Notísia foun


Timor Post (27/10/2020)—Reprezentante Povu iha uma fukun Parlamentu Nasional (PN) ho aprova ona pedidu estensaun Estadu Emergensia (EE) ba da-hitu (7).

Estensaun EE ba da-hitu nee, aprova liuhosi plenaria extraordiaria, tersa (27/10), rezultadu votasaun a-favor 42 kontra no abstensaun zero (0).

“Nunee projetu lei numeru 12/V terseira, autorizasaun renovasaun deklarasaun Estadu Emergensia pasa. Tanba pasa ona, Parlamentu Nasionál konsede ona autorizasaun ba renovasaun Estadu Emergensia ba territoriu nasional, durante 04 Novembru to 03 Dezembru 2020”, Prezidente Parlamentu Nasionál, Deputadu Aniceto Longuinhos Guterres Lopes, anunsia liu hosi plenária, tersa (27/10).

Entretantu, iha diskusaun no aprovasaun ba pedidu estensaun nee, Xefe Bankada CNRT, Duarte Nunes, hatete, iha EE ba da-hitu, tuir CNRT nia haree Governu tenke fó atensaun makas ba Munisípiu tolu neebé mak besik fronteira, hanesan Oekusi, Bobonaru no Suai.

“Munisípiu tolu nee mak tenke merese atensaun espesial, embora sira seluk mós merese atensaun, maibé Munisípiu tolu nee tenke atensaun makas, nunee populasaun bele hakmatek no kolabora ho forsa sira, atu nunee ita bele hetan susesu iha fronteira”. Duarte deklara liuhosi plenária.

Duarte dehan, situasaun neebé CNRT nota, bainhira atu besik ona termina EE, mosu tan ona kazu foun. Tanba nee CNRT konsidera situasaun nee fabrikadu.

“Situasaun ida neebé mak ami akompaña, iha estensaun ba da-tolu, iha extra mak sempre mosu kazu foun. Atu konsidénsia ka planeadu, nee ba ami bele konsidera hanesan situasaun ida neebé mak ita bele dehan fabrikadu”. Duarte dehan.

Deputadu Bankada KHUNTO, Luis Roberto, hatete, Bankada KHUNTO la iha obzesaun ida hodi diskorda ho pedidu Prezidente Repúblika nian kona-ba estensaun EE da-hitu, tanba kestaun saúde publiku nee importante tebes.

“Ami prontu atu fó apoiu nafatin, hodi bele estende tan Estadu Emergensia nee ba da-hitu, hodi bele prevene moras COVID-19 neebé iha nasaun viziñu sira enfrenta nafatin ho númeru neebé as”.

Segundu Vise Prezidente Parlamentu Nasional nee deklara.

Deputada Bankada Demokratika, Elvina Souza, hatete, partidu Dekomokratiku sempre fó nia votu favoravel ba aplikasaun EE ho hanoin ida katak

“Hau hanoin ohin ita hotu hamutuk iha nee ho razaun ida atu bele halo estensaun ba Estadu Emergensia ba da-hitu, hanesan baibain partidu demokratiku sempre fó nia votu favoravel ba estensaun ka aplikasaun Estadu Emergensia, ho hanoin ida katak atu bele salva ita nia povu hosi moras neebé mak perigu tebes no mós inimigu invezivel neebé mak sai hanesan ameasa boot ba mundu no mós ba ita”. Elvina deklara.

Deputadu Bankada PLP, Francisco Vasconselho, dehan Bankada PLP apresia tebes ho medida sira neebé mak durante nee aplika iha EE.

“Medida sira neebé mak ita uza nee adekuadu ona, tanba nee Governu kontinua aplika nafatin, tanba ita haree viziñu ita nian Indonesia ho númeru neebé mak sae ba beibeik, ita aperta tan mak iha fronteira, liuliu meius sira neebé mak ita uza para bele kontrola, tanba ita nia joven balun hakat ba sorin, depois sira tama fali mai sees hosi dalan neebé mak la loos”. Vasconselho informa.

Deputada Bankada FRETILIN, Josefa Pereira, kongratula esforsu Goveru nian hodi satan netik moras at nee.

“Hakarak kongratula esforsu Governu nian atu prevene moras ida nee, tanba nee laós fasil atu foti medida hodi hasoru moras at ida nee, tanba nia mosu iha tempu ida neebé mak badak tebes no tenke urgente foti medidas barak, tanba nee importantismu halo renovasaun ba Estadu Emergensia”. Josefa deklara.

Portantu, Prezidente Repúblika, Francisco Guterres “Lú Olo” solisita autorizasaun renovasaun deklarasaun Estadu Emergensia (EE) ba territóriu nasionál, tuir artigu 85 Konstitusaun Repúblika Demorátika Taimor-Leste, durante loron (30), hahú hosi inisiu 00.00 oras, loron kuarta-feira 04 fulan Novembru 2020 no sei termina 23,59 oras, loron kinta-feira 03 Dezembru 2020.

Pontu importante tolu neebé sita iha EE da-hitu, neebé mak sidadaun sira tenke kumpre mak hanesan, sirkulasaun internasional, liberdade sirkulasaun no fixasaun rezidénsia iha kualker pontu iha territóriu nasional, inklui direitu rezistésia. (Azu)

Please follow and like us:

NOTÍSIA FOUN

Site Statistics

  • Users online: 5 
  • Visitors today : 765
  • Page views today : 1,152
  • Total visitors : 73,697
  • Total page view: 102,410

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur