Notísia foun


Timor Post (15/12/2020)—Prezidente Komisaun A Parlamentu Nasionál  ne’ebé trata asuntu Justisa no Konstituisaun, Deputadu Joaquim dos Santos, hatete xamada ne’ebé KAK halo iha programa Sesta Bázika ne’e, se sidadaun ruma sente la kontente tanba hahalok balun ofende ninia dignidade umana karik, dalan mak tenke halo keixa ba iha PDHJ.

Joaquin levanta asuntu ne’e relasiona ho preokupasaun hosi públiku balun nian ne’ebé kestiona kona-ba serbisu KAK nian, ne’ebé mak foin daudaun ne’e halo aprensaun ba sidadaun balun relasiona ho sesta bázika la iha étika.

Nia parte apresia serbisu ne’ebé mak KAK ezekuta tuir regra, para halo prevensaun ba aktu korrupsaun.

“Ida ne’e sira hala’o sira nia serbisu, ne’ebé mak halo parte iha prevensaun korrupsaun. Sira iha kode étiku internu, serbisu KAK nian ita labele intrompe iha ne’ebá, se sira nia atitude ne’e balun viola karik sidadaun ruma nia direitu ne’e buat ketak ida, ne’e Provedór Diretu Umanus (PDHJ) mak hala’o fali nia knaar, mais agora nia hala’o nia serbisu no halo prevensaun para atu labele mosu korrupsaun, ha’u hanoin ne’e KAK nia kompeténsia tuir lei mak fó”, Joaquim afirma asuntu ne’e ba jornalista sira iha PN, tersa (15/12).

 Nia hatutan, ita seidauk bele julga KAK nia prosesu ne’e tuir kritériu ka la tuir kritériu, mais nia iha regra interna atu halo ninia knaar, para atu prevee labele mosu korrupsaun, bolu dehan prevensaun antesipada, ne’e la signifika halo ema balu laran moras. Ema ne’ebé sente laran moras buat ruma akontese karik ba PDHJ.

Enkuantu foin daudaun ne’e KAK bolu jestór supermerkadu Dili Mart ho ema importante balu iha Ministériu Turizmu Komérsiu Indústria, tanba deteta sasán sesta bázika balun ne’ebé mak distribui ba komunidade sira balun at ka liu ona prazu.

Jornalista: Julio Salinas Soares

Editor: Mariano Martins 

Please follow and like us:

NOTÍSIA FOUN

Site Statistics

  • Users online: 2 
  • Visitors today : 213
  • Page views today : 253
  • Total visitors : 240,109
  • Total page view: 346,405