Notísia foun


Timor Post (11/12/2020)— Manan-na’in ba Prémiu Direitus Umanus Sérgio Vieira de Mello ba tinan 2020 mak hanesan, iha katerogia Direitos Sociais, Económicos e Culturais, Cosme dos Santos Freitas, husi Dili; Padre António Martins Abad Santos Pablo, SJ, husi Ermera; Deolindo da Costa, husi Maliana; no Leopoldina Joana Guterres, husi Baucau. Iha kategoria Direitos Civis e Políticos manan-nain mak, organizasaun FOKUPERS, bazeada iha Dili.

Tuir mai profile badak kona-ba manan nain sira ne’ebé haktuir iha diskursu Prezidente Repúblika Francisco Guterres Lú Olo iha okajiaun atribui prémiu iha Palásiu Prezidensiál Bairro-Pite, Dili, Kinta (10/12/2020).

Cosme dos Santos Freitas nuúdar profesór iha Eskola Sekundária FINANTIL no mós koordenadór Pré-Eskolár Bemmalaia Cordiosa de Arcanjos, iha defisiénsia iha ninia matan ne’ebé mosu iha tempu okupasaun, bainhira subar iha Foho Matebian.

Maske ho defisiénsia ida nee Profesór Cosme dos Santos Freitas halo esforsu atu labarik sira hetan asesu ba edukasaun. Labarik sira nebe mak sira-nia família iha kbiit finanseiru, bele hetan asesu ba edukasaun ho kualidade nebe diak, maibé labarik sira nebe mak sira-nia família laiha kbiit finanseiru hasoru difikuldade atu hetan asesu ba edukasaun ho kualidade nebe diak. Faktu ida-nee mak enkoraja Professor Cosme dos Santos Freitas atu harii ensinu pré-eskolár ida, ho intensaun atu halo investimentu ba rekursu umanu nebe bele fó esperansa boot ba futuru Timor-Leste nian.

Profesór Cosme dos Santos Freitas uza ninia osan rasik husi ninia saláriu nuudar professor no husu empréstimu osan hosi banku hodi hahú halo kontrusaun ensinu pré-eskolár nebe refere. Tanba osan la too, nia kontinua husu nafatin empréstimu husi ema seluk hodi kontinua konstrusaun eskola nebe refere. Tanba osan la too nafatin atu finaliza eskola nebe refere, Profesór Cosme ninia káben halo negósiu faan modo no faan fahi hodi ajuda finaliza konstrusaun sala tolu too remata. Sala rua seluk sei iha prosesu konstrusaun. Ensinu Pré-Eskolár nee naran Bemmalaia Cordiosa de Arcanjos iha Aldeia Laulora, Suku Manleuana, Dili. Visé-Ministru Edukasaun inaugura eskola nebe refere iha loron 25 fulan-marsu tinan 2019.

Maske dala barak nesesidade uma-laran nian la too, Profesór Cosme dos Santos Freitas la rende atu kontinua obra boot nebe mak nia halo tihaona. Laós deit harii eskola nebe refere, maibé mós selu profesór voluntáriu sira nebe mak hanorin iha eskola, husi ninia saláriu rasik. Maske Profesór Cosme dos Santos Freitas hasoru difikuldade oioin, nia hatudu ninia espíritu voluntarizmu no persisténsia.

Padre António Martins Abad Santos Pablo, S.J. hanesan misionáriu husi kongresaun Jezuita nebe halo misaun iha Parókia Nossa Senhora de Fátima Railaku, Ermera. Padre António laós serbi deit sarani sira iha parókia nebe refere iha parte espirituál nian maibé nia mós halo formasaun no klínika, vizita sarani sira hodi hatene loloos sira-nia kondisaun moris no halo programa ida naran programa alimentasaun kontra mal nutrisaun. Hamutuk ho ekipa voluntáriu sira, Padre António realiza programa alimentasaun nee no hakbesik an ba família sira iha área rurál hodi fó ai-han ba labarik sira nebe mak sofre duni husi mal nutrisaun. Programa nee lao konsistente no la pára fó ai-han saudável ba labarik sira nebe mak presiza duni. Problema mal nutrisaun nuudar problema ida nebe sériu tanba fó impaktu ba futuru Timor-Leste nian.

Deolindo da Costa harii Uma Enkorajementu, iha Maliana, ho objetivu atu akomoda estudante sira hosi área rural nebe mak laiha kbiit finanseiru no mai hosi área sira nebe dook, nunee bele kontinua sira-nia estudu. Ho inisiativa ida nee, sira bele hetan asesu ba edukasaun. Estudante barak mak iha difikuldade kona-ba hela-fatin. Uma Enkorajementu nee fasilita ona estudante barak hodi bele kontinua sira-nia estudu. Jerasaun foin-sae sira nebe mak iha poténsia atu kontinua estudu, labele pára estudu tanba deit laiha hela-fatin. Uma Enkorajementu nee mós iha ninia fasilidade nebe fornese kursu, hanesan: komputadór, lian-inglés no administrasaun. Ejisténsia Uma Enkorajamentu nee ajuda hamenus todan finanseiru nebe mak inan-aman sira hasoru bainhira haruka sira-nia oan hetan asesu ba edukasaun.

Leopoldina Joana Guterres, profesora ida nebe iha neon nakloke, halao atividade oioin hamutuk ho komunidade sira, liu-liu iha área rural sira, atu hasae kriatividade no empreendedorismu. Profesora Leopoldina Joana Guterres halo esforsu atu haburas komunidade ninia neon kona-ba oinsá atu uza rekursu naturál ho domin no respeitu. Hamutuk ho ninia káben no ho apoiu husi ema seluk tan, harii Fundasaun HO MUSAN IDA. Fundasaun nee halao ninia programa dahuluk iha área florestal iha Baguia, nebe laós deit atu kuda ai-horis maibé atu haburas ideia oioin hosi ideia prinsipál nebe bele hasae edukasaun no formasaun vokasionál kona-ba kestaun agro-florestál no permakultura no fó impaktu pozitivu ba ekonomia lokál. Profesora Leopoldina Joana Guterres hamutuk ho komunidade Baguia kuda ai-horis oioin, liu-liu Mahoni, Teka no AI-Kameli.

Profesora Leopoldina Joana Guterres preokupa tebes ho kestaun alterasaun klimátika no halo esforsu atu lori komunidade sira foka liu ba ambiente saudável no sustentável. Liuhosi atividade kuda ai-horis, komunidade sira konsege hamoris filafali bee natural iha fatin balu. Nia fokus ba: aumenta rendimentu lokál, kria serbisu produtivu, hamenus kiak no hamlaha, haforsa konunidade lokál sira-nia inisiativa rasik.

Organizasaun FOKUPERS hatudu ona ninia prestasaun serbisu ho kualidade. Serbisu sira balu inklui fó asisténsia ba vítima feto no labarik sira, halo kampaña atu hametin kultura dame no laiha violénsia, hametin igualdade jéneru ho hakbiit feto sira. Espesifikamente FOKUPERS ninia atividade sira balu ligadu ho igualdade jéneru, kampaña kona-ba direitus umanus em jeral ba feto sira no labarik, proteje vítima violénsia bazeadu ba jéneru, tau matan ba vítima violénsia doméstika no fó asisténsia ba feto sira atu sira hadia no aumenta sira-nia rekursu ekonomia. FOKUPERS sai ona mahon ba feto no labarik sira iha tempu susar no reafirma nafatin ninia kompromisu atu kontinua ninia atividade sira.

Iha diskursu, Prezidente Repúblika fó parabéns ba manan-nain sira no família tomak ne’ebé sempre fó apoiu.

“Imi mak Erói foun iha prosesu dezenvolvimentu ba ita-nia País,” Lú Olo subliña.

Lú Olo fó mós obrigada ba apoiu tomak ne’ebé Konsellu Agrasiamentu no Ordem Onorífika fó ba Prezidente Repúblika iha prosesu selesaun.

“Ha’u hein katak ho Prémiu ida ne’e bele motiva liután imi hotu hodi kontinua imi-nia servisu ho komitimentu no ho haksolok. Nunee mos lori imi sai exemplu no sai modelo ba sidadaun sira hotu hodi ida-ida buka nia dalán hodi fó mós kontriuisaun, garante respeitu no implementasaun ba Timoroan hothotu-nia Direitus Umanus. Nuudar sidadaun ida nee mak ita-nia devér no responsabilidade!,” Lú Olo subliña.

Entretantu hahú iha tinan 2008, liuhusi inisiativa husi Laureadu Nobél da Paz Ramos-Horta, Prezidente Repúblika entrega Prémiu Direitus Umanus Sérgio Vieira de Mello ba sidadaun ka organizasaun governamentál ka laos governamentál, husi Timor-Leste ka husi país seluk, kona-ba promosaun, protesaun no divulgasaun Direitus Umanus iha Timor-Leste.

Iha lóron importante ida nee, no liuhusi atribuisaun Prémiu Direitus Umanus ita fó omenajém ba ema ida neebé espesiál tebes ba Timor-Leste no dedika nia vida tomak ba kauza direitus umanus no paz: saudozu Sérgio Vieira de Mello! Entre 1999 no 2002 Sérgio Vieira de Mello  diriji Administrasaun Transitória husi Nasoins Unidas iha Timor-Leste (UNTAET) no hatudu nia karákter umanista, ho kapasidade diálogu no negosiasaun neebé sempre defende direitus umanus no valór demokrátiku sira, nuudar inspirasaun ida ba ita-hotu.

Ho ispíritu ida nee mak tinan-tinan Prezidente Repúblika atribui Prémiu Direitus Umanus Sérgio Vieira de Mello ne’ebé fahe ba kategoria rua: ida mak Direitos Civis e Políticos neebé konsidera ema ka instituisaun/organizasaun neebé promove, defende no divulga direitus umanus neebé rekoñese iha mundu tomak iha ámbitu direitu sivíl no direitu polítiku nian; no rua mak Direitos económicos, Sociais e Culturais, neebé konsidera ema ka instituisaun/organizasaun neebé halao atividade atu promove, defende no divulga direitus umanus iha área sosiál, direitu ekonómiku no direitu kulturál, liuliu kombate kiak, dezenvolve setór edukasaun, saúde, protesaun meiu-ambiente no solidariedade sosiál.

Iha tinan ida nee kandidatu nain ruanulu resin haat (24). Kandidatu nain hitu (7) husi kategoria Direitos Civis e Políticos no kandidatu nain sanulu resin hitu (17) husi kategoria Direito Económico, Social e Cultural.

Kada manán-na’in simu prémiu ho valór osan US $ 10.000. (cao)

Please follow and like us:

NOTÍSIA FOUN

Site Statistics

  • Users online: 2 
  • Visitors today : 1,047
  • Page views today : 1,549
  • Total visitors : 149,123
  • Total page view: 214,060

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur