Diariutimorpost

Timor Post (19/11/2020)-Klube reprezentante universidade Dili Institutu Off Teknolojia (DIT Fc) tebe  ekiapa jigante Karketu Dili Fc sai  hosi Kopa 12 de Novembru tinan 2020 ne’e.

Jogu sistema lakon sai ne’e obriga Karketu tenke lulun biti hafoin derrota (0-3) ho DIT  iha Estádiu Munisípal Dili, kuarta (18/11) lokraik.

DIT nia golu rua realiza kedas iha jogu primeiru parte hodi hatuur pozisaun provizóriu (2-0). Golu rua refere marka hosi jogadór ho númeru kamizola (7), José Dos Santos iha minutu (32) no (33).

 Matak Malirin Karketu Dili Fc  esforsu-an duni  hodi responde golu ruma maibé sorte la iha.  Bola ne’ebé marka hosi ekipa avansadu namlele de’it hosi taveza leten.

Hare ba papelaun rejultadu mamuk  Karketu muda  tátiku no estratéjiku jogu hodi reforsa avansadu iha jogu segunda parte.

 Estratéjiku d’ak ona infelizmente bola ne’ebe markadór sira lansa salva ho di’ak hotu hosi goleiru DIT Fc.

 DIT Fc  fila kedas ho kontra atake ne’ebé  lais  fura tan rede Karketu Dili Fc  iha minutu (56) hodi aumenta skor ba 3-0.

 Espiritu no vontade jogadór Karketu la mate maski sofre golu 3, to’o jogu termina vitória ba ekipa DIT Fc manan ho rezultadu ikus 3-0.

Ho rezultadu ne’e DIT Fc  hakat ba oin enkuantu ekipa Karketu Dili Fc obrigadu tenke hela hosi Kopa 12 Novembru 2020.(Jornalista: Jaime Pires)

Please follow and like us: