Notísia foun


Palásiu Prezidensiál Nicolau Lobato, 2 Fevereiru, 2021

Haree ba evolusaun preokupante hosi pandemia ne’ebé hamosu hosi koronavirus foun, no medidas ezekusaun ne’ebé Governu aprova ona ba Estadu Emerjénsia hodi prevene no kontrola COVID-19 atu la hada’et iha Timor-Leste, maka ba tinan ida-ne’e Loron FALINTIL-Forsa Defeza Timor-Leste labele komemora hanesan tinan sira uluk nian.

Maski nune’e, nu’udar Prezidente Repúblika no Komandante Supremu Forsas Armadas, ha’u hakarak aproveita selebra aniversáriu FALINTIL-Forsa Defeza Timor-Leste dala ida tan hodi hato’o ha’u-nia saudasaun no liafuan insentivu ba sira hotu ne’ebé envolve iha instituisaun ida-ne’e – militár no sivíl, feto ho mane – tanba sira-nia dedikasaun tomak hodi serbí ho di’ak ita-nia Rain no Povu Timoroan.

Sentimentu ida-ne’e mosu tanba haree maneira oinsá Forsas Armadas durante ne’e hala’o sira-nia misaun, sira-nia kontribuisaun ba hametin ambiente koezaun, estabilidade no seguransa, liuhosi unidade no dixiplina ne’ebé sira rasik kaer metin, atu tane valór aas sira-ne’ebé sai nu’udar matadalan ba ita-nia ezisténsia koletiva nu’udar Nasaun Independente.

Hodi hasoru krize boot hanesan ida-ne’ebé ita hasoru daudaun, autoridade kompetente sira tenke serbisu maka’as lapara no efikás, no hetan partisipasaun hosi komunidade sira tomak.

Iha kontestu ida-ne’e, ne’ebé mak kontráriu ho uluk, estadu emerjénsia sai hanesan justifikasaun ba Forsas Armadas sira-nia intervensaun ne’ebé hatuur momoos iha lei.

Rejime legál estadu emerjénsia nian fó dalan ba militár sira atu fó apoiu ba autoridade sivíl sira no forsas seguransa iha períodu exesaun ida-ne’e, durante ne’ebé Konsellu Superiór Defeza Nasionál funsiona ho permanente.

Liuliu dimensaun operasionál mak karakteriza no haketak Forsas Armadas hosi forsa sira seluk. Maibé, aleinde dimensaun operasionál ida-ne’e, iha mós dimensaun apoiu ba autoridade sivíl sira, ne’ebé fó dalan ba Forsas Armadas atu tulun instituisaun sira seluk hametin seguransa iha rai-laran ka fó apoiu ba komunidade sira-nia dezenvolvimentu no moris-di’ak.

Aleinde Forsas Armadas sira-nia rekursus umanus no materiais, sira-nia esperiénsia, prontidaun, kapasidade atu hatán kedas, sira-nia kultura organizasionál no kapasidade atu adapta an ba situasaun ne’ebé iha, mak hanesan elementus importante tebes hosi Forsas Armadas sira-nia atuasaun ne’ebé Nasaun tenke kaer metin.

Apoiu ne’ebé F-FDTL durante ne’e fó ba operasaun prevensaun no mitigasaun COVID-19, bazeia ba pedidu hosi Forsas no Servisus Seguransa no autoridade Saúde sira rasik, hodi hala’o knaar oioin iha terrenu, inklui hametin kontrolu no seguransa iha fronteira rai-maran no fronteira tasi ho Indonézia, fó apoiu ba programa sensibilizasaun ba komunidade sira kona-ba medidas prevensaun no distansiamentu sosiál, lori suspeitu infesaun ba fatin izolamentu no tau matan ba seguransa iha fatin sira-ne’e, hala’o projetu enjeñaria hanesan harii filafali no hadi’a fasilidade saúde/sanitária, prepara no asegura seguransa iha fatin izolamentu no kuarentena, no fahe ai-moruk ba komunidade sira.

F-FDTL nia empeñu ne’e konta ho apoiu hosi nasaun belun barak ne’ebé, iha momentu susar ba ita-nia rain, kontribui ona atu F-FDTL bele prepara an no partisipa iha luta hasoru COVID-19. Ne’eduni, ha’u hakarak hato’o ha’u-nia apresiasaun no rekoñesimentu ba sira.

Iha tinan ida susar tebes ba ita-nia Rain, ha’u konxiente kona-ba esforsu ne’ebé halo ona ho maneira ne’ebé ha’u konsidera nu’udar relevante no konstrutivu, kona-ba asuntu lubuk ida ne’ebé ha’u hakarak temi iha ne’e tanba importante tebes:

  • Kontinua atu reforma estrutura superiór Defeza Nasionál no Forsas Armadas nian, liuliu prepara dokumentasaun estratéjiku ne’ebé estruturante;

  • Adapta no prepara Instituisaun ba dezafiu foun sira-ne’ebé nasaun hasoru, ne’ebé sei ezije halo jestaun ba F-FDTL nia rekursus umanus sai efikás, efisiente no rasionál liután;

  • Hamosu konseitu servisu militár foun ida ne’ebé sei lori mudansa importante liu ida entermus de kuantidade no kualidade no bele fó impaktu maka’as liu ba F-FDTL nia estrutura no vida institusionál tanba konsidera nu’udar mudansa kle’an ida ba F-FDTL nia kultura no tradisaun liga ho servisu militár.

Profisionaliza Forsas Armadas Timor-Leste, ne’e desizaun polítika ida ne’ebé iha ninia vantajen no dezvantajen. Mudansa sira-ne’e, iha podér polítiku nia liman, ezije maturidade no konxiénsia polítika kona-ba saida mak serve di’ak liután nasaun nia interese sira.

Aprovasaun ba regulamentu foun hosi Lei Servisu Militár nian tenke liu prosesu tranzisaun ida ne’ebé naruk. Tanba ne’e maka, karik ita la investe iha infraestrutura bázika, ekipamentu no armamentu, F-FDTL nia operasionalidade no kapasidade atu hala’o sira-nia misaun sei limitadu tebes.

Komandante Supremu sente orgullu tebes ho ninia Forsas Armadas. Nasaun no Povu Timoroan hatene katak sira bele konta nafatin ho imi.

Tan ne’e mak ho votu esperansa iha futuru no ho sentidu rekoñesimentu no gratidaun ba serbisu ne’ebé halo ona mak ha’u, nu’udar imi-nia Komandante Supremu, fó laran-manas ba imi atu serbí nafatin ita-nia Rai-Inan ho profisionalizmu no dedikasaun, hanesan uluk. Ha’u fiar katak imi sei kontribui ba tane aas FALINTIL-FDTL no Timor-Leste nia naran-kmanek. (*)

Please follow and like us:

NOTÍSIA FOUN

Site Statistics

  • Users online: 3 
  • Visitors today : 1,225
  • Page views today : 1,816
  • Total visitors : 197,943
  • Total page view: 286,072

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur