Notísia foun


Timor Post (03/12/2020)- Sekretáriu Estadu Formasaun Profisionál no Empregu (SEFOPE) Alarico do Rosario, halo klarifikasaun ba razaun  kansela  traballador na’in 6  ba Austrália iha loron kuarta (02/12/20).

Rosario esplika dehan timoroan na’in 6 la konsege ba serbisu iha Austrália, tanba na’in 3 rezultadu teste mak la hatán sira ba, no na’in 3 seluk sistema iha aviaun laran mak la simu sira nia pasaporte.

“Na’in 3 rezultadu tees médiku husi Austrália mai iha hodi bainrua loraik (01/12), rezultadu tees médiku ne’e mak la hatán sira ba, la’ós ita mak la hatán ba”, esklarese Governante, Kinta (3/12)

Membru Governu adianta SEFOPE prontu fasilita trata traballadór na’in 162 ne’e ba hotu, maibé rezultadu tees médiku mak la hatán ba.

“Saúde ne’e regras husi Austrália, la’ós Timor-Leste mak halo tees”, tenik tan.

Nia afirma  kuandu rezultadu teste médiku iha Austrália mak la autoriza ba serbisu, labele dun fali ba SEFOPE.

“Buat ida moras ne’e, labele dun fali mai SEFOPE, tanba moras ne’e iha kandidatu traballadór sira nia liman rasik, se kuidadu an di’ak, kuandu tees médiku loos sira ba, se ba mak ema hetan moras ita labele fó sala fali mai governu”, Nia argumenta.

Nia repete katak prosesu teste médiku la’os naran ba, maibé kontratu mai ona, husi Austrália mak ba tees, kuandu saúde di’ak bele ba no saúde la diak nia labele ba.

“Sira ne’e liu kleur tiha ona naran tama sistema ita haruka tiha ba ajénsia hili kontratu mai, agora kontratu mai atu arranka sai husi ne’e mak, tenke ba teste médiku, ita la hatene departamentu ida kona-ba teste iha Austrália mak bele deskobre depois fó fali rezultadu mai”, Nia esplika

Entretantu na’in 3 seluk nia informa kansela, tanba sistema iha aviaun laran mak la simu sira nia naran.

“Na’in 3 hetan problema iha aviaun laran, husi ajénsia, la’ós ita mak la hatán ba, buat hotu kompletu sa’e tiha ba aviaun dehan sistema mak la a kapta nia naran. Sistema iha aviaun laran mak la simu sira nia naran, parte SEFOPE mós la hatene, tanba sistema Cantas aviaun nian” esplika tan.

Hodi kompara Governante ne’e dehan nia  rasik atu ba Korea mós, ba sistema la simu  nia pasaporte maka  para hela.

Entretantu maiske kansela ona traballadór na’in 6, maibé Alarico garantia sei la taka dalan ba sira atu serbisu iha Austrália.(Jornalista: Jaime Pires)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 297
  • Page views today : 348
  • Total visitors : 196,029
  • Total page view: 283,393

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur