Notísia foun


Timor Post (09/11/2020)—Orsamentu Jerál Estadu (OJE) tinan 2021, Ministériu Agrikultura no Peska (MAP) propoin sosa ró-rua hodi kaer-ikan iha tasi mane.

Remata audiénsia ho Komisaun D, iha Parlamentu Nasionál, Vise Ministru MAP, Abílio Araújo, hatete MAP iha programa prioridade ualu (8), liuliu ba iha rekuperasaun ekonómika, agrikultura, irrigasaun, hasae produsaun, peskas, oinsá ita nia povu bele livre hosi situasaun COVID-19, inklui mós serbisu balu ne’ebé atu aseguratasi.

“Ohin aprezenta iha Komisaun D, kona-ba ró-rua ne’ebé mak Ministériu Peskas prepara, para atu bele asegura ba ita nia peska ilegál sira ho serbisu sira seluk ne’ebé mak konsidera importante ba ita-nia nasaun” informa Abílio ba jornalista sira iha PN, sesta (06/11).

Alende ne’e iha fatin hanesan, Prezidente Komisaun D, Deputadu Antonino Bianco, sekunda, orsamentu ba MAP tinan ne’e aumenta makas kompara ho tinan sira uluk. Osan ne’e aumenta makas, tanba programa balun iha kontinuasaun no programa balun foun.

“Sira nia programa foun ne’e mak sei sosa ró-rua, objetivu sosa-ró ne’e bele aproveita ita nia peskador sira, para atu bele la’o mós iha tasi, para hodi bele kaer ikan ita nian, tanba durante ne’e ita la iha ró peska nian. Operasaun ró ne’e rasik sira mak hatene, bele la’o iha tasi mane no tasi feto, entaun ho ida ne’e mak sira nia orsamentu aumenta. Tuir loloos sira hanoin hakarak tau barak, maibé sira tenke tau uluk ida ne’e, para bele fó mós benefísiu ba reseitas balu bele tama karik”, hatutan deputadu Bankada FRETILIN.

Nia akresenta ró-rua alende atu aumenta tan reseitas ruma ba parte Ministériu Agrikultura nian, aumezmu tempu tau matan pirata sira ne’ebé tama sai iha tasi laran hodi na’ok ita nia ikan.

Nia relata anualmente TL lakon miloens dolar iha tasi, entaun alende Ministériu Agrikultura iha ró-rua no defeza seguransa mós iha ró, ida tau matan ba seguransa, ida seluk sirkula hodi kaer ikan. Ita bele dehan Ministériu

Agrikultura la’ós de’it produs hare ho batar, maibé bele mós hatama produsaun ikan hosi tasi nian.

“Reseita sira ne’ebé mak iha tinan kotuk liuhosi diresaun lima ne’ebé mak tutela iha MAP rekolla hamutuk $207, 42.

Reseitas sira ne’e inklui mós kona-ba ikan nian, entaun ita hein katak komponente sira hanesan abatementu animal oho karau nia fatin ne’e mós tenke iha reseita tama, importasaun produtus agrikula mós tama ho mós lisensamentu peska komersiál ho lisensamentu nian mós tama”, dehan deputadu.

Reseitas doméstiku produtu florestais ne’e sira hakarak tinan oin bele tama, entaun ai-teka sira uluk barak kuaze 500 hektares ne’ebé iha, aban-bainrua sira uza para atu bele komesa ona produs ka komersializa para bele hatama osan, no mós ba reseitas sira seluk.

Entretantu iha audiénsia ne’e, MAP aprezenta mós orsamentu ba ikan sira ne’ebé atu hakiak, hodi fornese ka atribui ikan-fini ba grupu organizasaun sira ne’ebé eziste ona.

Bianco admite, MAP mós sei apoiu fini gratuita ba agrikultura sira, programa fila rai gratuita, aumenta irrigasaun, alargamentu ba kafé no kuda baunila.

Entretantu iha tinan 2021, MAP iha orsamentu US $ 31,964,258 dólares, inklui US $5,177,675 ba implementasaun atividade relasiona ho medidas planu rekuperasaun ekonomia.(Jornalista : Julio Salinas Soares)

Please follow and like us:

NOTÍSIA FOUN

Site Statistics

  • Users online: 2 
  • Visitors today : 1,340
  • Page views today : 2,266
  • Total visitors : 74,272
  • Total page view: 103,524

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur