Notísia foun


Timor Post (12/11/2020)—Polísia Nasionál Timor Leste (PNTL) Munisípiu Dili kaptura tiha ona membru husi Grupu Movimentu Nasional Defende Konstituisaun RDTL (MNDK), iha proseisaun ba Santa Kruz hodi selebra Loron Nasionál Juventude ne’ebé monu iha loron masakre 12 Novembru 1991.

Polísia foti asaun ne’e iha kedas Rotunda Estátua Proklamador RDTL, Francisco Xavier do Amaral, tanba grupu MNDK fahe hela brósura kona-ba sira ho títulu “Maluk Timoroan, Hader! Mai Ita Defende Konstituisaun, Ita Nia Lei Inan”.

Iha brósura ne’e MNDK kontra maka’a desizaun Lú Olo nian durante ne’e liuliu hakotu krize polítika iha rai laran ne’ebé tuir sira la tuir Konstituisaun RDTL.

MNDK  defende katak, tuir lolo’os Konstituisaun RDTL, Prezidente Repúblika la devia pendente posse ba membru governu na’in ualu hodi provoka krize polítika iha rai laran to’o harahun tiha governu daualu lideradu CNRT, PLP ho KHUNTO.

Tuir MNDK, meius hotu ne’ebé Lú Olo foti iha prosesu hakotu krize polítika rai laran ho intensaun involve FRETILIN iha ukun la tuir Konstituisaun haruka.

Tuir observasaun Jornalista Timor Post haktuir, polísia halo uluk kapturasaun ba membru MNDK  na’in-rua hodi lori kedas ba halo investigasaun iha portu polísia, no kontinua buka tuir membru sira seluk.

To’o notísia ne’e públika, Jornalista seidauk konsege halo konfirmasaun ho líder másimu MNDK.

Entretantu Líder Másimu Grupu Rezistensia Nasional Defende Justisa no Konstituisaun RDTL, Ângela Freitas konfirma, laiha koñesimentu ba grupu ne’ebé polísia kaptura.

Maske nune’e, Ângela afirma, tenke respeitu ema ida-idak nia hanoin atu hadi’a buat ne’ebé naksalak iha nasaun demokrátiku ida ne’e.

“Demokrasia mak nune’e ona, respeita ida-ida nia hanoin ne’ebé atu hadi’a buat sira ne’ebé naksalak,” Ângela subliña. (lyl/cao)

Tuir mai brosura ne’ebé polísia sita husi membru MNDK ;

Please follow and like us:

NOTÍSIA FOUN

Site Statistics

  • Users online: 0 
  • Visitors today : 206
  • Page views today : 239
  • Total visitors : 240,102
  • Total page view: 346,391