Notísia foun


Timor Post (08/01/2021)—Nain ba Kompañia Suai Indah, Americo Simão hakotu iis iha Aviaun AirNort husi Austrália ne’ebé atu aranka sai husi Aeroportu Internasionál, Nicolau Lobato, Komoro-Dili ba hala’o tratamentu saúde.

[caption id="attachment_10630" align="alignnone" width="300"] Americo Simão[/caption]

Tuir kronolojia, matebian iha uma moras maka família sira deside ba hala’o tratamentu iha Austrália, sai husi uma ba Aeroportu, sa’e ba aviaun hatudu matebian la’o fraku tebes. To’o iha aviaun laran konsege túr tiha iha kadeira, maibé aviaun seidauk semo, derepente de’it nia monu husi kadeira.

Jornalista Timor Post ne’ebé halo hela kobertura iha mate uman-Audian, Dili haktuir, ho akontesimentu ne’e, husi aeroportu karreta funeráriu tula matebian ba nia rejidénsia.

Matebian nia espoza ba Jornalista sira la ko’alia barak kona-ba akontesimentu ne’e tanba sente triste ba lakon boot ida ne’e. “Realidade mak imi haree nia mate ona”.

Americo hanesan nain ba Hotel Audian. Nia moris iha Suai, loron 5 Maiu 1969. Nia mate husik hela nia feen no oan na’in-haat, feto ida-mane na’in-tolu. Sira na’in-tolu hela iha Australia no oan mane klaran mak hela ho inan-aman iha Audian.

Entretantu Prezidente Kámara Komérsiu Indústria Timor Leste (CCI-TL sigla Portugués), Oscar Lima, ba Timor Post via telefone hatete, hakfodak tebes bainhira rona nia kolega di’ak Americo mate. Nia dehan, ho ida ne’e Timor Leste lakon investór nasionál di’ak ida ne’ebé durante ne’e kontribui mós ba dezenvolvimentu nasionál.

Oscar Lima hatete, Americo nu’udar timoroan ida ne’e durante tempu rejisténsia mós terus ba rai ne’e até inimigu sira kaer no sai dadur.

“Nia ema ida ne’ebé ke ba ita sira sei moris la nega nia favor ba rai ida ne’e. Nia hanesan dadur ida iha tempu rejisténsia. Bainhira ema kaer Maun Xanana, ami sira ne’e ema kaer ida ba ida lori ba dadur,” Oscar haktuir.

Entretantu Deputada Carmelita Caetano Moniz husi Bankada CNRT nu’udar mós Suai oan sente hakfodak ho Americo nia mate.

Carmelita haktuir, bainhira sei kiik iha Suai koñese ona Americo nu’udar ema ida ne’ebé di’ak tebes. “Maun Americo ema ida ke la gosta problema. Nia di’ak tebtebes ho ha’u nia aman sira. Nia ema ida ke susesu iha vida ekonomia. Ema ida low profile tebes. Ema ida ne’ebé la’ós tanba riku ona maka la liga ema, mas nia liga ema hotu-hotu,” Carmelita hatete.

Hanesan reprejentante povu, Carmelita dehan, ho Americo nia mate, lakon boot ida mós ba Timor nia investór ida.

“Ha’u nunka rona ema ida famozu hanesan Maun Americo Suai Indah iha problema ida, ema ne’ebé responsavel no laran di’ak tebes,” Carmelita subliña. (lyl/cao)

Please follow and like us:

NOTÍSIA FOUN

Site Statistics

  • Users online: 0 
  • Visitors today : 272
  • Page views today : 317
  • Total visitors : 196,004
  • Total page view: 283,362

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur