Notísia foun


Timor Post (19/11/2020)-Embaixador Timor Leste ba Japaun, Ilidio Ximenes hato’o nia resposta badak kona-ba atake husi Bankada FRETILIN hasoru nia liga ho Lider Nasional Kayrala Xanana Gusmao.

Embaixador defende katak, durante ne’e nia hala’o kna’ar la ses husi interese estadu, povu no nasaun RDTL.

Maske nune’e, Ilidio dehan, kona-ba kestaun ne’e, nia sei ko’alia uluk ho Ministra Negosiu Estranjeiru no Kooperasaun (MNEK) molok ko’alia ba publiku.

“Di’ak, ha’u sei ko’alia no hato’o uluk ba MNEK,” Ilidio ba Timor Post husi Japaun hafoin rona konferensia ba imprensa husi Bankada FRETILIN, Kinta (19/11/2020) iha Uma Fukun Parlamentu Nasional hodi husu ba Governu lideradu Taur Matan Ruak atu halo ezonerasaun ba nia.

Entretantu Bankada Fretilín iha Parlamentu Nasionál husu governu imediatamente ezonera Embaixadór Ilídio Ximenes tanba konsidera halo servisu hali’is liu ba partidu.

Fretilín hato’o pozisaun ne’e hafoin hare partisipasaun no fó mensajen via zoom Prezidente CNRT Kay Rala Xanana Gusmão, iha konferénsia internasionál Tokyo Parliamentary Peace Forum, ne’ebé organize husi Parliamentary Committee of Diet of Japan and Japan Commission on Global Governance (JCGG) iha 18 Novembru 2020.

Francisco Miranda Branco, Prezidente Bankada Fretilín, hatete razaun Fretilín husu governu atu halo ezonerasaun ba embaixadór Japaun tanba nia hala’o serbisu aas liu interese grupu ka partidu nian la’ós tau interese estadu.

“Ami ezije ba governu atu halo ezonerasaun imediata ba embaixadór Timor-Leste iha Japaun hodi troka diplomata seluk ne’ebé reprezenta estadu Timor-Leste ho dignu, tanba sistematikamente ami akompaña ninia atividade sira ne’e mais orientadu ba interese grupu nian la’ós lori estadu Timor-Leste nia interese tanba ida ne’e mak ami ezije atu ezonera”, dehan Xefe Bankada liu hosi konferénsia imprensa iha sala Bankada Fretilín Parlamentu Nasionál, Kinta (19/11).

Deputadu ne’e hatutan Embaixadór Timor-Leste ba Japaun ka ba nasaun ne’ebé de’it hanesan reprezenta estadu iha nasaun refere. La’ós reprezenta fali grupu ka partidu, liuliu utiliza rekursu estadu nian hodi halo fali ajenda partidu.

Entretantu lider nasionál, lider karizmátiku Kay Rala Xanana Gusmão dezloka ba Jakarta ho aviaun jet privadu iha loron 18 Novembru 2020 (13:00), atu kontrolu saúde, no liu de’it oras balun eis Komandante em Xefe Luta Libertasaun Nasionál nian hato’o mós nia palestra via zoom iha Konferénsia Internasionál Tokyo Parliamentary Peace Forum, ne’ebé Organiza Hosi Parliamentary Committee of Diet of Japan and Japan Commission on Global Governance (JCGG), hodi selebra Aniversáriu Organizasaun Nasoes Unidas (ONU) dala-75. (cao)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 715
  • Page views today : 952
  • Total visitors : 140,899
  • Total page view: 201,599

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur