24-48 antes sintomas mosu, dadauk ne’e, ida-ne’e la sai hanesan pontu kontrolador ba hosi transmisaun.

Númeru reprodutivu – númeru hosi infesaun sekundária prodús hosi individu infetadu ida – ne’e komprende entre 2 no 2.5 ba virus COVID-19, aas liu kompara ba gripe. Maibé, estimasaun ba virus COVID-19 no gripe ne’e espesífiku-ba tempu no kontekstu, ne’ebé mak halo komparasaun direta sira difisil liu.

Labarik sira mak sai parte importante hodi hada’et transmisaun gripe iha komunidade. Ba virus COVID-19, dadus inisiál hatudu katak labarik sira ladun afeitadu kompara ho ema boot sira no taxa atakasaun klíniku hosi grupu idade 0-19 ne’e kiik. Dadus preliminariu tuir tan hosi estudu transmisaun uma-laran sira iha Xina sujere katak labarik sira hetan infesaun hosi ema boot sira, la’os hosi labarik ba ema boot sira.

Maske variadade hosi sintomas hosi virus rua ne’e hanesan, divizaun hosi moras grave hatudu diferente. Ba COVID-19, dadus dadadauk sujere katak 80% hosi infesaun ne’e moras naton to’o laiha-sintoma, 15% ne’e infesaun grave, presiza oksijéniu no 5% mak infesaun kritiku, presiza ventilasaun. Divizaun kona-ba infesaun grave no krítiku sira ne’e aas liu kompara ho saida mak observa ona ba infesaun gripe.

Sira-ne’ebé iha risku boot laran ba infesaun gripe grave mak labarik sira, feto isin-rua sira, ema ferik/katuas sira (idozu), hirak ne’ebé iha kondisaun mediku kroniku no hirak ne’ebé iha sistema imunidade fraku. Ba COVID-19, ami-nia komprensaun agaora dadauk ne’e mak terseira idade ou katuas/ferik sira no kondisaun mediku iha risku boot ba infesaun grave.

Mortalidade ba COVID-19 ne’e aas liu kompara ho gripe, espesialmente gripe tuir-tempu. Mezmu presiza tempu atu komprende klean kona-ba mortalidade lolos hosi COVID-19, dadus ne’ebé ami iha dadauk ne’e hatudu katak proporsaun bruta mortalidade (númeru mate relata ona fahe ka dividi ba númeru kazu sira ne’ebe relata ona) mak entre 3-4%, taxa infesaun mortalidade (númeru hosi mate relata ona fahe ka dividi hosi númeru infesaun sira) sei kiik. Ba gripe, mortalidade babain kik liu 0.1%. Maibé, mortalidade ne’e maioria determinadu hosi asesu ba no kualidade hosi atendimentu saúde.

Intervensaun médiku saida mak disponivel ba COVID-19 no gripe?

Mezmu iha númeru hosi terapátiku sira dadauk iha experimentu klíniku iha Xina no vaxina liu husi 20 iha prosesu dezenvolvimentu hela ba COVID-19, dadauk ne’e laiha vaxina lisensadu ka terepátiku ba COVID-19. Iha kontrariu, antiviral no vaxina sira disponivel ba gripe. Mezmu vasina ba gripe ne’e la efetivu hasoru virus COVID-19, maibe rekomenda tebes atu hetan vasinasaun kada tinan atu prevene infesaun gripe.

Sorumutu ka eventu ne’e presiza ema barak oinsá hodi konsidera nu’udar “halibur ema lubun boot”?

Eventu desportivu internasionál hanesan Olimpíku ka Kopa Mundiál no mós eventu relijiozu internasionál hanesan partisipa iha peregrinasaun musulmanu ne’e konsidera nu’udar halibur ema lubun boot. Maibé, konferénsia no eventu sira-ne’ebé ki’ik bele mós konsidera tuir definisaun OMS nian halibur ema-lubun boot. Eventu ida konsidera nu’udar “halibur ema-lubun boot” bainhira númeru ema hamutuk barak liu ne’ebé iha potensiál atu aumenta presaun iha rekursu ba planu no responde hosi sistema saúde nian iha komunidade ne’ebé iha fatin refere. Ita presiza konsidera fatin no durasaun eventu nian no mós númeru partisipante sira, pur ezemplu: Se eventu ne’e hala’o loron balu iha nasaun illa ki’ik ida ne’ebé nia kapasidade sistema saúde limitadu no eventu ho partisipante kuaze rihun bele fó presaun boot ba sistema saúde, no bele konsidera nu’udar eventu “halibur ema-lubun boot”. Pelu kontráriu se eventu ne’e hala’o iha sidade boot nasaun ida-ne’ebé boot no rekursu ba sistema saúde adekuadu no durasaun oras balu de’it, nunee eventu ne’e la konsidera nu’udar eventu “halibur ema-lubun boot”.

Seráke OMS rekomenda katak halibur ema-lubun boot internasionál nian hotu kansela tiha tanba COVID-19?

Lae. Tanba halibur ema-lubun boot internasionál nian la hanesan, fatór sira ne’ebé konsidera bainhira determina se eventu bele kansela bele mós adia. Kualkér desizaun atu muda planu ba halibur hamutuk internasionál nian tenke bazeia ba avaliaaun risku no oinsá bele jere, no nivel planu eventu nian. Avaliasaun tenki envolve parseiru sira hotu iha eventu ne’e, no liuliu, autoridade saúde iha nasaun refere ka ho komunidade ne’ebé eventu hala’o ba. Autoridade no parseiru sira mak iha pozisaun di’ak liu atu avalia nivel estres nian ba eventu ne’ebé bele tau iha sistema saúde lokál no servisu emerjénsia – no karik nivel estres ne’e bele simu iha situasaun atuál ne’e.

  1. Fatór saida de’it mak organizadór no autoridade saúde sira tenki haree bainhira avalia se risku sira-ne’e bele simu ka lae?

Ba nasaun sira-ne’ebé atualmente seidauk iha esperiénsia oinsá COVID-19 da’et ba komunidade, konsiderasaun prioridade karik planu eventu halibur ema-lubun boot maioria aumenta risku virus sira tama ba nasaun ne’e no sai estabelesidu, no mós risku ba partisipante sira atu importa infesaun fila fali ba sira-nia nasaun no aumenta liután hodi hada’et globalmente. Bainhira halo avaliasaun ne’e, organizadór no sira-nia autoridade saúde nasionál ka lokál tenki rekoñese katak risku hosi importa COVID-19 ne’e naturalmente ligadu ho viajen internasionál. Sira mós tenki rekoñese katak la’ós realístiku ka dezejavel finalidade ba risku zero. Bainhira organizadór no autoridade saúde sira determina karik atu realiza halibur ema-lubun boot, sira tenki determina risku saida mak bele simu no medida adisionál saida mak tenki implementa atu hamenus risku sira-ne’e. Ba nasaun sira-ne’ebé COVID-19 hahú hada’et ona iha komunidade, konsiderasaun prinsipál maka hanesan:

  • objetivu iha kontrola ka pelumenus hamenus virus ne’e da’et iha komunidade/nasaun.
  • prevene partisipante sira hosi nasaun sira seluk ne’ebé hada’et ona ho COVID-19

Iha kada kazu, risku ne’e tenke konsidera bazeia ba kontestu karaktéristika COVID-19 nian ne’ebé koñesidu, forsa atu afeta, oinsá atu hada’et no medida efetivu atu prevene ka hamenus COVID-19 da’et. Presaun ne’e tau ona ba sistema saúde lokál hodi responde ba surtu COVID-19 no presaun adisionál ba halibur ema-lubun boot bele tau iha sistema no mós presiza tau iha konsiderasaun. Ita bele buka liután konsellu kona-ba saida mak atu haree iha OMS nia dokumentu Rekomendasaun xave planu prinsipál ba halibur ema-lubun boot iha kontestu surtu COVID-19, 14 Fevereiru 2020. Hare iha link tuirmai: https://www.who.int/publications-detail/key-planning

  1. Oinsá se ha’u-nia organizasaun laiha espesialista atu avalia risku COVID-19 ne’ebé iha ba ita-nia planu halibur ema-lubun boot?

Autoridade saúde públiku nasionál no lokál iha nasaun ne’ebé ita planea atu realiza halibur ema-lubun boot maioria iha koñesimentu hodi hala’o avaliasaun risku saúde. Se iha OMS nia eskritóriu iha nasaun refere, sira bele mós fó suporta peritu balu. Nune’e, eskritóriu OMS iha ita-nia parte iha mundu tomak. Ita bele hetan naran no kontaktu sira OMS iha nasaun ida-idak iha: https://www.who.int/about/who-we-are/regionaloffices

  1. Se ita kontinua halibur ema-lubun boot internasionál ida, saida mak ita bele halo hodi hamenus risku ba partisipante sira atu hetan COVID-19?

Promove fase liman, ijiene respiratóriu no distánsia sosiál iha eventu refere. Asegura ita iha númeru kontaktu emerjénsia partisipante hotu nian, inklui fatin ne’ebé sira toba durante

eventu ne’e. Ita tenki klarifika ba sira katak informasaun sirane’e sei fó ba autoridade saúde públiku lokál hodi kontaktu buka tuir lalais se iha partisipante ruma iha eventu ne’e hetan

moras COVID-19. Organizadór eventu ne’e presiza iha planu preparasaun ida se kazu iha partisipante ida ka liu mak hetan sintóma COVID-19.

Ida-ne’e tenki inklui izolamentu rápidu ba ema moras ne’e no sira-nia seguransa transferénsia ba fasilidade saúde lokál. Ita tenki konsidera se númeru partisipante iha eventu ne’e presiza hamenus, halo disponibilidade partisipasaun liuhosi video ka telekonferénsia no posibilidade halo triajen ba partisipante sira ho sintóma COVID-19 (mear, isin-manas, sente moras ) iha entrada ba fatin eventu ne’e. Ita bele hetan konsellu oinsá kada partisipante bele proteje sira-nia an no ema ne’ebé sira hadomi hosi COVID-19 iha link ne’e: https://www.who.int/emergencies/diseases/novel-coronavirus-2019/advice-for-public

  1. Iha-ne’ebé mak ha’u bele hetan liután konsellu kona-ba oinsá avalia no jere risku saúde bainhira halibur ema-lubun boot internasionál ida?

OMS prodús ona matadalan no mós formasaun kona-ba oinsá halo planu ba halibur ema-lubun boot. Matadalan no formasaun ne’e bele haree iha oinsá hala’o avaliasaun risku ida, planu no jere risku sira liuhosi parseria ho autoridade lokál sira:

https://www.who.int/emergencies/diseases/novel-coronavirus-2019/technical-guidance/points-of-entry-and-mass-gatherings

Ita bele hetan konsellu oinsá kada partisipante bele proteje sira-nia an no ema ne’ebé sira hadomi hosi COVID-19 iha link ne’e: https://www.who.int/emergencies/diseases/novel-coronavirus-

2019/advice-for-public

Serake inan sira-ne’ebé isin-rua iha risku aas hosi COVID-19?

Agora daudauk iha hela peskiza laran atu kompriende impaktu hosi infesaun COVID-19 ba inan isin-rua. Dadus limitadu, maibé daudauk ne’e laiha evidénsia katak sira iha risku aas ba moras grave kompara ho populasaun enjerál.

Maibé, tanba mudansa ba sira-nia isin-lolon no sistema imunidade, ita hatene katak inan isin-rua bele hetan afeta maka’as ba infesaun respiratóriu. Tanba ne’e importante ba sira atu foti medida preventiva hodi proteje sira-nia aan hasoru COVID-19, no hato’o sintoma posivel sira (inklui isin-manas, me’ar ka susar dada iis) ba pesoál saúde sira.

OMS sei kontinua halo revizaun no atualiza informasun no konsellu ho evidénsia barak hodi sai disponivel.

Hau inan ne’ebé isin-rua hela. Oinsá hau proteje hau-nia aan hasoru COVID-19?

Inan isin-rua tenke hola medida preventiva hanesan atu evita infesaun COVID-19 hanesan mós ema sira seluk. Ita bele ajuda proteje ita-nia aan liuhosi:

  • Fase ita-nia liman beibeik ho kose dezinfetante ka fase liman ho sabaun ho bee.
  • Mantein espasu entre Ita-Boot ho ema seluk no evita aan hosi fatin ne’ebé iha ema grupu boot.
  • Evita kaer ita-nia matan, inus no ibun
  • Prátika ijiene respiratóriu. Ne’e signifika taka ita-nia ibun no inus ho ita-nia liman-sikun ka tisu ruma bainhira me’ar ka fani. Depois so’e kedas tisu ne’e ba lixu ne’ebé ho matan metin.
  • Se ita sente isin-manas, me’ar ka susar dada iis, ba konsulta kedas. Telefone ka fó hatene antes ba fasilidade saúde, no halo tuir instrusaun hosi ita-nia autoridade saúde.Inan isin-rua no inan sira-ne’ebé foin partu –inklui ba sira-ne’ebé hetan infesaun COVID-19 – tenke bá halo tratamentu rutina.

Inan isin-rua bele halo teste ba COVID-19 ka lae?

Protokolu no elijibilidade ba teste muda beibeik depende ba fatin ne’ebé ita hela ba.

Maibé, rekomendasaun sira OSM nian katak inan ne’ebé isin-rua ho sintoma sira COVID-19 nian sei sai prioridade ba teste. Se sira iha COVID-19, sira sei hetan atendimentu espesiál.

COVID-19 bele pasa hosi inan ida ba nia bebé ne’ebé iha hela knotak ka bebé ne’ebé foin moris?
To’o agora ita seidauk hatene se inan ida isin-rua ho COVID-19 bele pasa virus ne’e ba nia ka’an-fuan ka bebé ne’ebé iha knotak ka partu ona. To’o agora, virus ne’e seidauk hetan ezemplu (sample) ruma hosi líkidu amniótiku ka susubeen inan nian.

Tratamentu saida maka tenki disponivel durante inan isin-rua no partu?

Inan isin-rua sira hotu, inklui sira-ne’ebé konfirmadu ka suspeitu ba infesaun COVID 19, iha direitu aas atu hetan tratamentu kualidade molok, durante no depoizde partu.

Ida ne’e inklui prenatál, partu, posnatál, intrapartu no tratamentu saúde mentál

Esperiénsia ida-ne’ebé partu ho seguru no pozitivu inklui:

  • Hetan tratamentu ho respeita no dignidade;
  • Iha prezensa akompañamentu ida durante partu
  • Komunikasaun klaru hosi parteira sira
  • Estratejia halakon moras apropriadu
  • Mobilidade durante hala’o servisu se bele, no pozisaun partu tuir hakarak

Se hetan suspeitu ka konfirmadu COVID 19, nune’e pesoál saúde tenke foti medida apropriadu hodi hamenus risku ba infesaun ba sira-nia an no sira seluk, inklui liman-moos, no uza roupa protejidu apropriadu hanesan luvas, bata no máskara médiku.

Inan isin-rua ne’ebé suspeita ka konfirmadu COVID 19 presiza partu liuhosi sezariana?

Lae. OSM fó konsellu katak sezariana só bele hala’o bainhira justifika ona medikamentu.

Modu partu tenke individualizadu no bazeia ba preferénsia inan nian hamutuk ho indikasaun obstériku.

 

Inan isin-rua ne’ebé hetan infesaun hosi COVID-19 bele fó-susu ka lae?

Sin.  Inan isin-rua ne’ebé hetan infesaun hosi COVID-19 bele fó-susu se sira hakarak. Maibé, tenke:

  • Pratika ijiene respiratóriu durante fó-susu, uza máskara se iha;
  • Fase liman antes no depois kous bebé;
  • Hamoos no hamoos ho ai-moruk (dezinfeta) ba objetu leten ne’ebé sira kaer ona.

Se hau hetan ona infesaun COVID-19 hau bele kous hau-nia bebé ne’ebé foin moris ka lae?

Sin, bele.  Kontaktu besik no antes, no fó-susu  eskluzivu tulun bebé ida ho dezenvolvidu liután. Ita tenke suporta atu:

  • Fó-susu ho seguru, ho ijiene respiratóriu ne’ebé di’ak
  • Kous bebé no isin kona malu
  • Toba hamutuk ho ita-nia bebé iha kuartu ida

Ita tenke fase-liman molok no depois kous ita-nia bebé, no mantein objetu nia leten ho moos.

Hau hetan infesaun hosi COVID-19 no sente isin-baruk atu fó-susu hau-nia bebé diretamente. Saida mak hau bele halo?

Se Ita sente isin-baruk atu fó-susu ita-nia bebé tanba infesaun COVID-19 ka moras komplikasaun sira seluk, Ita tenke suporta fó-susu ita-nia bebé ho seguru liu hosi dalan ida-ne’ebé posivel, disponivel no bele simu hosi Ita. Ida-ne’e bele inklui:

  • Susubeen espresandu (hois no tau iha fatin apropriadu hafoin bele fó ba bebé iha kualkér tempu)
  • Relaktasaun – Fó-susu ba bebe depoisde tempu balun liu tiha
  • Doasaun susu-been hosi ema seluk

=========================================================================

P & R – Violensia kontra feto durante COVID-19

Hela iha uma la’os fatin seguru mai ha’u. saida mak hau bele halo?

Se ita sofre tanba violensia, karik di’ak liu husu família, kolega no viziñu sira, buka apoiu hosi liña apoiu ruma. Buka hatene fasilidade lokál (ezemplu, uma-mahon, fatin ba akonsellamentu) ne’ebé funsiona hela no kontaktu ba sira bainhira disponivel.

Halo planu seguru Karin bainhira akontese tan violensia hasoru ita-boot ka oan sira. Ida ne’e inklui:

  • Identifika família, kolega no viziñu ka fatin uma-mahon ruma hodi bele ba provizoriu bainhira presiza hasees an hosi uma tanba razaun seguransa.
  • Tenke iha planu oinsá atu sai hosi uma ho seguru no oinsá atu ba to’o iha fatin refere (ezemplu, transporte)
  • Rai sasan esensiál ka ida ne’ebé presiza tebes (ezemplu. Dokumentu idenfitikasaun, telefone, osan, ai-moruk, no roupa) no halo lista númeru telefone importante karik ba kazu emerjénsia.
  • Karik posivel, kria kódigu ida entre ita-boot ho viziñu ka ema ne’ebé ita-boot fiar liu atu nunee sira bele mai ajuda karik ita-boot iha situasaun emerjénsia nia laran.

Ha’u presiza hetan atendimentu médiku tanba violensia. Se mak bele ajuda ha’u no ha’u tenki ba ne’ebé?

Karik ita-boot presiza atendimentu médiku, favór telefone ambulánsia ka kontaktu ba servisu saúde emerjénsia nian. Se presiza apoiu sira seluk, kontaktu ba servisu espesializadu refere karik disponivel ka kontaktu ba pesoál saúde sira.

Ha’u seguru, maibe hau sofre hosi problema mentál/seksuál/sosiál/problema fíziku ba longu prazu tanba violensia. Iha ema ruma mak bele ajuda hau durante COVID-19?

Karik posivel, hamenus fontes ne’ebé halo ita-boot estresse:

  • Mantein kontaktu no buka apoiu hosi família no kolega sira liuhosi telefone, sms ka maneira kontaktu sira seluk hanesan liuhosi media sosiál.
  • Koko mantein nafatin atividade rutina lor-loron nian no fahe tempu ba halo ezersísiu no deskansa.
  • Utiliza ezersísiu relaxadu (ezemplu. Dada iis neineik, meditasaun, halo múskulu relaxadu, no ezersísiu relaxadu sira seluk) hodi alevia hanoin barak no estresse.
  • Partisipa iha ativididade ne’ebé maka bele ajuda jere ita-nia estresse no difikuldade.
  • Buka informasaun kona-ba COVID-19 ne’ebé maka mai hosi fonte kredivel no hamenus tempu ba notisia la loos (ezemplu. Haree/lee notisia loron ida dala ida ka rua, la’os kada oras)

Buka atendimentu saúde hosi pesoál saúde treinadu ba sintomas no kondisaun balun inklui kanek ne’ebé presiza hetan atensaun médiku nian. Tanba restrisaun iha movimentu, no presaun ba sistema saúde, karik ida ne’e sai difikuldade hodi hetan asesu ba tratamentu saúde. Entaun, buka tuir saida maka disponivel iha ita-nia área no buka mós alternativu seluk, inklui informasaun no apoiu ne’ebé oferese tuir telefone no online.

Se agora daudaun hetan hela tratamentu saúde no apoiu ba asuntu relasiona ho violénsia, ida ne’e sei kontinua durante COVID-19  –  ida ne’e bele komunika mós tuir telefone ka online se posivel no apropriadu tuir ita-boot nia nesesidade.

Ha’u preokupa kona-ba ha’u nia kolega/família ida. Oinsá mak hau bele ajuda?

Se ita-boot hatene, ka preokupa kona-ba, kolega/família ne’ebé iha relasaun ne’ebé nakonu ho violénsia, ita-boot bele halo tuir buat hirak ne’e:

  • Mantein kontaktu ka komunika nafatin ho ema ne’e hodi hatene sira seguru, garanti nafatin katak bainhira komunika malu ho ita-boot ne’e seguru. Tenke asume nafatin katak autór ba violénsia ne’e bele haree, rona ka monitoriza komunikasaun hotu, nunee buka meius oinsá atu komunika di’ak liu ho vitima refere. Manda SMS ka mensajen liuhosi media sosiál, tuir maneira ida ne’ebé seguru ba sira. Tenke komunika ho vitima kuidadu bainhira autór violénsia ne’e iha uma ka besik hela vitima, atu nunee la tau risku seluk tan ba sira.
  • Buka hatene fasilidade servisu ida ne’ebé maka disponivel ba sobrevivente violénsia kontra feto (ezemplu. uma mahon, hotline, servisu akonsellamentu, organizasaun feto nian) ne’ebé funsiona durante pandemia COVID-19 no halo informasaun ne’e disponivel liuhosi ita-nia rede no rede sosiál. Fornese de’it informasaun ida ne’e diretamente sein autór violénsia ne’e hatene tuir.
  • Se ita-boot nia kolega/família ruma presiza ajuda urjente ba razaun saida de’it, tenke preparadu hodi telefone ba servisu saúde emerjénsia, polísia, sentru saúde ka hotline.

Ha’u hakarak relata insidente violénsia durante COVID-19. Saida mak ha’u tenke halo?

Se ita hakarak relata insidente violénsia, ita tenke halo tuir guia iha nasaun ne’e kona-ba oinsá atu relata violénsia no kontaktu ba servisu sira ne’ebé iha posibilidade bo’ot hetan responde ida ne’ebé sentradu ba sobrevivente sira.

Iha nasaun balun halo ezeptu ba restrisaun movimentu hodi relata violénsia espesífiku balun. Tenke hanoin katak bainhira relata insidente ruma bele tau ita iha risku, nunee tenke asegura katak ita-boot iha planu ba seguransa nian prontu.

Karik ita sente difisil emosionál ka mentál bainhira relata insidente violénsia. Buka tulun hosi kolega, família, viziñu ka parente sira, ka servisu suporta lokál ba sobrevivente violénsia nian.

Ha’u sofre ka preokupa karik ha’u hakanek ka halo ha’u nia parseiru (no oan sira) sofre tanba ha’u nia liafuan ka asaun. Oinsá ha’u bele para?

  • Se ita sente hirus tebes, la’o sees tiha ba kuartu seluk, ka ba liur hodi hetan anin fresku no dezvia tiha hirus ne’e.
  • Sura to’o sanulu no dada iis tama no hasai to’o ita sente kalma ona.
    Sura hosi sanulu to’o zero, ka halo tiha atividade seluk ne’ebé maka bele ajuda ita sente kalma.
  • Koalia ho kolega ne’ebé ita fiar, família, ka lider relijiozu balun no karik presiza buka ajuda hosi servisu saúde lokál ka servisu espesializadu ne’ebé mak disponivel besik ita-boot.
  • Rekoñese katak ema hotu iha família ne’e sente estresse durante tempu ida ne’e.
  • Hatudu laran di’ak no pasiensia iha ita-nia liafuan no asaun.
  • Hamenus konsumu alkol/tua

Medida atuál hodi responde ba pandemia COVID-19, hanesan restrisaun ba movimentu, nunee mós tanba sistema finansiál ne’ebé la estavel kauza hosi krize ida ne’e, no ida ne’e hanesan fatór ida hodi aumenta ita-nia estresse. Foti medida hirak ne’e hodi asegura katak ita jere duni ita-nia estresse tuir maneira ida ne’ebé respeitadu no seguru ba ita no família sira. Koko atu nafatin laran malirin ba parseiru moris, ba ita-an rasik, oan-sira no família sira seluk.

Ha’u pesoál saúde ida. Oinsá mak mak hau bele ajuda sobrevivente feto sira durante COVID-19?

Nuudar pesoál saúde ida, iha maneira barak mak ita bele ajuda hodi hamenus impaktu hosi violénsia ba feto no labarik sira iha kualkér tempu, inklui durante pandemia COVID-19.

Enkuantu ita-nia tempu no rekursu limitadu durante emerjénsia saúde ida ne’e, ita iha dever atu kuidadu ka haree inan-feto sira ne’ebé karik husu ita-nia tulun – dalaruma hodi hatan ba sofrimentu mentál no fíziku ne’ebé kauza hosi violénsia ne’e.

Karik ita tenke ajusta oinsá mak ita atu hala’o servisu ida ne’e, karik la posivel atu hasoru malu diretamente. Depende ba ita-nia rekursu seluk, karik konsidera mós telemovel, WhatsApp ka kanál komunikasaun seluk hodi bele ajuda, tenke asegura beibeik katak it abele halo servisu ida ne’e tuir maneira ka dalan ida ne’ebé maka seguru ba sobrevivente. Komunika ho didi’ak ba inan-feto sira kona-ba mudansa ruma iha prestasaun servisu nian.

Se inan-feto ida maka suspeitu ka konfirmadu ho COVID-19 buka atendimentu ruma tanba violénsia, ita-nia maneira halo tratamentu tenke hanesan ho sobrevivente sira seluk. Maibé, ita tenke kontinua asegura katak ita protejidu hosi infesaun, mantein distánsia bainhira posivel, uza roupa protetivu, prátika respiratóriu ijiene, no fase liman no fatin/sasan sira ne’e ho sabaun no bee bebeik no depois ka’er pasiente, hodi Evita infesaun.

Iha kualkér sirkunstánsia, inklui durante pandemia COVID-19, pesoál saúde sira tenke fornese suporta liña apoiu dahuluk, uza abordajen LIVES hodi ajuda inan-feto sobrevivente sira hosi violénsia:

L – rona didi’ak, ho empatia no la julga

I – halo inkeritu kona-ba inan-feto sira nia nesesidade no sira-nia preokupasaun

V – valoriza inan-feto sira-nia esperiénsia. Hatudu ba sira katak ita fiar no kompriende.

E – haforsa sira-nia seguransa

S – suporta inan-feto hodi liga ba servisu apoiu adisionál

Ha’u servisu iha fasilidade saúde. Saida mak ha’u bele halo hodi suporta sobrevivente feto sira hosi violénsia durante COVID-19?

  • Identifika informasaun kona-ba apoiu lokál, inklui hotline, uma-mahon, sentru krize ba violasaun, no akonsellamentu.
  • Buka hatene oras fasilidade apoiu sobrevivente ne’e loke, kontaktu detallu no servisu sira ne’e bele oferese tuir maneira seluk hanesan, tuir telefone ka sms, no estabelese ligasaun referál.
  • Halo servisu apoiu hirak ne’e disponivel ba pesoál saúde sira no fasil ba pasiente/kliente sira atu asesu ba ita-nia fasilidade.
  • Suporta pesoál saúde sira iha ita-nia fasilidade saúde hodi kontinua suporta inan-feto sobrevivente sira hosi violénsia iha tempu ida agora ne’e.
  • Tenke preparadu atu muda lalais no hodi bele fornese tratamentu liuhosi maneira alternativu seluk, liuhosi kria planu responde efetivu; hanesan ezemplu, asegura pesoál saúde liña oin sira iha telemovel no bele karrega.
  • Tenke asegura katak iha protokolu ne’ebé prontu hodi asegura kontinuasaun arkivu dokumentu ho seguru karik iha lockdown
  • Informa ba sobrevivente sira maneira oi-oin sira bele proteje sira-nia an, no fornese kartaun lista númeru telefone hodi bele hetan suporta bainhira presiza.

Ha’u polítika na’in ida. Saida mak hau bele halo hodi prevene no responde ba violénsia kontra feto durante COVID-19?

  • Bainhira kria planu prontidaun no responde ba pandemia COVID-19, tenke inklui mós servisu esensiál ba violénsia kontra feto.
  • Aloka rekursu adekuadu servisu ba sobrevivente sira no identifika maneira atu halo servisu hirak ne’e asesivel – liuliu iha kontestu medida sira ne’ebé restrita ema-nia movimentu.
  • Esplora uza telemedicine, digital health ka mhealth atu haforsa sobrevivente sira-nia asesu hodi hetan suporta, enkuante asegura sira katak ida ne’e seguru ba sira.
  • Esplora tan uma-mahon alternativu ba inan-feto sira ne’ebé maka presiza suporta ida ne’e.
  • Asegura katak medida lockdown la kastigu inan-feto sira ne’ebé maka buka suporta bainhira sira sofre hosi violénsia, hanesan relata ba polísia ka ba ospitál.

Se mak vulneravel liu?

Women who are displaced, who are migrants or refugees, and those living in conflict-affected areas, older women and women with disabilities are particularly at risk of violence and are likely to be disproportionately affected by violence during COVID-19.

Inan-feto sira ne’ebé laiha fatin hela, migrante ka refujiadu, no sira ne’ebé hela iha área konflitu, inan-feto idozu no inan-feto defisiénsia sira mak partikularmente iha risku ba violénsia no sei afetadu liu hosi violénsia durante COVID-19.

Tansá mak ha’u tenke preokupa kona-ba violénsia kontra feto durante COVID-19?

Violénsia kontra feto ne’e violasaun grave ba feto nia direitu umanu, la haree ba tempu, fatin ne’ebé, ka maneira oinsá. Iha maneira oi-oin hosi violénsia kontra feto ne’e, ida ne’ebé maka iha konsekuénsia negativu ba feto no labarik sira-nia saúde.

Violénsia kontra feto ne’e bele rezulta iha kanek no problema fíziku, mentál no seksuál no problema saúde reprodutiva, inklui infesaun ne’ebé hada’et liuhosi relasaun seksuál, HIV, no isin-rua la planeadu. Iha kazu grave, violénsia kontra feto bele rezulta iha mate.

Efeitu hosi violénsia ne’e metin ba tempu naruk dalaruma ba ema ne’e nia moris tomak. Violénsia – iha forma hotu-hotu – bele iha impaktu ba feto-nia ben-estar ba nia moris tomak. Ida ne’e la aseitavel, no risku violénsia ne’ebé feto no labarik sira enfrenta durante krize COVID-19 ne’e ita labele ignora.

Bainhira ita bele prevene violénsia, ka suporta inan-feto sobrevivente violénsia, ita ajuda asegura feto-nia direitu umanu, no promove saúde fíziku no mentál no ben-estar ba feto sira durante sira-nia moris tomak. Ida ne’e ajuda hodi alevia presaun ne’ebé maka makaas ona iha servisu esensiál públiku nian, inklui Sistema saúde.

NOTÍSIA FOUN

Site Statistics

  • Users online: 1 
  • Visitors today : 1,374
  • Page views today : 1,964
  • Total visitors : 75,811
  • Total page view: 105,796

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur