DILI—Amu Bispu Dioseze Dili, Don Virgílio do Carmo da Silva, durante preside misa agradesimentu ba selebrasaun aniversáriu loron konsulta popular ba dala 20 hatete espíritu referendum maka rekonsiliasaun.

“Espíritu referendum nian mak tenke rekonsiliasaun, nune’e liuhosi rekonsiliasaun mak ita bele kore buat sira ne’ebé mak ita sei kesi metin hela ne’e, no preparadu atu hakat ba unidade ne’ebé metin liu-tan,” Omilia Bispu Virgílio nian, iha Igreja Katedrál Dili, Kinta (29/08).

Bispu Don Virgílio hatete, hothotu tenke agradese, tanba iha tinan rua-nulu ba kotuk aprende nu’udar povu ne’ebé la’o livre, maski dala-ruma monu, tanba salan, maibé neineik-neineik sei to’o.

Importante tuir sarani nia fiar, karidade no esperansa ba Maromak mak baze fundamentál moris nu’udar sarani iha rai doben Timor-Leste.

Alende ne’e mós selebrasaun referendum tinan ne’e labele sai de’it momentu ida atu hateke ba kotuk, basa buat ne’ebé liu tiha ona, maibé serve hanesan lisaun ida ba futuru nu’udar povu nia fiar na’in.

Iha momentu ida ne’e mós konvida timor-oan hotu atu hateke ba kotuk ho korajen hodi foti matan hakat ba oin, hodi haburas nafatin espíritu referendum ninian.

Liuhosi ida ne’e mak fiar malu atu la’o hamutuk ho unidade, responsabilidade no sakrifísiu, maibé keta haluhan horisehik liu tiha ona no aban sidauk to’o, iha de’it mak agora no keta ta’uk atu hahú agora.

Tinan ruanulu referendum sai hanesan momentu furak ida ba povu no responsavel ba rai ida ne’e, tenke hadomi no enkoraja atu deteta buat hirak ne’ebé sai ameasa ba armoniza ksolok ne’ebé auténtiku ba povu ida ne’e.

Nune’e mós Amu Bispu Virgílio hato’o mensajen ba komemorasaun vijézimu aniversáriu nian, atu labele hela de’it memória ida, maibé tenke kura hela ba timor-oan hotu nia fuan liuhosi hahalok ne’ebé kompletu.

“Mai ita foti matan atu haree ba ita-nia eroi sira, atu kuda ba ita-nia fuan espíritu ida no sakrifísiu ninian, Maromak dehan imi hadomi malu hanesan ha’u hadomi imi,” Bispu haklaken. (kyt)

 

Please follow and like us:

UPDATED NEWS

Site Statistics

  • Users online: 2 
  • Visitors today : 1,092
  • Page views today : 1,330
  • Total visitors : 41,837
  • Total page view: 56,977

ADVERTISEMENT

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur