Notísia foun


Timor Post  (19/01/2021)— Pandemia Covid-19 ne’ebé mundu tomak hasoru fó konsekuénsia boot ba nasaun ida-idak atu próteze nia nasaun rasik. Bankada Demokrátiku (PD) bolu atensaun ba governu liuliu Ministériu Ensinu Superior no Kultura, Ministériu Negósiu Estranjeiru Kooperasaun (MNEK) no Ministériu Justisa atu buka solusaun ba problema pasaporte no visa ne’ebé estudante Timoroan sira enfrenta iha rai li’ur.

 “Bankada PD husu atu governu, liuliu Ministériu Justisa hola medida polítika atu tulun estudante sira tanba problema pasaporte. Iha estudante lubun mak pasaporte expire (mate ona), maibé sira labele fila mai Timor atu halo renovasaun, tanba restrisaun ne’ebé mak iha no mós vou-internasionais neebé mak ohin loron limita”,  deklara Xefe Bankada PD, Antonio da Conceição “Kalohan” liuhusi plenária, Tersa (19/01).

Antonio hatete, ho pasaporte ne’ebé mak kaduka, estudante labele trata sira nia vistu rezidénsia. No la iha validade vistu rezidénsia, estudante mós difisil atu kontinua hela ou fila mai Timor. Situasaun ida ne’e halo estudante nia moris iha rai li’ur la hakmatek. Alende terus tanba restrisaun ne’ebé governu fó, sira mós moris inseguru tanba difikuldades finanseira ne’ebé barak mós hasoru.

“Bankada PD husu atu Ministeriu Justisa ho nia diresaun sira hola ona medidas atu fó apoiu ba estudantes sira kona-ba problema passaportes”, tenik Eis Ministru Edukasaun.

Hatán ba preokupasaun ne’e,  Ministru Asuntu Parlamentár Komunikasaun Sosiál, Francisco Jerónimo,  konsidera deklarasaun polítika ne’ebé hato’o husi Bankada PD pertinente no sei enkamina  ba ministériu relevante.

“Hau nota ona kestaun ne’e no sei enkamina ba ministériu kompetente para rezolve”, Jerónimo promete.(Jornalista : Julio Salinas Soares, Editor: Mariano Martins)

Please follow and like us:

NOTÍSIA FOUN

Site Statistics

  • Users online: 4 
  • Visitors today : 802
  • Page views today : 927
  • Total visitors : 239,392
  • Total page view: 345,494