Notísia foun


Timor Post (21/01/2021)-Prezidente Autoridade Rejiaun Espesiál Oekusi Ambeno (RAEOA), Arsénio Bano garante katak, ró Haksolok sei mai Timor Leste hafoin konstruksaun. Bainhira ida ne’e la sai realidade, nia maka simu responsabilidade.

Arsénio dehan, konstruksaun ba ró Haksolok la’o dadauk hela. Nune’e, nia komenta, ema hotu hatene ona katak nia mak toma responsabilidade ba prosesu ida ne’e.

“Ro Haksolok ha’u hanoin sei mai, ha’u labele revela (fó sai) negosiasaun ne’e, ita boot sira hatene, kuandu Ro Haksolok la mai ha’u mak simu responsabilidade,” Arsénio hatete ba Jornalista sira hafoin hasoru malu ho Primeiru Ministru Taur Matan Ruak iha Palásiu Governu, Dili, Kinta (21/01/2020).

Maske nune’e, Arsénio dehan, prosesu hirak ne’e hotu la’o ho di’ak liu, nia presiza tebes apoiu husi governu sentral no hosi Prezidente RAEOA Mari Alkatiri.

Orsamentu ne’ebé governu aloka ba konstruksaun Ró Haksolok liuhusi RAEOA iha Alkatiri nia mandatu hamutuk millaun$16. Tanba kontruksanu seidauk hotu, governu propoin tan millaun $14 iha Orsamentu Jerál Estadu (OJE) 2021.

Mosu krítika maka’as husi bankada opozisaun CNRT ho sosiedade sivíl sira konsidera aumenta tan osan ba konstruksaun ró Haksolok ne’e laiha rajaun fundamental, tanba kompañia ne’ebé halo konstruksaun bakarota tiha ona no konstruksaun durante tinan hirak nia laran abandonadu no besi sira ferujen hotu ona.

Parte hirak ne’e husu responsabilidade Eis Prezidente RAEOA Marí Alkatiri nian tanba konstruksaun seidauk hotu maibé halo ona pagamentu 100% ba kompañia.

Parte sira husu ba Komisaun Anti Korrupsaun (KAK) ho Ministériu Públiku atu tau atensaun ba prosesu ne’ebé ikus mai estraga osan povu nian saugati de’it.

Jornalista: Jaime Pires

Editor Noémio Falcão

Please follow and like us:

NOTÍSIA FOUN

Site Statistics

  • Users online: 4 
  • Visitors today : 447
  • Page views today : 541
  • Total visitors : 193,919
  • Total page view: 280,295

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur