Notísia foun


Timor Post (23/02/2021)—Tribunál Rejiaun Autónomu Espesial Oekusi Ambeno (RAEOA) durante loron rua, horiseik to’o ohin hala’o julgamentu ba produs prova sira kona-ba kazu Eis Padre Amerikanu Richar Dascbach ne’ebé akuzadu ho kazu pedofilia ka halo relasaun seksual ho labarik menoridade sira iha orfonatu Topu Honis.

Julgamentu ba loron daruak iha Tribunál Oekusi, iha parte lorokraik kontinua rona arguidu.

Defeza husi Eis Padre Richard, Advogadu Miguel Faria ba Timor Post via telefone subliña, hafoin tribunál rona arguidu, julgamentu sei hala’o mós ba sasin sira tuir tribunál nia intendimentu. Nia dehan, normalmente arguidu nia pozisaun advogadu maka sei prepara sasin no lejada sira Ministériu Públiku mak reprejenta.

“Agora foin hahú produsaun de provas,” Advogadu Miguél haktuir.

Nia dehan, kazu ne’e nia prosesu sei naruk tanba konsidera kazu boot.

“Foin mak rona arguidu, bainhira mak lejada no testamuña (sasin), depois sei bolu peritus sira ne’ebé ke halo visum,” Advogadu Miguel hatutan.

“Sé mak halo visum ne’e tenke mai aprejenta iha tribunál,” Advogadu Miguél hatete.

Julgamentu ba loron daruak ne’e kontinua taka ba públiku.

Richard Dascbach, moris iha loron 26 Janeiru 1937 iha Pennsylvanian, Estadus Unidu Amérika (EUA) lori misaun evanjelizasaun Katólika tama iha Oekusi iha tinan 1972.

Nia ordena sai padre iha tinan 1965, no liu tinan rua de’it, nia mai ona Nusa Tenggara Timur (NTT) no ikus liu tama ba Ambeno iha tinan 1972.

Invazaun Indonézia mai Timor-Leste, nia hela iha Oekusi to’o tinan 1999 no konsege subar joven lubuk ida hosi atakasaun pro-integrasionista.

Durante hala’o misaun evanjelizasaun, nia harii uma mahon ida ho naran Topu-Honis (Guide To Life) iha tinan 1993 ho objetivu atu fó mahon ba labarik kbi’it la’ek sira.

Tuir artigu ne’ebé fó sai iha Tatoli, rezultadu hosi orfonatu Topu Honis, konsege lori nia amigu sira hosi Amérika hodi halo adosaun ba Ambeno oan na’in-hitu (7) oras ne’e eskola ramata ona. Sira-nia ensinu superiór iha universidade balun iha Amérika, no balun iha Austrália, inklui mós balun oras ne’e iha deviza boot iha instituisaun F-FDTL no instituisaun Estadu seluk tan.

Richard akuzadu ho kazu pedofilia ka halo abuzu seksuál hasoru labarik minoridade.

Entretantu antes ne’e, Arsebispu Metropolitana Dili, Don Virgílio do Carmo da Silva, SDB, lihosi konferénsia imprensa iha Cámara Eclesiástica, Lecidere, Dili, subliña, entrega prosesu ne’e ba parte justisa hodi hatúr lia loos.

Kazu ne’e to’o mós iha Roma, Amu Papa foti ona desizaun hodi hasai Richard husi kargu nu’udar Padre.

Nune’e mós liga ho kazu ne’e, Don Virgílio mós deside ezonera Padre Herminio de Fátima Gonçalves husi kargu nu’udar Diretór Komisaun Justisa no Paz Dili nian.

“Ha’u nu’udar bispu deside atu ezenora amu Hermino de Fatima Gonçalves hosi nia kargu nu’udar Diretór Komisaun Justisa no Paz Dili nian tanba ligasaun ho kazu ida-ne’e. Ha’u deside atu hapara nia hosi servisu tanba ho razaun buat ne’ebé nia halo iha nia relatóriu hetan indíjiu ruma kona-ba alegasaun akuzasaun hasoru Ministériu Públiku nia investigasaun,” Don Virgílio hatete.

Entretantu iha fulan kotuk, bainhira Xanana hala’o vizita ba Eis Padre Richard nia rejidénsia iha Dili hodi fó votus parabens ba nia aniversáriu ba-dala-84, mosu krítika manas iha públika tanba konsidera Eis Padre Richard nu’udar kriminozu ne’ebé la merese hetan atensaun husi Líder Nasionál hanesan Xanana.

Xanana nia oan mós hakerek karta ne’ebé públika husi nia ama Kirsty Sword Gusmão, preokupa tebes Xanana nia asaun ne’e.

Maske nune’e, mosu mós komentáriu seluk ne’ebé konsidera Eis Padre Richard sei inosente tanba só tribunál de’it maka bele kondena sidadaun ida ka hatúr lia loos ba akujasaun hotu liuhusi investigasaun ne’ebé klean.

Maske nune’e, ho baze lei kanóniku, Santasé ezonera ona Richard nu’udar Padre.

Antes ne’e, Atual Diretora Topu Honis, Liliana Tarung ba Timor Post konfesa, iha konspirasaun ne’ebé involve ema lubuk ida hodi hases Richar husi orfonatu Topu Honis. Meius barak ema halo hodi hamonu Richar maibé la konsege ikus mai ho akujasaun kona-ba pedofilia.

Tanba ne’e, Liliana hatete, entrega ba justisa atu hatúr lia loos.

Entretantu, Liliana mós haktuir, nia rasik mos kumpri ona julgamentu iha Tribunál Rejiaun Oekusi ba-dala-rua tanba hetan akujasaun oioin katak nia abandona no tortura labarik sira iha orfonatu.

Ho akontesimentu sira ne’e, Liliana reforsa katak, iha konspirasaun husi ema sira ne’ebé laran moras ba nia ho Richar durante dezenvolve orfonatu Topu Honis.

“Sira barak husi liur no na’in-ida eis Topu Honis ne’ebé la satisfeitu ho ha’u nia pozisaun agora (Diretora Topu Honis),” Liliana haktuir no dehan, ba tinan ida ne’e sura nia servisu iha Topu Honis durante tinan 26 ona. (cao)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 853
  • Page views today : 1,162
  • Total visitors : 195,728
  • Total page view: 283,037

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur