Notísia foun


Timor Post (09/02/2021)—Primeiru Ministru Taur Matan Ruak kontente tebes ho progresu konstuksaun Portu Tibar ne’ebé serimónia lansamentu hala’o iha loron 30 fulan-agostu, loron iha ne’ebé komemora tinan da-19 Konsulta Populár ne’ebé maka determina independénsia Timor-Leste nian no sai nu’udar momentu desizivu ida ne’ebé fundamentál iha Nasaun ne’e nia istória.

Serimónia lansamentu iha momentu ne’eba partisipa husi Eis Primeiru Ministru Kayrala Xanana Gusmão ne’ebé inisia planu konstruksaun, Prezidente Parlamentu Nasionál Arão Noe, Ministru Prezidénsia Konsellu Ministru Agio Pereira no membru governu seluk, korpu diplomátiku no empreza konstruksaun.

“Ha’u la’ós enjineiru mais kontente tebes ho dezemvolvimentu ne’e, tanba tinan kotuk ha’u mai iha ne’e tasi, ohin mai oin seluk ona, entaun ita hanesan parseiru ho Bollore, tanba parseria públiku no privadu, estadu ho Bollore,” Taur subliña ba Jornalista sira hafoin akompaña husi membru governu sira relevante halo vizita ba prosesu konstrusaun iha loron 08/02/2021.

Taur hatete, husi vizita ne’e nia parte bele haree ho matan progresu dezenvolvimentu no membru governu sira bele halo preparasaun ba serimónia inaugurasaun ne’ebé tuir tárjetu hala’o iha loron 20 Maiu 2022.

“Segundu preparativus saida mak tenke halo tan para-ke antes entrega ba ita buat hotu-hotu prontu para ajuda nia funsionamentu operasionalzasaun,” Taur salienta.

“Sira (kompañia) nia aprezentasaun iha ne’ebé ezekuta tuir 45% ne’ebé sira agora halo, entaun na medida ke nia  avansu iha, nia pagamentu mos tuir ida ne’e,” Taur hatutan.

Terminál nivel internasionál ida-ne’e harii iha parte loro-monu Dili nian ho distánsia kilómetru 10, iha tasi-dilan Tibar iha Minisípiu Likisá, liuhusi Timor Port SA, parseria públiku-privada (PPP) ida entre konsórsiu Bolloré no Governu Timor-Leste.

Primeiru-Ministru, Taur Matan Ruak, hateten katak “dezenvolvimentu infraestrutura portu nian konsidera esensiál ba futuru Timor-Leste nian” no defende katak “Portu sira ne’e la’ós de’it fatin ida ba movimentu merkadoria ka sasán sira nian, maibé mós, sai nu’udar sentru dezenvolvimentu nian ida ne’ebé di’ak ba negósiu sira no ba kriasaun empregu, bele impulsiona kreximentu husi komunidade sira ne’ebé hela iha ne’ebá”. Xefe Governu ne’e hatutan mós katak Portu Tibar sei fó “kondisaun nesesáriu sira atu nune’e Timor-Leste bele transforma an iha futuru hanesan interface (Hub) rejionál ida ba transporte merkadoria no tránzitu kontentór sira nian, nune’e bele prodús rendimentu adisionál sira ba país ne’e.”

Taur Matan Ruak hatete mós katak ho “implementasaun Projetu Portu ne’e nian, liuhusi Parseria Públiku-Privada (PPP) ida, ne’ebé reprezenta investimentu ida ho dimensaun boot liu ne’ebé halo ona, to’o agora, iha infraestrutura públika sira iha país ne’e”, Governu fó hela “sinál ida ba investidór sira seluk, katak Timor-Leste ne’e fatin atrativu ida atu halo negósiu”.

Primeiru-Ministru afirma katak nia fiar metin “projetu ne’e dezenvolve ho impaktu ambientál sira ne’ebé sei haree didi’ak mós “tanba “implementasaun husi medida boot sira mitigasaun nian, ne’ebé hili ona ba projetu ida-ne’e tuir prátika ambientál hirak ne’ebé di’ak liu no tuir norma sira husi Korporasaun Finanseira Internasionál (IFC, sigla iha lian inglés) ka Banku Mundiál” no tanba “projetu ne’e fó ba Bolloré, operadór portuáriu ida mós husi hirak ne’ebé iha prestíjiu boot iha nivel mundiál”.

Membru governu sira ne’ebé akompaña Primeiru Ministru iha vizita ne’e mak hanesan Vise Primeiru Ministru no Ministru ba Planu Ordenamentu (MPO), José Maria dos Reis; Ministru Obras Públika (MOP) Salvador dos Reis Pires; Ministru Transportes no Komunikasoins (MTK) José Agostinho da Silva; Ministru Finansas (MF) Rui Augusto Gomes; Ministru Koodenador Assuntus Ekonómikus (MKAE) Joaquim Amaral; no Ministru Jusitisa (MJ) Manuel Cárceres da Costa.

Jornalista Jaime Pires

Editór Noémio Falcão

Please follow and like us:

NOTÍSIA FOUN

Site Statistics

  • Users online: 6 
  • Visitors today : 791
  • Page views today : 1,052
  • Total visitors : 194,263
  • Total page view: 280,806

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur