Notísia foun


Timor Post (27/01/2021)-CNRT konsidera deklarasaun deputadu Bankada FRETILIN Francisco Miranda Branco katak membru CPN-CNRT halai subar iha ‘mama nia saia’ hanesan deklarasaun pániku.

‘Subar iha mama nia saia’ Branco hasai tanba hare ba Kay Rala Xanana Gusmão ne’ebé CNRT deside nu’udar Prezidente partidu nian  ba hatán  Sekretáriu Jerál Fretilin Mari Alkatiri nia Keixa iha Ministériu Públiku.

“Membru CPN-CNRT sira la’ós labarik ne’ebé subar iha nia ama nia saia hanesan Prezidente Bankada FRETILIN Francisco Miranda Branco alega, maibé CPN-CNRT hanesan órgaun koletivu iha nia lider másimu atu responsabiliza ba nia asaun sira. Iha kazu ida ne’e, Prezidente CPN-CNRT maka Maun Bo’ot Kay Rala Xanana Gusmão. Bankada FRETILIN fó sai iha sira nia komunikadu imprensa hodi manifesta sira nia pániku no ta’uk bainhira rona Prezidente Partidu CNRT Maun Bot Kay Rala Xanana Gusmão maka sei hatán ba Mari Alkatiri nia keixa”, hatete Deputadu Leandro Lobato liu hosi Konferénsia imprensa ba jornalista sira iha Bankada CNRT Kuarta (27/01).

Lobato afirma  CPN ka Comissão Política Nacional ne’e órgaun koletivu ida ne’ebé lidera husi Prezidente Partidu CNRT, Maun Boot Kay Rala Xanana Gusmão. Tanba ne’e, Prezidente Partidu ne’ebé mós nu’udar Prezidente CPN iha obrigasaun atu responsabiliza ba desizaun no asaun ne’ebé CPN foti hodi hasoru Dr. Mari Alkatiri.

Leandro interpreta katak keixa Alkatiri ba Ministériu Públiku hasoru CPN-CNRT, signifika katak líder másimu husi órgaun CPN-CNRT maka sei responsabiliza tuir deliberasaun reuniaun CPN nian.

 Liga ho akuzasaun subornu nia esplika, CPN-CNRT la-halo akuzasaun direta hasoru Mari Alkatiri, maibé CPN-CNRT apenas divulga dokumentu legal ne’ebé kompañia petrolíferu balun mensiona akontese subornu durante negosiasaun ba Tratadu Tasi Timor 2002/2003.

Bankada FRETILIN  iha loron 26 Janeiru 2021, afirma  Sekretáriu Jerál Partidu FRETILIN Mari Alkatiri aprezenta keixa ba Ministériu Públiku iha  7 de Jullu, hasoru indivíduu ne’ebé nu’udar membru Komisaun Polítika Nasionál partidu CNRT nian.

 Bianco realsa kondena ho atitude inventa reuniaun CPN extra-ordinária ida hodi desidi Prezidente CNRT Xanana Gusmão mak atu hatán ihá tribunal. Tuir nia katak hahalok ida infantíl no irresponsavel. Hanesan labarik ida halo sala halai ba subar ihá nia amã nia saia.

“Sr. Xanana Gusmão la’ós parte lejítima ba prosesu ida-ne’e, Dr. Mari Alkatiri la halo akuzasaun kontra sr. Xanana Gusmão, no Ministériu Públiku la’ós notifika sr. Xanana Gusmão maibé notifika indivíduu balun, ne’ebé mós nu’udar membru CPN partidu CNRT”, deklara Xefe Bankada FRETILIN. (Jornalista Julio Salinas Soares, Editor Mariano Martins)

Please follow and like us:

NOTÍSIA FOUN

Site Statistics

  • Users online: 0 
  • Visitors today : 297
  • Page views today : 322
  • Total visitors : 239,420
  • Total page view: 345,524