DILI- Iha loron Kinta (29/08) ne’e, Ministru Obras Públikas (MOP) Salvador Eugénio Soares dos Reis Pires, akompaña nia amólogu Ministru Obras Públikas no Habitasaun Indonézia, Mochamad Basuki Hadimuljono no eis Prezidénte Repúblika José Ramos Horta, inaugura ponte no parque Prezidente B. J. Habibie, iha Bidau Santana, Dili.
Ministru Obras Públika Indonézia nian ne’ebé ofisialmente reprezenta Prezidente Repúblika Indonézia (RI), Joko Widodo iha inagurasaun Ponte Prezidente B. J. Habibie ne’e.
“Hanesan ita boot sira hatene, projetu ne’e hanesan ita komemora ita nia loron históriku Konsulta Populár ba tinan 20, ohin ita hamutuk ho ita nia delegasaun husi Prezidente Indonézia, Joko Widodo nian, ha’u nia omólogu senhor Ministru Obras Públikas no Habitasaun komunitária Indonézia mai hamutuk ho Governu Timor-Leste inagura ponte ne’e,” Ministru Salvador informa hafoin inagura ponte rerefe.
Ministru afirma, naran ne’ebé tau ba ponte ne’e deside direita husi Prezidente Komisaun Organizadora ba selebrasaun Konsulta Populár ba dala-20, Kay Rala Xanana Gusmão.
“Ne’e pasu importante ida atu hametin liután ita-nia relasaun bilaterál entre nasaun rua ne’e (Timor-Leste no Indonézia) ba iha setór oioin, kontribui mós ba páz no estabilidade no rejiaun sudeste Aziátiku,” Ministru hateten.
Ponte B. J. Habibie ne’e rasik, nia informa konstrui husi kompania Karya Timor-Leste ho montante osan millaun US$3.9. Ponte ne’e nia luan metru 10.5 no nia naruk hamutuk metru 78 (ponte ida 18 metru, ida 60 metru). Prosesu konstrusaun ba ponte refere lori tinan rua.
Enuantu, serimonia inagurasaun ne’e partisipa husi membru Governu, membru Parlamentu Nasionál, bainaka espesiál husi nasaun sira inklui komunidade kapitál Dili, liuliu komunidade Bidau Santana. Hafoin inagura ponte ne’e loke ona atu asesu ba públiku tomak.(*)

UPDATED NEWS

ADVERTISEMENT