Notísia foun


Timor Post (21/12/2020)—Organizasaun Naun Governamental (ONG) lokal Luta ba Mudansa (LBM) servisu hamutuk ho Autoridade Lokal Suku Matorek, Postu Administrativu Turiskai, Munisípiu Manufahi realiza atividade konserva udan been ho meius sata netik iha foho lolon ne’ebé antes ne’e iha ona debu.

Atividade ne’e hahú hala’o iha loron Sesta (18/12/2020), iha área Tabar Tahu Lau, Aldeia Foho-Tu, Suku Matorek.

“Ami halo konservasaun debu ne’ebé sulin estraga hela atu nune’e iha tempu bailoron komunidade sira bele aproveita tanba iha tempu bailoron susar tebes ba bee moos,” Xefe Suku Matorek, Lucas Viera Branco subliña.

Líder komunitáriu ne’e rekoñese inisiativa LBM nian ho esperiénsia ne’ebé iha, buka servisu hamutuk hodi realiza atividade ne’e, nu’udar kontribuisaun parte hotu nian ba dezenvolvimentu nasional espesialmente iha Suku Matorek.

“Ho koñesementu ne’ebé LBM iha mai hamutuk ho autoridade nune’e orienta komunidade hodi konserva bee matan,” nia dehan.

Nia hatutan, inisiativa ne’e hanesan pilotu ida bainhira iha benefisiu ba komunidade Foho-tu mak sei kontinua fali ba aldeia Riamori, Fatuhei, Orluli suku Matorek.

Tempu hanesan, Diretor Ezekutivu LBM, Isaias Soares dos Reis hatete, isiativa ne’e mosu tanba haree ho matan iha fatin ne’e susar tebe ba bee moos iha tempu bailoron.

“Tanba ne’e ita labele husik udan been sulin sai hotu ba mota no tasi ho ida ne’e ita salva netik hela udan been balu atu nune’e bele fornese  fila fali ba bee matan tuan sira inklui bele mós hodi produs bee matan foun no redus mós erosaun,” Isaías subliña.

Diretór Isaias sente kontente tanba realizasaun ba atividade ne’e hetan partisipasaun másimu husi komunidade no joventude Matorek kompostu husi aldeia Rimori, Foho-Tu, Fatuhei no Aldeia Orluli. (lcl)

Please follow and like us:

NOTÍSIA FOUN

Site Statistics

  • Users online: 9 
  • Visitors today : 415
  • Page views today : 515
  • Total visitors : 141,472
  • Total page view: 202,354

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur