Notísia foun


Timor Post (11/122020)—Membru Unidade Polísia Militár (PM), FALINTIL-Forsa Defeza Timor-Leste (F-FDTL) Segundu Sarjentu Manuel João Baptista Aparício, ofisialmente hasai farda militar ho rajaun involve direta iha partidu foun ho naran Os Verdes.

Rezignasaun Segundu Sarjentu Manuel nian hala’o liuhosi parada militár ne’ebé lidera direta hosi Komandante Polisia Militár Major Abel da Costa ‘NIKI’, iha Kuartél PM, Kintál Boot, Dili, Sesta (11/12/2020).

Komandante PM agradese Sarjentu Manuel ninia kontribuisaun ba instituisaun defeza ne’e hahú hosi prosesu luta FALINTIL to’o iha independénsia.

“Ami nia membru ne’e la’ós ami maka hasai, maibé nia rasik maka halo rekerimentu aprezenta ba Major Jenerál Lere Anan Timur hodi sai ba vida civil,” esplika Major NIKI.

Ho rezignasaun membru ida ne’e unidade PM hela membru ativu na’in 157 ne’ebé antes ne’e iha na’in 158.

[caption id="attachment_9959" align="alignnone" width="300"] Manuel João Baptista Aparício[/caption]

Entretantu João Baptista Aparício deklara, rezigna-aan hosi vida militár ne’e ninia inisiativa rasik tanba hakarak involve aan iha vida polítika liu hosi partidu OS VERDES.

“Ha’u rasik hakarak sai hosi instituisaun F-FDTL hodi fó fali kontribuisaun ba partidu polítiku OS VERDES ne’ebé ha’u nia pozisaun nu’udar vise-prezidente,” deklara iha Kuartel PM, Sesta (11/12) ne’e.

Segundu Sarjentu ne’e involve iha militár la’ós foin iha era ukun aan, maibé hahú kedas iha funu laran.

“Ha’u serví ba FALINTIL komesa iha funu laran to’o transferénsia FALINTIL ba F-FDTL no sai nu’udar membru fundadór ba F-FDTL, agora tempu ona ha’u rasik hakarak sai hosi instituisaun F-FDTL hodi fali kontribuisaun ba partidu polítiku”.

Jornalista: Mariano Martins/Julio Salinas Soares

Editór: Noémio Falcão

Please follow and like us:

NOTÍSIA FOUN

Site Statistics

  • Users online: 2 
  • Visitors today : 71
  • Page views today : 88
  • Total visitors : 149,259
  • Total page view: 214,262

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur