Notísia foun


Timor Post (29/10/2020)—Liuhosi plenária, tersa (27/10), Deputadu Bankada CNRT, Gabriel Soares, deklara, Estadu Emerjénsia da-Hitu hatudu governu mukit  buka opsaun no solusaun  sai hosi situasaun atuál.

Gabriel hato’o preokupasaun ne’e tanba  kuandu besik ona termina Estadu Emerjénsia mosu kazu foun, hafoin PN aprova estensaun EE kazu pozitivu lakon mesak de’it.

            Gabriel hatete, Estadu Emerjénsia sempre marka ho sidadaun-ida hosi estranjeiru infetadu pozitivu Covid-19.

“Ne’e beibeik tiha ona, kuandu atu termina Estadu Emerjénsia mosu kazu foun. Hafoin Parlamentu Nasionál aprova estensaun EE, kazu pozitivu lakon mesak tiha de’it. Ne’e hatudu momoos la’ós ona koinsidénsia maibé planeadu hodi fábrika moras atu halo ta’uk Povu no fó dalan ba Estadu Emerjénsia. Bankada CNRT husu ba Governu atu para ona kari rai rahun ba Povu nia matan”, Gabriel afirma iha uma fukun PN.

Nia subliña Estadu Emerjénsia nu’udar instrumentu polítika de’it, foufoun deklara Estadu Emerjénsia atu iha espasu hodi hadau podér iha Parlamentu Nasionál, kontinua extende atu limite movimentu no sirkulasaun sidadaun nian hodi ezije prezensa Estadu nian ba impasse polítika ne’ebé Presidente Repúblika rasik ajuda no inventa hodi loke dalan ba FRETILIN atu bele tama iha VIII Governu.

Deputadu ne’e konsidera Estadu Emerjénsia da-Hitu ne’e sei rai mós problema lubuk ida ne’ebé to’o agora seidauk resolve, sidadaun lubuk ida kontinua reklama pagamentu familiar ne’ebé liu ona fulan-haat seidauk simu.

Nia mos kestiona relasiona ho Ministra Solidariedade Sosiál  ne’ebé fó ona promesa  maibé frontline sira to’o agora barak mak la simu sira-nia direitu, hoteis no catering la selu, subsídiu ba empreza no trabalhadores sai la klaru no la iha manutensaun ba fasilidades kuarentena no izolamentu, la iha subsídiu dignu ba ekipa vijilánsia no ambulánsia, no barak tan.

Nia mós konsidera Estadu Emerjénsia iha nivel implementasaun no organizasaun la di’ak, la’o runguranga, nune’e hamosu problema sosiais foun iha ita-nia sosiedade nia laran.

Nia akresenta  Bankada CNRT mós nota hela inkapasidade iha dezempeñu Governu nian ba ezekusaun Fundo Covid-19, pagamentu atrazadu no ezekusaun ki’ik tebes.

“Ami hakarak dehan, ho orsamentu ho montante ki’ik de’it labele ezekuta tuir kalendáriu ezekusaun orsamentu nian, oinsá mak Governu ne’e bele ezekuta OJE 2020 no tinan 2021 nian”, dehan deputada Bankada CNRT ne’e.

Molok hakotu nia hatete Pandemia Covid-19 sai tiha oportunidade grasas ba Presidente Repúblika ho nia Partidu FRETILIN hodi agora tama iha Governu de Faktu Inkonstitusionál ho termu viabilizasaun.(Jornalista : Julio Salinas Soares)

Please follow and like us:

NOTÍSIA FOUN

Site Statistics

  • Users online: 3 
  • Visitors today : 978
  • Page views today : 1,230
  • Total visitors : 84,825
  • Total page view: 119,037

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur