Notísia foun


Timor Post (18/03/2021)—Sidadaun na’in-4 menoridade maskte teste ba moras daet COVID-19 negativu maibé obrigadu tama hotu iha izolamentu Tasi Tolu tanba família uma laran rejultadu hatudu pozetivu.

Família ida ne’e iha ema hamutuk 14 no sira na’in-10 ho idade boot konsideradu hetan hotu pozetivu no hela menoridade na’in-4 maka negativu, maibé tanba labele hela mesak iha uma maka ekipa lori hotu ba izolamentu.

Pasiente ho inisiál AMA haktuir, sira na’in-14 iha izolamentu hela iha kuartu la hanesan. Menoridade na’in-4 ne’e hela iha kuartu rua.

Pasiente hirak ne’e hela iha Aldeia Avansa, Suku Bairro-Pité, Postu Administrativu Don Aleixo.

Istória kontaktu husi klaster ida ne’e hahú husi pasiente na’in-1 servisu iha Institutu Apóiu Dezenvolvimentu Emprezariál (IADE).  Nune’e, ekipa vizilánsia kontinua akompaña dezenvolvimentu virus iha família ida ne’e hodi evakua tuir tan pasiente na’in-3 no kuarta (18/03/2021) evakua tan pasiente na’in-6 ho menoridade na’in-4 ne’ebé teste hatudu negativu ne’e.

Timor Post konsege halo entrevista ho pasiente ida ne’ebé iha hela sala izolamentu haktuir, preokupa tebes prosesu teste hodi identifika pasidente negativu sira tanba nia rasik kumpri swab dala ida de’it maibé nia hetan informasaun dahuluk dehan negativu maibé iha loron la hanesan ekipa vizilánsia sira ba lulun sira ba hotu izolamentu tanba dehan pozetivu fali.

“Nu’udar sidadaun ami kumpri, maibé ami preokupa mak (médiku) sira halo teste ba ami na’in-6 dala ida de’it maibé halo konkluzaun dala rua. Primeiru sira dehan negativu, ikus fali dehan pozetivu. Ami dúvida tebes ho prosesu análiza laboratórium iha Timor Leste,” Pasiente COVID-19 ho inisiál AMA hatete ba Jornalista Timor Post via telefone.

Nia hatutan, lójikamente bainhira laboratórium halo teste dahuluk maka sei hamosu hela dívida ka hakarak prova fila fali presiza halo fali teste foun mak halo konkluzaun. La’ós teste dala ida de’it maibé halo konkluzaun dala rua ne’ebé la hanesan.

“Sampel ida de’it pois rejultadu primeiru negativu tuir fali pozetivu, ne’e mak ami sai konfuzaun,” AMA hatutan.

Relasiona ho kestaun ne’e, Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Doutór Rui Maria de Araújo, rekoñese kazu ne’e hatudu rejultadu teste dahuluk negativu maibé kuandu repete fila fali hatudu pozitivu.

“Ida ne’e signifika ita presiza konsidera rejultadu ida segundu ne’e hodi nune’e sira labele transmite moras ne’e ba ema seluk,” Doutór Rui klarifika.

Iha tékniku laboratórium ne’ebé iha rai hotu uza bolu garantia de kualidade. Teste hotu ne’ebé negativu halo fila fali teste iha menus de 24 horas nia laran.

“Portanto sira nia sampel ne’ebé hanesan repete fila fali halo teste atu bele konfirma 100% negativu duni ka la’e. Ida ne’e forma husi kontrolu kualidade ne’ebé laboratórium implementa la’ós de’it iha Timor Leste maibé iha fatin hothotu,” Doutór Rui subliña.

Entretantu Doutór Rui la fó rajaun kona-ba sidadaun na’in-4 ne’ebé negativu maibé obrigadu tama hotu izolamentu ne’e, maibé antes kazu ne’e iha mós pasiente inan feton ida ne’ebé identifika pozitivu no nia oan ne’ebé sei depende hela ba susu negativu obrigadu ba izola hotu no ikus mai labarik ne’e mós pozitivu.

Entretantu tuir dadus ikus, kazu foun ne’ebé ekipa rekolla to’o ohin lokraik ne’e hamutuk-13 inklui na’in-1 husi Munisípiu Vikeke.

Husi totál kazu foun ne’e sura ho dadus horiseik ni’an-107, menus pasiente na’in-1 rekoperadu ohin, total pasiente atuál sa’e ba 119.

Doutór Rui haktuir, husi total kazu ka pasiente ne’ebé iha, na’in-95 husi Dili, Vikeke na’in-4, na’in-21 husi Baukau, Vikeke no Postu Administrativu Fatumea, Munisípiu Kovalima. (cao)

Please follow and like us:

NOTÍSIA FOUN

Site Statistics

  • Users online: 0 
  • Visitors today : 82
  • Page views today : 94
  • Total visitors : 240,259
  • Total page view: 346,584