Notísia foun

Imajen ne’e hatudu, foto hamutuk reprezentante husi Embasada Austrália, Carli Shillito, reprejentante sira husi Konsorsiu Parseria Humanitaria Austrália no Sekretaria Estadu ba Protesaun Sivíl, Joaquim José Gusmão dos Reis Martins ho partisipante treinamentu hafoin entrega no simu sertifikadu.

Timor Post (15/02/2021)— Parseria Umanitaria Austrália (AHP – sigla Ingles) fasilita tiha ona treinamentu kona-ba Monitorizasaun, Evaluasaun no Apriendizazen (MEAL – sigla Ingles) ba funsionáriu protesanu sivíl no  koordenador sira husi munisípiu 12 no Rejiaun Autónomu Oekusi.

Treinamentu durante loron tolu (10-12 Fevereiru 2021) ne’ebé hala’o iha Salaun Ministériu Interior, Dili, ne’e ho objetivu hasa’e kuñesimentu no abilidade partisipantes sira nian iha Monitorizasaun, Evaluasaun no Aprendizazen.

Haktuir iha komunikadu ba imprensa ne’ebé Timor Post asesu, reprezentante sira husi diresaun nasional ba Protesaun Sivíl prepara ona sira nia-an ba emerjensia ruma iha futuru liu husi atende treinamentu kona-ba Monitorizasaun, Evaluasaun no Apriendizazen.

“Ida ne’e sei tulun sira atu halo planu ba kolesaun dadus no análize, no prepara relatoriu iha momentu sertu ba desizór sira durante no hafoin emerjensia. Iha treinamentu nia rohan, partisipante sira sei familiariza sira nia knár atualizadu bazeia ba Politika Jestaun Risku Dezastre Timor-Leste nian (DRM – Sigla Ingles), espesialmente konaba Jestaun Risku Dezastre Bazeia ba Komunidade (CBDRM – Sigla Ingles) atu hala’o knar iha preparasaun dezastre, redusaun risku no responde ba emerjensia iha nivel sub-nasional nian,” subliña iha komunikadu.

Konsorsiu husi Parseria Humanitaria Austrália inklui CARE, Caritas Austrália, Oxfam, World Vision no Plan International no parseiru lokál.

Reprezentante husi Embasada Austrália, Carli Shillito hatete, “Monitorizasaun, Evaluasaun no Aprendizazem nu’udar parte importante ida ba serbisu hotu – Maibé importante liu mak jestaun dezastre adapta lalais ba sirkumstansia nia mudansa. Hau kontenti atu haree katak Protesaun Sivil no AHP halo prioridade ida nee no implementa treinamentu nee”.

Shillito hatutan, Austrália kontente tebes atu apoiu servisu di’ak sira husi Sekretaria Estadu Protesaun Sivíl nian ba jere dezastre iha Timor-Leste no treinamentu ida ne’e nu’udar ezemplu seluk hodi kontinua kolaborasaun ne’ebe besik liu tan entre AHP no Protesaun Sivíl.

Diretor Paíz nian husi CARE International iha Timor-Leste no lider ba konsorsiu AHP nian, Peter Goodfellow komenta katak “ho lalais, informa ba desizór sira iha emerjensia, krítiku tebes atu salva vida ema nian no responde ba ema vulneravel sira husi membru sosiedade nian. Ami hein atu ba oin kontinua dezenvolve no apoiu estrutura jestaun dezastre sub-nasional nian atu tulun hodi asegura katak komunidade sira iha Timor-Leste nia laran tomak preparadu di’ak liu tan no reziliente hasoru impaktu husi dezastre naturais no mudansa klimátika”

Iha nia diskursu enseramentu iha treinamentu nian, Sekretaria Estadu ba Protesaun Sivíl, Joaquim José Gusmão dos Reis Martins hatete, “Dezenvolvimentu umanu nu’udar save primaria atu dezenvolve instituisaun. Sekretáriu Estádu Protesaun Sivíl apresia kooperasaun amizade husi ajensia hotu-hotu nivel nasional no internasional espesial ba ajensia AHP sira, ne’ebe mak partisipa ativu apoiu dezenvolvimentu kapital umanu no investe iha area redusaun risku dezastre (RRD).” (cao)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 802
  • Page views today : 927
  • Total visitors : 239,383
  • Total page view: 345,485