Notísia foun

Osório Florindo

Timor Post (04/02/2021)—“Kamarada Doutor Rui Maria de Araújo la’ós hakfodak toba hader mai ko’alia nia kandidatu,” Osório Florindo nu’udar apoiante ba Eis Primeiru Ministru Doutór Rui Maria de Araújo ne’ebé hakarak kandidata-an iha kongresu FRETILIN ne’ebé tuir estatutu sei hala’o iha tinan 2021 nia laran.

Osório hatete, dalan legál forte tebes fó biban ba Doutór Rui kandidata-an hodi lidera FRETILIN no gia prosesu dezenvolvimentu nasionál.

“Dalan legál ida fó ba nia atu kandidatu maka ami nia estatutu FRETILIN nian, iha ne’eba iha kritériu sira. Ha’u hanoin Doutór Rui lee hela estatutu, nia sente prienxe kritériu atu kandidata-an sai líder partidu hanesan sekretáriu jerál,” Osorio subliña iha debate Dili Demovracy Clup (DDC) iha Tve.

Osorio hatete, iha estatutu FRETILIN hatete kargu iha FRETILIN la’ós vitalísia, maibé gradualmente bele iha mudansa lideransa. Tanba ne’e, nia afirma, tinan-20 ona kuadru hotu iha FRETILIN fó apoiu ba lideransa atuál (Francisco Guterres Lú Olo ho Marí Bim Amude Alkatiri), maibé tanba iha prosesu dezenvolvimentu, FRETILIN presiza duni lideransa ne’ebé bele gia prosesu ne’e ho di’ak liu tan.

“Iha prosesu demokratizasaun, iha tinan-20 nia laran depoiz de ukun-an, FRETILIN hamoris mós líder foun ne’ebé mak iha kapasidade, i ami hakarak kumpri mós kamarada Sekretáriu Jerál Marí Alkatiri nia liafuan sempre ko’alia dehan “kada jerasaun produz lideransa”. Ne’e signifika katak, lideransa iha FRETILIN nia laran ho tempu sei mosu,” Osorio hatete.

Tanba ne’e, Osório hatutan, tempu ona ba Doutór Rui, nia akompaña durante prosesu ne’e hahú, ukun-an liuhusi transferénsia de poder iha 20 de Maiu, nia sai membru governu, akompaña prosesu dezenvolvimentu, prosesu polítiku iha estadu Timor Leste, nó mós nia membru ida iha partidu laran, membru komité sentral, membru komisaun polítika nasional, intermus de kritériu estatutária Doutór Rui de Araújo merese, iha direitu tomak atu kandidata nia-an.

“La’ós tanba buat seluk, tanba FRETILIN rasik aman ba demokrasia, ita tenke haburas uluk demokrasia iha FRETILIN nia uma laran rasik,” Osório hatete.

Iha prosesu luta libertasaun, lideransa FRETILIN sira mate tutuir dalan, rende, tanba funu naruk lori susar, terus, maibé ema hotu iha FRETILIN sempre ho prinsípiu metin iha FRETILIN hodi lori rai ida ne’e ba ukun-an, no dezenvolvimentu ba oin.

“Tanba ne’e tempu to’o ona mós, jerasaun foun iha FRETILIN nia laran, hakarak mós partisipa iha prosesu demokrasia. Ko’alia kona-ba manan-lakon ne’e la’ós problema ba ami, la’ós problema mós ba Doutór Rui, maibé ne’e istóriku tebtebes ba FRETILIN,” Osório dehan.

Líder jerasaun foun ne’e kontra total opiniaun públiku sira kona-ba jerasaun foun sira iha FRETILIN seidauk bele atu lidera partidu istóriku ne’e. (cao)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 268
  • Page views today : 311
  • Total visitors : 196,000
  • Total page view: 283,356

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur